Yu meki yu karta kaba?
Sortu karta? A karta di nen Geneeskundige Wilsverklaring en machtiging. A karta disi na gi ala dopu Kotoigi. Fu di ’yu no sabi fa a libi fu yu sa de tamara’, meki a de tumusi prenspari taki yu e bosroiti na fesi sortu dresi nanga datrayepi yu sa teki te yu kisi mankeri noso te yu kon siki. Boiti dati yu musu skrifi den sani dati na tapu papira (Yak. 4:14; Tori. 15:28, 29). Fu yepi yu teki a bosroiti disi, meki a DVD Transfusiealternatieven—De behoeften en rechten van de patiënt, tyari kon na doro. Luku a DVD disi. Baka dati, begi fu a tori disi èn luku san yu leri nanga yepi fu den aksi di e kon now. Hori na prakseri: Fu di a video abi wan tu syatu pisi na ini pe datra e du oparâsi, meki papa nanga mama musu bosroiti efu den o luku a DVD disi makandra nanga den yongu pikin fu den.
(1) Fu san ede son datra e bigin denki tra fasi fu a gi di den e gi sma brudu? (2) Kari dri eksempre fu muilek oparâsi di datra du sondro fu gi brudu. (3) Omeni datra na heri grontapu taki dati den de klariklari fu yepi sikisma sondro fu gi den brudu? Fu san ede den de klariklari fu du disi? (4) Di sma du ondrosuku na ini wan tu ati-oso no so langa pasa, dan san disi tyari kon na krin fu sma di teki brudu? (5) San kan pasa nanga wan sma di e teki brudu? (6) San datra kon si fu den winimarki di sma e kisi te den e gebroiki tra dresi na presi fu brudu? (7) San e meki taki wan sma no abi nofo brudu, noso redi brudu-cel? O furu brudu noso redi brudu-cel wan sma musu abi fu man tan na libi? Sortu yepi de gi sma di no abi nofo brudu, noso redi brudu-cel? (8) San datra kan du so taki wan sma en skin kan meki moro redi brudu-cel? (9) San datra kan du fu meki taki sikisma no lasi tumusi furu brudu te den e du oparâsi? (10) A de so taki den dresi di sma e gebroiki na presi fu brudu, kan yepi yongu pikin, noso sikisma di de fu dede? (11) San na wán fu den moro prenspari gronprakseri di datra musu hori densrefi na en, te a abi fu du nanga bun datrayepi? (12) Fu san ede a de prenspari gi Kresten fu taki na fesi sortu datrayepi den wani, na presi fu teki brudu? Fa wi kan du disi?
A de na ibriwan sma fu bosroiti gi ensrefi efu a wani teki sonwan fu den datrayepi di de fu si na ini a DVD disi, èn a bosroiti di a o teki musu kruderi nanga a konsensi fu en soleki fa a leri na ini Bijbel. Yu de seiker fu a bosroiti di yu teki gi yusrefi èn gi den pikin fu yu, te a abi fu du nanga a datrayepi di yu sa teki na presi fu brudu? Efu yu wani sabi moro fu a tori disi, dan luku kapitel 7 fu a Gado lobi-buku nanga den tra sani di kari na ini a kapitel dati. Luku sosrefi na artikel di nen „Fa mi e prakseri fu den pikinpikin sani di sma e puru na ini brudu, èn fu datrayepi pe datra e gebroiki mi eigi brudu fu dresi mi?” Na artikel disi de na ini na inibere pisi fu Wi Kownukondre diniwroko fu november 2006. Te yu kaba, dan sorgu taki yu skrifi krin na tapu a karta sortu bosroiti yu teki. Meki yu datra nanga den famiriman fu yu di no de Kotoigi, sabi krin sortu bosroiti yu teki.
[Faki na tapu bladzijde 3]
• Yu bosroiti gi yusrefi èn gi den pikin fu yu, sortu datrayepi yu sa teki na presi fu brudu?
• Yu abi yu karta na yu di e sori krin sortu bosroiti yu teki efu wan sani pasa?