Fa wi kan yepi makandra te wi de na ini a preikiwroko?

1. Fa wi kan teki na eksempre fu na apostel Paulus te wi e du a preikiwroko nanga wan tra preikiman?

¹ Na apostel Paulus ben si a ten te a ben de nanga den tra Kresten leki wan okasi fu „gi makandra deki-ati” (Rom. 1:12). Te yu e du a preikiwroko nanga wan tra preikiman, dan yu e gebroiki a ten dati fu gi en deki-ati èn fu yepi en? Na presi fu no taki noti, yu kan fruteri en san yepi yu fu de wan bun preikiman.

2. San wi kan du fu yepi a tra preikiman fu abi moro deki-ati, èn fu san ede a sani disi prenspari?

² Gi en deki-ati: Son preikiman e frede te den e du a preikiwroko èn son leisi yu kan si dati na den fesi noso na a sten fu den. Te wi e prèise den komoto fu wi ati, dan wi e gi den deki-ati. San na wan tu tra fasi fa wi kan gi den deki-ati? Wan kring-opziener lobi taigi a sma nanga suma a e preiki, taki ensrefi ben e frede èn taki a gwenti begi Yehovah fu no frede moro. Wan tra brada e taki san yepi en fu abi deki-ati: „A bun fu lafu nanga na ososma. Son leisi mi musu begi Yehovah fu man lafu nanga a sma.” Fruteri a sma nanga suma yu e preiki san ben yepi yu fu abi moro deki-ati te yu e du a diniwroko.

3. San wi kan fruteri a tra preikiman fu yepi en fu abi moro bun bakapisi na ini en diniwroko?

³ Fruteri trawan san yu e du: A sani di yu e taki na a bigin noso na aksi di yu poti, yepi yu fu abi wan bun takimakandra? Yu ben man gebroiki wan sani di pasa na ini a kontren fu yu fu bigin wan takimakandra? Yu ben man gebroiki wan eksempre di e sori fa fu prati den publikâsi èn fiti dati na a ososma? Fruteri a tra preikiman den sani di yu ben du èn sortu bun bakapisi dati ben abi (Odo 27:17). Te unu e go na wan gobaka, dan yu kan fruteri a tra preikiman sortu marki yu wani doro èn fa yu o du dati. Baka te yu kaba studeri nanga wan Bijbelstudie, dan yu kan fruteri a tra preikiman fu san ede yu ben taki fu wan spesrutu penti noso tekst èn fu san ede yu ben gi leri na a fasi dati fu yepi a studenti.

4. Fu san ede wi musu wani yepi tra preikiman?

⁴ Den preikiman na ini a fosi yarihondro no ben wani yepi soso den sma di no ben de na bribi. Den ben sabi tu taki a de prenspari fu gi makandra krakti nanga deki-ati (Tori 11:23; 15:32). Na apostel Paulus ben gi leri na a yonguman Timoteyus, èn a gi Timoteyus deki-ati fu fruteri tra sma san a leri (2 Tim. 2:2). Te wi no e frigiti fu du bun gi tra Kotoigi na ini a diniwroko, dan wi no e yepi den wawan fu abi moro prisiri èn fu abi bun bakapisi na ini a diniwroko, ma wi e prisiri wi hemel Tata tu.​—Hebr. 13:15, 16.