Soema koni nofo foe preiki?
1 Te a abi foe doe nanga a diniwroko, oiti joe firi leki Moses? A ben taki: „Gi mi pardon, Jehovah, ma mi no man taki boen, a no ben de so toe esrede èn na fesi èn a no de so toe foe sensi joe ben taki nanga joe foetoeboi” (Ex. 4:10). Efoe joe e firi na a fasi dati, dan kande joe e firi foe no preiki. Tokoe Jesus „ben komanderi wi foe preiki gi a pipel èn foe gi wan finifini kotoigi” (Tori. 10:42). So boen, fa wi e tron koni preikiman foe a boen njoensoe?
2 A no a grontapoe skoro di wi kisi e meki wi koni nofo gi a diniwroko. Paulus ben taki dati „a no ben kari foeroe koniman na skinfasi” èn taki „a koni foe a grontapoe disi na don sani gi Gado” (1 Kor. 1:26; 3:19). Jesus ben teki en apostel na mindri sma di e doe anoe-wroko — fo foe den ben de fisiman. Den relisi fesiman di abi bigifasi, ben si den leki wisiwasi sani, leki „sma di no kisi leri èn leki gewoon sma”. Te sma e kroetoe den akroederi grontapoe markitiki, dan den apostel no ben koni nofo foe preiki. Ma tokoe a kefalek boen taki di Petrus ben gi tapoe a dei foe a Pinksterfesa, ben boeweigi 3000 sma foe teki dopoe! — Tori. 2:14, 37-41; 4:13.
3 Jehovah e meki wi kon koni nofo foe preiki: Paulus ben froeklari: „Taki wi koni nofo, e kon foe Gado” (2 Kor. 3:5). Jehovah, a Fonten foe koni, leri miljoenmiljoen sma foe preiki Kownoekondre waarheid gi tra sma (Jes. 54:13). Den bakapisi nanga den froktoe foe a wroko disi de foe si na ini den 338.491 sma di ben teki dopoe a jari di pasa, leki libilibi „brifi di e rikomanderi den” (2 Kor. 3:1-3). Wi abi ala reide foe preiki sondro frede èn nanga overtoigi foe den sani di wi leri foe Jehovah.
4 Gado en organisâsi seti wan leri programa gi bedinari na heri grontapoe. Nanga jepi foe den Boekoe foe bijbel nanga foeroe difrenti jepisani foe studeri bijbel, wi e kisi skoro èn leri foe kon „koni dorodoro, de srekasreka dorodoro” foe preiki (2 Tim. 3:16, 17). A sabi di de foe feni na ini den poeblikâsi foe a Genootschap ben naki na ati foe foeroe sma. Foe eksempre, wan Sweidsi tijdschrift ben taki: „A sani di e horibaka gi a bribi di den Jehovah Kotoigi e preiki, na wan kefalek aparti hei leri di den abi foe bijbel na heri grontapoe.”
5 Nanga a tiri di wi e kisi na tapoe den feifi konmakandra di wi abi ala wiki, wi programa foe leisi bijbel èn foe studeri, èn a rai di wi e kisi na a theokrasia diniwroko-skoro, a persoonlijk jepi di tra sma e gi wi di de bedinari di abi ondrofeni, èn moro prenspari, a jepi foe a santa jeje foe Jehovah, wi kan abi na overtoigi taki Jehovah e si wi leki sma di koni dorodoro foe preiki. „Ija, leki sma di Gado seni, na ondro na ai foe Gado, makandra nanga Krestes, wi e taki.” — 2 Kor. 2:17.
6 Efoe dorodoro wi e teki winimarki foe a theokrasia leri di Gado e gi nanga jepi foe en organisâsi, dan wi no abi nowan reide foe tapoe noso foe frede. Nanga prisiri wi kan preiki gi tra sma, nanga a seikerfasi taki Jehovah sa blesi den moeiti foe wi. — 1 Kor. 3:6.