Wan video di e poti prakseri na prenspari datrayepi di moro nanga moro sma wani
Afkati, krutuman nanga datra e poti prakseri moro nanga moro na a fasi fa sikisma e denki fu datrayepi, èn na den reti di sikisma abi. A sani disi e meki taki nyun fasi fu yepi èn fu dresi sikisma kon de, èn Yehovah Kotoigi kan kisi wini fu dati (Tori. 15:28, 29). Disi na a marki fu a video Transfusiealternatieven — De behoeften en rechten van de patiënt (Tra fasi fu dresi sondro brudu—Den sani di wan siki sma abi fanowdu èn den reti fu en). Luku a video, èn luku san yu leri. Wan prenspari sani: Fu di a video abi wan tu syatu pisi na ini pe datra e du oparâsi, meki papa nanga mama musu teki a bosroiti efu den wani taki den yongu pikin e luku a video disi makandra nanga den.
(1) Fu san ede son datra e bigin denki tra fasi fu a gi di den e gi sma brudu? (2) Kari dri eksempre fu muilek oparâsi di datra kan du sondro fu gi sma brudu. (3) Omeni datra na heri grontapu taki dati den de klariklari fu yepi sikisma sondro brudu? Fu san ede den de klariklari fu du disi? (4) San kon na krin no so langa pasa, di ati-oso ondrosuku omeni sma e gebroiki brudu? (5) San kan pasa nanga a gosontu fu wan sma te a kisi brudu? (6) San sabiman e taki fu den wini di sma e kisi te den e gebroiki tra dresi na presi fu brudu? (7) San e meki taki wan sma no abi nofo brudu, noso redi brudu-cel? O furu redi brudu-cel wan sma musu abi fu man tan na libi? Sortu yepi de gi sma di no abi nofo brudu, noso redi brudu-cel? (8) San musu pasa so taki a skin fu wan siki sma kan meki moro redi brudu-cel? (9) San datra kan du fu meki taki sikisma no lasi tumusi furu brudu te den e du oparâsi? (10) A de so taki den dresi di sma e gebroiki na presi fu brudu, kan yepi yongu pikin, noso sikisma di de fu dede? (11) San na wan fu den moro prenspari gronprakseri di e sori san na bun datrayepi? (12) Fu san ede a de prenspari gi wan Kresten fu taki na fesi sortu datrayepi a wani, na presi fu teki brudu? Fa wi kan du disi?
Te wi wani den datrayepi di kon na fesi na ini a video disi, dan ibriwan sma musu teki en eigi bosroiti akruderi en eigi konsensi èn nanga yepi fu Bijbel. Yu teki a bosroiti kaba gi yusrefi èn gi den pikin fu yu sortu datrayepi yu sa teki na presi fu brudu? Den famiriman fu yu di no de Kotoigi musu sabi krinkrin sortu bosroiti yu teki, èn den musu sabi sosrefi fu san ede yu teki den bosroiti dati.—Luku „Aksi fu leisiman” na ini A Waktitoren fu 15 yuni 2004, nanga a di fu 15 oktober 2000.