Aksi fu Leisiman
Efu wi e prakseri den Bijbel komando di e sori san na a yoisti fasi fu gebroiki brudu, dan fa Yehovah Kotoigi e prakseri fu datra wroko pe den datra e gebroiki a brudu fu a sma srefi?
Na presi fu wan Kresten teki wan bosroiti nomo fu di na so en e firi fu a tori noso nomo fu di wan tu datra taigi en fu du dati, dan ibri Kresten musu poti seryusu prakseri na san Bijbel e taki. A de wan afersi fu en nanga Yehovah.
Yehovah gi wi a libi, èn Yehovah ben gi a komando taki libisma no musu gebroiki brudu (Genesis 9:3, 4). Na ini a Wet fu Israèl fu fositen, dan Gado no ben gi den pasi fu gebroiki brudu fa den wani, bika brudu ben teki presi gi a libi. Gado ben gi a komando: „A sili [noso a libi] fu a skin de na ini a brudu, èn mi ben gi en na unu na tapu na altari fu meki un sili kon bun baka.” Ma fa a ben de efu wan man ben kiri wan meti fu nyan? Gado ben taki: „A musu trowe a brudu fu en, èn tapu en nanga doti”a (Lefitikus 17:11, 13). Ibritron baka Yehovah ben gi a komando disi (Deuteronomium 12:16, 24; 15:23). A Dyu Soncino Chumash e taki: „A brudu no musu poti na wan sei fu gebroiki baka, ma den ben musu meki a tron wan sani di sma no man gebroiki moro, fu di den ben e trowe en na tapu a gron.” No wan fu den Israèlsma ben mag kibri brudu fu wan tra mekisani, èn gebroiki dati; a libi fu a tra mekisani ben de fu Gado.
A plekti di wan sma ben abi fu hori ensrefi na a Wet fu Moses, ben kaba di a Mesias dede. Toku, Gado e tan si a brudu leki wan santa sani ete. Nanga yepi fu Gado en santa yeye, den apostel ben sori den Kresten taki den ben ’musu tan farawe fu brudu’. Den no ben musu prakseri lekti fu a komando dati. Na a sei fu a libi di sma musu libi akruderi bun gwenti nanga gronprakseri, a komando dati ben prenspari neleki fa a ben de prenspari fu tan farawe fu seks hurudu noso afkodrei (Tori fu den Apostel 15:28, 29; 21:25). Di na ini a di fu 20 yarihondro a gi di sma ben gi brudu èn a teki di trawan ben teki brudu, ben tron wan gewoon sani, dan Yehovah Kotoigi ben frustan taki a sani disi no ben e kruderi nanga Gado Wortu.b
Wanwan leisi wan datra sa gi wan sma a tranga fu gi en eigi brudu, so taki den kan kibri a brudu dati wan tu wiki fosi na operâsi; èn efu den abi brudu fanowdu, dan den kan gebroiki a sikisma en eigi brudu di den ben kibri bun. Ma te den e puru a brudu disi, e kibri en na wan presi, èn baka dati e gi en baka na a sma, dan dati no e kruderi kwetikweti nanga den sani di skrifi na ini Lefitikus nanga Deuteronomium. Libisma no musu kibri brudu, den musu trowe en — dati wani taki dati den musu gi en baka na Gado, fu taki en so. A tru, taki a Wet fu Moses no abi krakti na ini a ten disi. Ma toku, Yehovah Kotoigi e lespeki den gronprakseri di Gado poti na ini a Wet dati; èn fu dati ede den abi a fasti bosroiti fu ’tan farawe fu brudu’. Fu dati ede wi no e gi brudu, èn wi no e kibri wi eigi brudu tu fu gebroiki dati na wan tra ten, bika a ’brudu musu trowe’. A sani dati di sma e du, no e kruderi nanga Gado en wet.
Tra sani di sma e du nanga a brudu fu wan sma srefi, no de so krin teige den gronprakseri fu Gado. Fu eksempre, furu Kresten e meki trawan teki wan pikinso brudu fu den, so taki den sma disi kan ondrosuku a brudu fu den, èn baka dati den e trowe a brudu disi. Tra moro muilek sani fu frustan di wan sma kan du nanga en eigi brudu, na sani so srefi di datra e taki dati a bun fu du.
Fu eksempre, na son oparâsi di datra e du, dan den kan meki pikinso brudu fu a sma lon go na ini wan apparaat di e hori a brudu, wan sani di datra e kari hemodilutie. Datra e moksi a brudu di e tan na ini a sikisma nanga wan tra sani so taki a krakti fu a brudu e broko. Baka ten, a brudu fu a sikisma di datra meki lon go dorosei fu en skin nanga yepi fu wan apparaat, e tyari go baka na ini en skin, èn na so a brudu e kon de baka leki fa a musu de. Na a srefi fasi, den kan fanga brudu di komoto fu wan soro, èn puru wan tu sani fu a brudu fu krin a brudu so taki den redi brudu-ai kan poti go baka na ini a skin fu a sikisma. Wan tra sani di datra kan du na taki den e meki a brudu fu wan sma lon go na ini wan masyin di e teki a wroko abra fu wan fu den sani inisei fu a skin (fu eksempre, fu na ati, fu den fokofoko, noso fu den niri). Baka dati, a brudu san ben go na ini a masyin, e drai go baka na ini a skin fu a sma. Wan tra sani di datra e du, na taki den e meki a brudu fu wan sma lon go na ini wan apparaat di e krin a brudu, so taki den kan puru sani di pori a brudu. Noso kande den wani puru wan spesrutu sani na ini a brudu èn gebroiki dati na wan tra presi na ini a skin. Wan tu sani de tu di datra e du, soleki fu puru pikinso brudu so taki den kan poti wan marki gi en noso den e moksi en nanga dresi, èn baka dati den e poti en go baka na ini a skin fu a sikisma.
Den finifini tori fa den datra e du disi kan difrenti, èn seiker den datra sa feni nyun fasi fu wroko nanga a brudu. Ma a no de na wi, fu go ondrosuku ibriwan fu den èn teki wan bosroiti ini a tori. Wan Kresten musu bosroiti gi ensrefi fa a sa gebroiki en eigi brudu te a musu kisi wan oparâsi, te datra musu ondrosuku en, noso te datra musu dresi en na wan fasi fa den e du dati nownow. Langa ten na fesi, a Kresten musu suku fu kon sabi fu a datra noso a tra sabiman, san den ben kan du trutru nanga en eigi brudu te den e du a wroko fu den fu dresi en. Baka dati, a Kresten srefi musu teki wan bosroiti akruderi en eigi konsensi. (Luku a boksu.)
Kresten musu hori na prakseri taki den gi densrefi abra na Gado èn taki den abi a plekti ’fu lobi en nanga den heri ati, den heri sili, ala den krakti, èn den heri frustan’ (Lukas 10:27). Heri tra fasi leki furu sma na ini grontapu, dan Yehovah Kotoigi e si a bun matifasi di den abi nanga Gado leki wan kefalek diri sani. A Sma di e gi libi e gi ala sma tranga fu poti frutrow na ini a brudu fu Yesus di en ben trowe. Wi e leisi: „Nanga yepi fu en [Yesus Krestes] wi abi a frulusu nanga a lusu-paiman di wi kisi nanga a brudu fu en, iya, a pardon di wi kisi fu den sondu fu wi.”—Efeisesma 1:7.
[Futuwortu]
a Professor Frank H. Gorman e skrifi: „A trowe di den ben trowe a brudu, na wan sani di wi kan frustan moro bun, efu wi e si dati leki wan fasi fu abi lespeki, a sori di sma e sori lespeki gi a libi fu a meti èn, na a fasi dati, e sori lespeki gi Gado; Gado ben meki a libi dati èn na en e tan sorgu gi a libi dati.”
b The Watchtower fu 1 yuli 1951, ben gi piki tapu prenspari aksi di abi fu du nanga a tori disi; èn drape a ben sori fu san ede a no ben fiti fu teki brudu fu wan tra sma.
[Faki/Prenki na tapu bladzijde 31]
SANI DI YU KAN AKSI YUSREFI
Kon meki wi taki dati pikinso brudu fu mi sa lon go dorosei fu mi skin nanga yepi fu wan apparaat. Kon meki wi taki dati den datra e tapu a brudu dati fu lon wan pisi ten nomo. Dan a de so taki mi konsensi e gi pasi meki mi si a brudu disi leki wan pisi fu mi ete? So bun, ’a brudu no musu trowe na tapu a gron’?
A ben sa de so taki nanga a leri di mi teki fu Bijbel, mi eigi konsensi kan fon mi te den e puru pikinso fu mi eigi brudu, krin a brudu, èn baka dati den poti en baka na ini mi eigi skin?