Yu kan yepi wan Kresten en trowpatna di no de na bribi?
1. Son Kresten na ini a gemeente abi wan trowpatna di no de na bribi, ma fu san ede a no den Kresten dati wawan wani yepi den trowpatna fu kon na ini a tru anbegi?
1 A de so taki son preikiman na ini yu gemeente abi wan masra, noso wan wefi di no de na bribi? A no de fu taki dati den preikiman disi wani taki den trowpatna kon na ini a tru anbegi tu. Ma a no den wawan wani dati. Neleki Gado, na so a heri gemeente wani taki „ala sortu sma musu kisi frulusu èn taki den musu kon sabi a waarheid soifri” (1 Tim. 2:4). Fa wi kan yepi den trowpatna fu den preikiman disi na ini wi gemeente?
2. Te wi abi a koni fu man si sani krin, dan fa dati o meki taki wi o man yepi wan trowpatna di no de na bribi?
2 A fosi sani di wi musu du, na fu pruberi fu frustan fa a trowpatna di no de na bribi e denki fu sani. Furu fu den sma disi lobi den famiri èn den e pruberi fu de wan bun trowpatna nanga wan bun papa noso mama. Kande den de fayafaya na ini wan tra bribi, èn den e leri sani di e difrenti fu san wi e leri. A kan de so taki den no sabi furu fu Yehovah Kotoigi, boiti den sani di mati fruteri den. Nofo tron den mati disi no sabi wi, noso den abi wan takru denki fu wi. Sonwan fu den trowpatna disi di no de na bribi, no lobi en taki den patna e gebroiki ten gi na anbegi, bika fosi den ben e gebroiki a ten dati gi na osofamiri. Te wi abi a koni fu man si sani krin, dan dati o yepi wi fu sori switifasi gi den trowpatna di no de na bribi. Boiti dati, wi o lespeki den èn wi no o fredefrede te wi de nanga den.—Odo 16:20-23.
3. San na a moro bun fasi fa wi kan wini wan trowpatna di no de na bribi?
3 Poti prakseri na a sma: Efu wi wani wini wan trowpatna di no de na bribi, dan wi no musu bigin taki fu Bijbel nanga en, ma a moro bun fu luku fa wi e tyari wisrefi (1 Petr. 3:1, 2). A de prenspari taki wi e poti prakseri na a sma. Sisa na ini a gemeente kan poti prakseri na wan wefi di no de na bribi, èn brada kan du a srefi nanga wan masra di no de na bribi. Fa wi kan du dati?
4. Fa wi kan poti prakseri na wan trowpatna di no de na bribi?
4 Efu yu no miti a trowpatna ete, dan kande yu kan taki fosi nanga a Kresten trowpatna fu en, fosi yu miti en. No firi fruferi efu na a bigin a gersi leki a trowpatna di no de na bribi, no e warderi a muiti di yu meki. Te wi e sori switifasi èn te wi e poti prakseri na en, dan dati kan meki taki a abi wan moro bun denki fu Yehovah Kotoigi (Rom. 12:20). Son lepi Kresten kari so wan trowpatna nanga en osofamiri kon nyan, so taki a kan kon sabi den moro bun èn so taki a kan kenki a fasi fa a ben e denki fu wi. Den taki fu sani di a trowpatna lobi, na presi fu de nomonomo fu taki fu Bijbel tori. Bakaten, te a trowpatna kon gwenti wi, dan kande wi kan taki fu Bijbel. Noso a o wani kon te wi kari en fu kon na wan fu den konmakandra fu wi, fu si san en wefi e leri, spesrutu te a sabi wan tu sma na ini a gemeente kaba. Srefi efu a no wani kon sabi moro fu a tru anbegi, toku a de fu prèise taki a e horibaka gi en trowpatna di de na bribi.
5. Fa owruman kan yepi wan trowpatna di no de na bribi?
5 Spesrutu den owruman musu du muiti fu yepi trowpatna di no de na bribi èn den musu suku okasi fu gi den kotoigi. Wan trowpatna di no wani taki fu Bijbel, kande o wani arki a deki-ati fu Bijbel, te a de na ati-oso noso te a e siki seryusu. Efu a de so taki na ini so wan osofamiri wan sani pasa, soleki te wan memre fu a famiri dede, dan den owruman kan kari a trowpatna di no de na bribi fu sidon nanga den te den owruman o trowstu a famiri.
6. Fu san ede wi musu yepi den trowpatna di no de na bribi?
6 Prakseri fa wan Kresten na ini wi gemeente o prisiri te a trowpatna fu en e arki a bun nyunsu èn e kon na ini a tru anbegi! So wan moi sani e meki Yehovah prisiri tu, èn sosrefi den engel nanga den tra sma na ini a gemeente (Luk. 15:7, 10). Ma efu a sma di no de na bribi no wani arki na a bigin, toku wi kan breiti fu di a muiti di wi e meki e plisi Yehovah, di „no wani nowan sma fu lasi libi, ma a wani taki ala sma musu kisi berow”.—2 Petr. 3:9.
[Prenspari pisi na tapu bladzijde 6]
Efu wi wani wini wan trowpatna di no de na bribi, dan wi no musu bigin taki fu Bijbel nanga en, ma a moro bun fu luku fa wi e tyari wisrefi