Du muiti fu preiki gi mansma
1. San de tranga fanowdu fu man sorgu gi Kownukondre afersi?
1 A Kownukondre wroko e tan gro na ini den lasti dei disi. Fu dati ede, mansma di doro den markitiki fu teki fesi, de tranga fanowdu (Mark. 4:30-32; Tori. 20:28; 1 Tim. 3:1-13). Ma toku, na son presi moro umasma, leki mansma e arki a Kownukondre boskopu. Na ini son kulturu, mansma e libi en gi den wefi fu leri den pikin sani di abi fu du nanga kerkitori. Fa wi kan yepi moro mansma fu kon frustan taki den abi Gado fanowdu èn fu kon na ini a tru anbegi makandra nanga wi?
2. Fa a muiti di Paulus nanga Petrus ben du fu gi kotoigi na mansma, ben abi bun bakapisi?
2 Suku fu preiki gi mansma: Te wan osofamiri-edeman e teki a tru anbegi, dan nofo tron a abi krakti tapu trawan na ini na osofamiri, èn den e teki a tru anbegi tu. Fu eksempre, di Paulus nanga Silas ben de na strafu fu di den ben e preiki, dan den ben gi kotoigi na wan waktiman fu a strafu-oso. A man nanga en heri osofamiri teki dopu (Tori. 16:25-34). Fu di Paulus ben preiki na ini Korente, meki „Krespus, a fesiman fu a snoga tron wan bribiman fu Masra, makandra nanga en heri osofamiri” (Tori. 18:8). Yehovah ben gebroiki Petrus fu gi kotoigi na Kornelius, wan legre ofsiri, di ’ben abi wan tranga bribi na ini Gado èn di ben frede Gado’. Kornelius, makandra nanga en famiriman èn nanga en bun mati, teki dopu.—Tori. 10:1-48.
3. Neleki Filipus, na sortu „bigiman fu kondre” yu kan gi kotoigi?
3 A kan abi furu bun bakapisi te wi e gi kotoigi na „den bigiman fu kondre” (1 Tim. 2:1, 2). Fu eksempre, na engel fu Yehovah ben taigi Filipus fu taki nanga „wan prenspari man”, di ben e luku ala den gudu fu na umakownu fu den Etiopiasma. Filipus ben e yere fa a man ben „e leisi a buku fu a profeiti Yesaya nanga wan tranga sten”, èn a fruteri en a bun nyunsu fu Yesus. Na Etiopia man disi ben tron wan disipel. A kan de so taki a fruteri tra sma a bun nyunsu, di a ben de na pasi fu go na en kondre baka. A kan de so tu taki a ben preiki gi na umakownu nanga den tra sma na ini a kownu-oso. Efu a no ben du dati, dan kande den sma disi noiti no ben o kisi na okasi fu yere a bun nyunsu.—Tori. 8:26-39.
4. Fa wi kan gi mansma moro okasi fu yere a bun nyunsu?
4 Fa fu miti moro mansma: Nofo tron, a de so taki mansma de na wroko na deiten. Yu kan seti sani fu preiki moro furu na bakadina, tapu satra, sonde, noso tapu fesadei? Te yu e preiki doronomo na ini bisnis kontren, dan dati sa gi yu moro okasi fu preiki gi den mansma di no de na oso so furu. Den brada kan du spesrutu muiti tu fu gi kotoigi na den mansma na wrokope, te den kisi na okasi fu du dati. Na ini na oso-fu-oso preikiwroko, spesrutu na ini den kontren pe wi e go furu, den brada kan aksi den ososma wanwan leisi fu taki nanga na edeman fu na osofamiri.
5. San wan sisa musu du te a miti wan mansma di arki a Kownukondre boskopu?
5 Wan sisa di miti wan mansma di ben arki a boskopu, no musu tyari wan gobaka en wanwan na a man. A kan go makandra nanga en masra, noso wan tra preikiman. Te a man e go na fesi, dan a moro bun fu gi a gobaka disi na wan lepi brada.
6. Fa wi kan teki na eksempre fu na apostel Paulus, so taki wi kan „wini moro nanga moro sma”?
6 Taki fu sani di e hari a prakseri fu mansma: Na apostel Paulus ben luku sortu sma ben arki en èn baka dati a ben taki fu sani di ben hari a prakseri fu den sma dati. Na so fasi a ben kan „wini moro nanga moro sma” (1 Kor. 9:19-23). Na so wi musu go luku tu sortu tori kan hari a prakseri fu den mansma di wi e miti na ini a preikiwroko, èn wi musu sreka wisrefi fu taki fu den sani dati. Fu eksempre, nofo tron mansma e broko den ede nanga na ekonomia, wan bun tirimakti, fa den o sorgu taki ogri no miti den osofamiri èn taki sani e go bun nanga den. Kande den wani sabi tu fu san ede wi de na grontapu, san o pasa nanga grontapu na ini a ten di e kon, èn fu san ede Gado e gi pasi taki sma e pina. Efu wi e hori den sani disi na prakseri te wi e preiki a Kownukondre boskopu, dan sma o wani arki wi.—Odo 16:23.
7. Fa ala sma na ini a gemeente kan abi bun krakti tapu wan masra di no de na bribi èn di kon na wan konmakandra?
7 Du muiti fu yepi den masra di no de na bribi: A bun fasi fa wi Kresten sisa e tyari densrefi, nofo tron abi furu krakti tapu den masra di no de na bribi. Ma memre fu a gemeente kan abi bun krakti tapu den tu (1 Petr. 3:1-4). Te wan masra di no de na bribi e kon nanga en wefi na wan konmakandra, dan a kan abi furu krakti tapu en te trawan na ini a gemeente e sori en switifasi. A de di a masra de drape e sori kaba taki a wani sabi moro fu a tru bribi, èn kande a o wani studeri Bijbel.
8. Fa brada kan du muiti fu yepi den masra di no de na bribi èn di sori pikinso taki den wani sabi moro fu a tru bribi?
8 Na a tra sei, a kan de so taki na a bigin son masra no wani sabi moro fu Bijbel. Ma te fu kaba, den wani taki kande fu Bijbel nanga wan brada nanga suma den man taki bun. Wanwan leisi te den brada na ini wan gemeente ben e fisiti wan osofamiri pe a masra no de na bribi, dan den ben meki spesrutu muiti fu taki nanga en fu sani di a ben lobi. Te fu kaba, disi meki taki den ben e taki fu Bijbel, èn now a man disi dopu. Na wan tra presi, wan brada ben yepi wan masra di no de na bribi èn di abi switifasi, fu bow wan skotu lontu en oso. Fu di a brada ben yepi a man na a fasi disi, meki a man bigin studeri Bijbel (Gal. 6:10; Fil. 2:4). Efu yu na wan Kresten brada, dan fu san ede yu no e du muiti fu yepi wán noso moro fu den masra disi di no de na bribi?
9. San kan de a bakapisi te Kresten man e leri fu teki frantwortu?
9 Leri den Kresten man fu teki frantwortu: Den mansma di e arki a Kownukondre boskopu èn di e du muiti fu kisi frantwortu na ini na anbegi fu Yehovah, kan tron ’libisma di de leki presenti’. Iya, den kan tron Kresten owruman di e gebroiki den koni nanga den krakti gi a bun fu den gemeente fu a pipel fu Yehovah (Ef. 4:8; Ps. 68:18). Neleki skapuman, den man disi e sorgu gi a gemeente nanga prisiri èn den e angri fu du dati (1 Petr. 5:2, 3). Den e kon tron wan blesi gi ala brada nanga sisa!
10. Fa a muiti di Ananias ben meki fu yepi Paulus, tyari wini kon gi furu sma?
10 Fu eksempre, Saulus ben kon tron „wan apostel gi den trakondre sma”, aladi a ben frufolgu den Kresten fosi (Rom. 11:13). Na a bigin, a disipel Ananias no ben wani preiki gi Saulus fu a sani disi ede. Toku, Ananias ben gi yesi na Masra èn a ben taki nanga a man di ben kon tron na apostel Paulus. Na ini den yari baka dati, a diniwroko fu Paulus ben tyari wini kon gi den dusundusun sma di ben yere a boskopu di a ben preiki. Boiti dati, milyunmilyun sma e kisi wini te now ete, fu den brifi fu en di de na ini Gado Wortu.—Tori. 9:3-19; 2 Tim. 3:16, 17.
11. Fu san ede wi musu tyari iniwan kenki kon di de fanowdu fu gi kotoigi na mansma?
11 Fu dati ede, meki wi tyari iniwan kenki kon di de fanowdu, so taki wi kan gi kotoigi na den mansma. Te wi e du muiti ini a tori disi, dan wi kan de seiker taki Yehovah o blesi a tranga muiti di wi e meki fu du en wani èn fu sorgu gi Kownukondre afersi.