San na a moro bun datrayepi?
Dr. Michael Rose taki: „Te yu e luku en bun, dan ibri sikisma di e kisi datrayepi sondro brudu, e kisi a moro bun datrayepi di de”. A man disi na wan ati-oso driktoro èn wan anesthesist (wan datra di e meki den sikisma sribi te den e du oparâsi). Na sortu fasi datra kan yepi sma sondro brudu? Yu musu sabi den sani disi fu man teki wan bosroiti te yu musu kisi datrayepi èn te yu musu du wan oparâsi. Luku a video noso a DVD di nen: Geen bloed—De geneeskunde kan de uitdaging aan. Baka dati yu musu gebroiki den aksi di e kon now fu luku san yu frustan fu a tori disi. —Luku bun: A video disi abi wan tu syatu pisi na ini pe datra e du oparâsi. A de fanowdu taki papa nanga mama de na ai te den e luku a video disi makandra nanga den yongu pikin fu den.
(1) San na a moro prenspari reide fu san ede Yehovah Kotoigi no e teki brudu? (2) San Yehovah Kotoigi wani te den musu kisi datrayepi? (3) Sortu reti ala sikisma abi? (4) Fu san ede a de wan koni sani fu teki tra dresi na presi fu brudu èn fu san ede a fiti? (5) Te wan sma e lasi tumusi furu brudu, dan san na tu prenspari sani di datra musu du? (6) San na den fo prenspari markitiki di abi fu du nanga a dresi fu sma sondro brudu? (7) San datra kan du fu (a) sma no lasi tumusi furu brudu, (b) sma no lasi redi brudu-cel, (c) yepi a skin fu meki moro brudu, èn (d) fanga brudu di ben o lasi gowe? (8) Fruteri san na den datrayepi di nen (a) hemodilutie nanga, (b) cell-saver. (9) San yu musu sabi fu iniwan fu den datrayepi pe datra no e gebroiki brudu? (10) Datra kan du bigi èn muilek oparasi sondro fu gi sma brudu? (11) Sortu bun sani e pasa na furu ati-oso na ini furu kondre?
Yusrefi musu teki a bosroiti efu yu sa teki den datrayepi di de fu si na ini a video. Yusrefi musu teki wan bosroiti di e kruderi nanga Bijbel èn nanga yu eigi konsensi. Yu bosroiti kaba sortu datrayepi yu o teki gi yu nanga yu pikin? Den famiri fu yu di no de Kotoigi musu frustan krin sortu bosroiti yu teki èn fu san ede yu teki den bosroiti dati.—Luku „Aksi fu leisiman” na ini A Waktitoren fu 15 yuni 2004, nanga a di fu 15 oktober 2000.