De wan yepi gi a sma di e preiki makandra nanga yu
1. Sortu wini a abi te wi e wroko makandra nanga wan sma na ini a preikiwroko?
1 Na wan okasi, Yesus ben seni 70 disipel fu go preiki, èn a „seni den tu na tu” (Luk. 10:1). A no de fu taki dati a seti disi meki taki den disipel ben man yepi makandra èn gi makandra deki-ati te den ben e preiki. Te wi e wroko makandra nanga wan tra preikiman na ini a preikiwroko, dan fa wi kan de wan yepi gi en?
2. Te a preikiman di e wroko nanga yu e taki, dan fa wi musu arki èn fu san ede wi musu du dati?
2 Te wi e arki: Arki bun te a preikiman di e wroko nanga yu e taki nanga wan ososma (Yak. 1:19). Efu a e leisi wan tekst, dan yu kan luku na ini yu Bijbel. Luku a sma di e taki, awansi na a patna fu yu, noso na a ososma. Efu yu e arki a takimakandra bun, dan disi kan gi na ososma deki-ati fu du a srefi.
3. O ten a ben o bun taki a preikiman di e wroko makandra nanga yu, e kon na ini a takimakandra?
3 Sabi o ten yu musu taki wan sani: Te wi e wroko nanga wan sma na ini a preikiwroko èn a sma e taki, dan wi e sori lespeki gi en te wi e gi en na okasi fu taki (Rom. 12:10). Wi musu luku bun taki wi no e koti en mofo. Efu a frigiti san a wani taki, noso efu na ososma no e agri nanga wan sani, noso a e poti wan aksi, dan kande a preikiman wani taki wi yepi en. Dan wi kan du muiti fu taki moro fara fu san a preikiman ben taki, na presi fu bigin taki fu wan tra tori (Odo 16:23; Preik. 3:1, 7). Den sani di wi o taki musu horibaka gi den sani di wi patna ben taki.—1 Kor. 14:8.
4. San sa yepi wi fu abi moro prisiri èn moro bun bakapisi na ini a preikiwroko?
4 Di den 70 disipel di ben go tu na tu, kaba preiki, dan den „drai kon baka nanga prisiri” (Luk. 10:17). Wi sosrefi sa abi prisiri èn bun bakapisi na ini a preikiwroko te wi e arki èn te wi sabi o ten wi musu taki wan sani fu yepi den wan di e wroko oso fu oso nanga wi.