Yu sabi sortu tra datrayepi yu kan teki?
Na heri grontapu moro nanga moro ati-oso e du oparâsi sondro fu gebroiki brudu. Yu sabi na sortu tra fasi datra kan yepi yu sondro fu gebroiki brudu? Disi de fanowdu fu di yu musu sabi sortu bosroiti yu o teki te a abi fu du nanga a datrayepi di yu o teki èn te yu musu du wan oparâsi. Luku a DVD di nen Geen bloed—De geneeskunde kan de uitdaging aan. Baka dati, begi fu a tori disi èn luku san yu leri aladi yu e gebroiki den aksi di e kon now.—Hori na prakseri: A DVD disi abi wan tu syatu pisi na ini pe datra e du oparâsi. A de fanowdu taki papa nanga mama de na ai te den e luku a DVD disi makandra nanga den yongu pikin fu den.
(1) San na a moro prenspari reide fu san ede Yehovah Kotoigi no e teki brudu? (2) San Yehovah Kotoigi wani te den musu kisi datrayepi? (3) Sortu reti ala sikisma abi? (4) Fu san ede a de wan koni sani fu teki tra dresi na presi fu brudu èn fu san ede a fiti? (5) Te wan sma e lasi tumusi furu brudu, dan san na tu prenspari sani di datra musu du? (6) San na den fo prenspari markitiki di abi fu du nanga a dresi fu sma sondro brudu? (7) San datra kan du fu (a) sma no lasi tumusi furu brudu, (b) sma no lasi redi brudu-cel, (c) yepi a skin fu meki moro brudu, èn (d) fanga brudu di ben o lasi gowe? (8) Fruteri san na den datrayepi di nen (a) hemodilutie nanga, (b) cell-saver. (9) San yu musu sabi fu iniwan fu den datrayepi pe datra no e gebroiki brudu? (10) Datra kan du bigi èn muilek oparâsi sondro fu gi sma brudu? (11) Sortu bun sani e pasa na furu ati-oso?
Yusrefi musu teki a bosroiti efu yu sa teki den datrayepi di de fu si tapu a DVD. Yusrefi musu teki wan bosroiti di e kruderi nanga Bijbel èn nanga yu eigi konsensi. Yu bosroiti kaba sortu datrayepi yu o teki gi yusrefi èn gi yu pikin? Yu meki a karta fu yu kaba di e sori taki yu no e teki brudu? Efu yu wani kon sabi moro fu den tori disi, dan luku „Aksi fu leisiman” na ini A Waktitoren fu 15 yuni 2004, nanga a di fu 15 oktober 2000. Luku sosrefi na artikel di nen „Fa mi e prakseri fu den pikinpikin sani di sma e puru na ini brudu, èn fu datrayepi pe datra e gebroiki mi eigi brudu fu dresi mi?”, di de na ini na inibere pisi fu Wi Kownukondre diniwroko fu november 2006. Gebroiki na artikel disi fu bosroiti sortu datrayepi yu o teki èn sortuwan yu no o teki. Dan sorgu taki yu skrifi finifini na tapu yu karta sortu sani yu o teki. Fruteri yu datra nanga yu famiri di no de Kotoigi, finifini sortu bosroiti yu teki.
[Faki na tapu bladzijde 3]
• Yu bosroiti kaba sortu datrayepi yu o teki gi yusrefi èn gi yu pikin?
• Yu skrifi ala sani finifini na tapu yu karta di yu musu abi ala ten na yu, spesrutu te wan sani pasa?