Preiki fayafaya!
1. Na sortu rai fu Paulus wi musu poti prakseri na ini a ten disi?
1 „Preiki a wortu, du disi fayafaya” (2 Tim. 4:2). Fu san ede a rai disi fu Paulus de so prenspari na ini a ten disi? Fa den wortu disi kan abi krakti tapu wi èn tapu tra sma?
2. Fu san ede wi e du muiti fayafaya fu suku sma di no yere a bun nyunsu ete?
2 A abi fu du nanga a libi fu sma: Milyunmilyun sma na heri grontapu musu yere a bun nyunsu ete, di kan meki den kisi frulusu (Rom. 10:13-15; 1 Tim. 4:16). Te now ete, wi e miti furu reti-ati sma na ini kontren di wroko furu kaba. Efu wi e preiki tapu difrenti dei noso na wan tra yuru fu a dei, dan wi kan miti difrenti sma. Te wi e du muiti fayafaya fu suku sma di no yere a bun nyunsu ete, dan wi o abi wan krin konsensi èn wi no o abi brudu paiman na wi tapu.—Tori. 20:26.
3. Fa wi kan gebroiki wi ten na wan bun fasi te wi de na ini a preikiwroko?
3 Aladi den Kresten fu a fosi yarihondro ben kisi hebi gens, toku ’den ben panya a leri fu den na ini heri Yerusalem’ (Tori. 5:28). Wi abi a fasti bosroiti tu fu gi „kotoigi finifini”? (Tori. 10:42) Wi e gebroiki wi ten na wan bun fasi te wi de na ini a preikiwroko? Efu wi e wakti aladi trawan e tyari gobaka, dan wi e teki na okasi fu taki nanga sma di e waka pasa?
4. Te wi e preiki fayafaya, dan fa dati e yepi wi fu tan na ai?
4 A e yepi wi fu de na ai: Fu di a kaba fu a sistema disi de krosibei, meki wi musu tan na ai (1 Tes. 5:1-6). Te wi e taki doronomo fu a Kownukondre howpu fu wi, dan wi e sorgu taki den sani fu a sistema disi no de leki wan hebi na wi tapu (Luk. 21:34-36). Te wi e hori a dei fu Yehovah „bun na prakseri”, dan dati e meki wi du moro na ini a preikiwroko di e kibri sma libi.—2 Petr. 3:11, 12.
5. Te wi abi lespeki gi a libi, dan fa dati e yepi wi fu du a preikiwroko?
5 Te wi e preiki fayafaya, dan wi e sori taki wi e si a libi soleki fa Yehovah e si en. Yehovah „no wani nowan sma fu lasi libi, ma a wani taki ala sma musu kisi berow” (2 Petr. 3:9; Esek. 33:11). Meki a de so taki wi abi a fasti bosroiti fu miti so furu sma leki wi man na ini a kontren fu wi. Disi o gi Yehovah glori!—Ps. 109:30.