Mi bun nofo fu preiki?
1. San o yepi wi fu no denki taki wi no bun nofo fu du a preikiwroko?
1 Efu yu aksi yusrefi a sani disi wan leisi, dan no lasi-ati, ma teki deki-ati! Wi no abi hei skoroleri fanowdu, noso wan spesrutu koni fu tron wan preikiman. Sma ben taki dati sonwan fu den fosi disipel ’no ben kisi furu skoro, ma den ben de neleki ala tra sma’. Toku den ben de bun preikiman fu a bun nyunsu, fu di den ben teki na eksempre fu Yesus.—Tori. 4:13; 1 Petr. 2:21.
2. San na wan tu fu den moi fasi fa Yesus ben e gi leri?
2 A fasi fa Yesus ben e gi leri: A fasi fa Yesus ben e gi leri ben makriki fu frustan. Den aksi di a ben poti gi sma, den agersitori di a ben fruteri, nanga den makriki sani di a ben e taki na a bigin fu wan takimakandra, ben hari a prakseri fu den arkiman fu en (Mat. 6:26). A ben sori trutru taki a ben e broko en ede nanga sma (Mat. 14:14). Boiti dati, Yesus ben taki nanga overtoigi, èn a ben sabi fu san a ben e taki, fu di na Yehovah ben gi en a wroko fu preiki èn a krakti fu du a diniwroko fu en.—Luk. 4:18.
3. Fa Yehovah e yepi wi fu du wi diniwroko?
3 Yehovah e yepi wi: Nanga yepi fu en Wortu èn en organisâsi, wi Gran Leriman e gi wi a leri di wi abi fanowdu fu tron bun preikiman fu a bun nyunsu (Yes. 54:13). Fu di Yehovah sorgu taki sma skrifi fu a fasi fa Yesus ben e gi leri, meki wi man ondrosuku den sani dati èn teki na eksempre fu en. Yehovah e gi wi en santa yeye èn a e gi wi leri na den gemeente konmakandra (Yoh. 14:26). Boiti dati, te wi e wroko makandra nanga preikiman di abi ondrofeni, dan wi kan leri fu den èn dati kan yepi wi fu tron moro bun preikiman.
4. Fa wi du sabi taki wi kan de bun nofo fu fruteri tra sma a bun nyunsu?
4 Wi kan de bun nofo fu du a preikiwroko, fu di na „Gado meki taki wi bun nofo” (2 Kor. 3:5). Te wi e frutrow tapu Yehovah èn wi e gebroiki ala sani di a seti gi wi na wan lobi-ati fasi, dan wi o de „bun dorodoro èn de srekasreka fu du ibri bun wroko”.—2 Tim. 3:17.