Yu e du ala san yu man fu kisi leri fu Yehovah?

1. Fa Yehovah e denki fu a leri di sma musu kisi?

¹ Yehovah, wi „Gran Leriman” wani taki wi kisi leri (Yes. 30:20). A ben bigin gi leri di a meki en fosi Manpikin (Yoh. 8:28). Baka di Adam ben opo ensrefi teige Yehovah, Gado no ben tapu fu gi leri, ma na wan lobi-ati fasi a ben gi leri na sondu libisma.​—Yes. 48:17, 18; 2 Tim. 3:14, 15.

2. Sortu bigi leriwroko e du nownow?

² Na ini a ten disi, Yehovah e tiri a moro bigi leriwroko di du oiti na grontapu. Soleki fa Yesaya ben taki na fesi, dan milyunmilyun sma na heri grontapu e go na a agersi „bergi fu na oso fu Yehovah” (Yes. 2:2). Fu san ede den e go drape? Fu di den o leri sabi den pasi fu Gado, sobun den o kisi leri fu Yehovah! (Yes. 2:3) Na ini a dienstyari 2010, Yehovah Kotoigi gebroiki moro leki 1,6 milyard yuru fu preiki gi sma èn fu leri den sma disi den tru tori fu Bijbel. Boiti dati, ibri wiki sma e kisi leri fu Bijbel na ini moro leki 105.000 gemeente na heri grontapu, èn a koni srafu di de fu frutrow e meki Kresten publikâsi di e leri wi furu sani, na ini moro leki 500 tongo.

3. Fa yusrefi kisi wini fu den leri di wi e kisi fu Yehovah?

³ Kisi furu wini fu a leri fu Gado: Wi e kisi furu wini fu den leri di wi e kisi fu Gado! Wi leri taki Gado abi wan nen èn taki a e broko en ede nanga wi (Ps. 83:18; 1 Petr. 5:6, 7). Wi kon sabi den piki tapu den moro prenspari aksi fu a libi: Fu san ede sma e pina èn dede? Fa mi kan de koloku trutru? Fu san ede wi de na libi? Yehovah leri wi tu fa wi musu tyari wisrefi so taki ’sani waka bun nanga wi’.​—Yos. 1:8.

4. San na wan tu spesrutu leri di futuboi fu Gado kan kisi, èn fu san ede wi musu du ala san wi man fu kisi leri fu Yehovah?

⁴ Boiti dati, Yehovah sreka spesrutu leri fu yepi furu fu den futuboi fu en fu du moro gi en na ini a diniwroko. Bladzijde 4-6 e taki fu skoro pe son sma kan go. Wi e du ala san wi man fu teki den leri fu Gado di wi man kisi, srefi efu a situwâsi fu wi e tapu wi fu teki den leri di kari tapu den bladzijde dati? Wi e gi yonguwan di e kisi rai furu tron fu teki den moro hei skoroleri fu grontapu, a deki-ati fu poti marki di den kan doro na ini a tru anbegi èn fu teki a leri fu Gado di de a moro hei leri di de? Te wi e du ala san wi man fu kisi leri fu Yehovah, dan wi o abi wan koloku libi nownow kaba èn wi o libi fu têgo na ini a ten di e kon.​—Ps. 119:105; Yoh. 17:3.

Wan tu spesrutu leri di sma kan kisi na ini na organisâsi fu Yehovah

Leri leisi nanga skrifi skoro

• A marki fu a skoro: Fu leri sma fa fu leisi èn skrifi so taki densrefi kan leisi èn studeri Bijbel èn leri sma den tru tori fu Bijbel.

• O langa a e hori: Solanga a de fanowdu.

• A presi pe a e hori: A Kownukondre zaal fu wan gemeente.

• Suma kan go: Ala preikiman nanga sma di wani sabi moro fu Bijbel.

• Suma e seti en: Gemeente owruman kan seti den leri leisi nanga skrifi skoro te dati de fanowdu, èn den e gi ibri sma di man, a deki-ati fu go na a skoro disi.

Theokrasia Diniwroko-skoro

• A marki fu a skoro: Fu leri den preikiman fu preiki moro bun èn fu sori den fa den kan leri trawan a bun nyunsu.

• O langa a e hori: Doronomo.

• A presi pe a e hori: A Kownukondre zaal fu wan gemeente.

• Suma kan go: Ala preikiman. Sosrefi tra sma di e kon na den konmakandra doronomo, di e bribi den leri fu Bijbel, nanga den wan di e libi leki wan Kresten.

• Fa yu kan teki prati: Taki nanga a skoro-opziener.

Skoro fu leri tra tongo

• A marki fu a skoro: Fu leri preikiman fa fu preiki a bun nyunsu gi sma na ini tra tongo.

• O langa a e hori: Fo noso feifi mun. Furu tron a e hori wán noso tu yuru langa tapu satra mamanten.

• A presi pe a e hori: Moro furu a e hori na wan Kownukondre zaal di de krosibei.

• Suma kan go: Preikiman di abi wan bun nen èn di wani preiki na ini wan tra tongo.

• Suma e seti en: A bijkantoro e seti den skoro disi te a de fanowdu.

Bow Kownukondre zaal

• A marki fu en: Fu bow èn sreka Kownukondre zaal. Disi a no wan skoro, ma dyaso friwani wrokoman e leri difrenti sortu wroko, so taki den kan yepi bow.

• O langa a e teki: Solanga a friwani wrokoman man du dati.

• A presi: Ala presi pe a Bowkomte kisi a wroko fu bow. Son friwani wrokoman kan kisi a kari fu go yepi na wan moro farawe presi pe wan rampu pasa.

• Suma kan go: Brada nanga sisa di dopu èn di den owruman fu a gemeente feni bun. Den kan de sma di sabi bow noso di no sabi bow.

• Fa yu kan teki prati: Gebroiki a Vragenlijst voor vrijwillige werkers aan de bouw van Koninkrijkszalen (S-82) (Formulier gi friwani wrokoman fu bow Kownukondre zaal) di yu kan kisi fu yu gemeente owruman.

Pionierskoro

• A marki fu a skoro: Fu yepi den pionier fu ’du den wroko finifini’.​—2 Tim. 4:5.

• O langa a e hori: Tu wiki.

• A presi pe a e hori: A bijkantoro e taki pe a o hori. Moro furu a e hori na wan Kownukondre zaal di de krosibei.

• Suma kan go: Den wan di de gewoon pionier moro leki wán yari kaba.

• Fa den kan teki prati: Den pionier di doro den markitiki kan go na a skoro èn den no abi fu gi den nen. Na a kring-opziener e seni boskopu gi den.

Skoro gi nyun sma na Betel

• A marki fu a skoro: A skoro disi seti gi nyun sma di kon na Betel, so taki den kan du a Betelwroko fu den na wan bun fasi.

• O langa a e hori: Tin na siksi wiki langa, wán yuru ibri wiki.

• A presi pe a e hori: Betel.

• Suma kan go: A sma musu de wan memre fu a Betelfamiri noso a musu dini langa ten leki yepiman na Betel (wán yari noso moro langa).

• Fa den kan teki prati: Memre fu a Betelfamiri di doro den markitiki e go na a skoro disi.

Kownukondre Diniwroko-skoro

• A marki fu a skoro: Fu leri owruman nanga dinari ini a diniwroko fa den musu teki fesi èn fa den musu tyari den frantwortu di den kisi na ini na organisâsi (Tori 20:28). A skoro disi e hori ibri leisi baka wan tu yari èn na a Tiri Skin e taki o ten a o hori.

• O langa a e hori: Na ini a ten disi a e hori wán nanga afu dei gi den owruman, èn wán dei gi den dinari ini a diniwroko.

• A presi pe a e hori: Moro furu a e hori na wan Kownukondre zaal di de krosibei noso na wan kringhal.

• Suma kan go: Soso owruman nanga dinari ini a diniwroko.

• Fa den kan teki prati: Owruman nanga dinari ini a diniwroko di doro den markitiki e kisi wan kari fu a kring-opziener.

Skoro gi Gemeente owruman

• A marki fu a skoro: Fu yepi den owruman fu tyari den frantwortu fu den na ini a gemeente.

• O langa a e hori: Feifi dei.

• A presi pe a e hori: Na a bijkantoro e taki pe a o hori. Moro furu a e hori na wan Kownukondre zaal di de krosibei noso na wan kringhal.

• Suma kan go: Den wan di de owruman.

• Fa den kan teki prati: Owruman di doro den markitiki e kisi wan kari fu a bijkantoro.

Skoro gi kring-opziener nanga distrikt-opziener nanga den wefi fu den

• A marki fu a skoro: Fu yepi den kring-opziener nanga den distrikt-opziener fu dini den gemeente moro bun, fu „wroko tranga fu taki fu a wortu fu Gado èn fu leri sma a wortu dati” èn fu luku den skapu di Gado gi den fu sorgu.​—1 Tim. 5:17; 1 Petr. 5:2, 3.

• O langa a e hori: Tu mun.

• A presi pe a e hori: Na a bijkantoro e taki pe a o hori.

• Suma kan go: Kring-opziener nanga distrikt-opziener.

• Fa den kan teki prati: Kring-opziener nanga distrikt-opziener di doro den markitiki makandra nanga den wefi fu den e kisi wan kari fu a bijkantoro.

Bijbelskoro gi brada di no trow

• A marki fu a skoro: Fu sreka owruman nanga dinari ini a diniwroko di no trow so taki den kan kisi moro frantwortu. Moro furu fu den brada disi di klari a skoro o kisi a frantwortu fu dini na ini den eigi kondre pe yepi de fanowdu. Wan tu fu den kan kisi a frantwortu fu dini na ini wan tra kondre, efu den ben taigi a bijkantoro taki den de klariklari fu du dati.

• O langa a e hori: Tu mun.

• A presi pe a e hori: Na a bijkantoro e taki pe a o hori. Moro furu a e hori na wan kringhal noso na wan Kownukondre zaal.

• Suma kan go: Brada di no trow, di pasa 23 yari èn di no owru moro leki 62 yari. Den musu abi wan bun gosontu èn den musu wani dini den brada nanga sisa èn horibaka gi a Kownukondre wroko, awansi pe yepi de fanowdu (Mark. 10:29, 30). Den musu dini leki owruman noso dinari ini a diniwroko tu yari baka makandra noso moro langa.

• Fa yu kan teki prati: Efu a bijkantoro fu yu e hori a skoro disi, dan den o hori wan konmakandra na a kring konmakandra. Yu o kisi moro bodoi na a konmakandra dati.

Bijbelskoro gi Kresten trowpaar

• A marki fu a skoro: A skoro disi e gi trowpaar spesrutu leri, so taki Yehovah nanga na organisâsi fu en kan gebroiki den moro bun. Moro furu fu den trowpaar disi di klari a skoro o kisi a frantwortu fu dini na ini den eigi kondre pe yepi de fanowdu. Wan tu fu den kan kisi a frantwortu fu dini na ini wan tra kondre, efu den ben taigi a bijkantoro taki den de klariklari fu du dati.

• O langa a e hori: Tu mun.

• A presi pe a e hori: Den fosi tu skoro e hori na a Waktitoren Skoro Centrum na ini Patterson, New York, Amerkankondre. Baka dati, den bijkantoro o taki pe den skoro disi o hori. Moro furu a o hori na wan kringhal noso na wan Kownukondre zaal.

• Suma kan go: Trowpaar di pasa 25 yari, ma di no doro 50 yari ete. Den musu abi wan bun gosontu èn den musu man dini awansi pe yepi de fanowdu. Den musu abi a denki leki Yesaya di ben taki: „Dya mi de! Seni mi” (Yes. 6:8). Sosrefi, den musu trow tu yari kaba, èn tu yari baka makandra den musu de na ini a furuten diniwroko.

• Fa yu kan teki prati: Efu a bijkantoro fu yu e hori a skoro disi, dan den o hori wan konmakandra na a spesrutu dei konmakandra. Yu o kisi moro bodoi na a konmakandra dati.

Waktitoren Bijbelskoro Gilead

• A marki fu a skoro: Fu leri pionier nanga tra furuten dinari fu du zendelingwroko.

• O langa a e hori: Feifi mun.

• A presi pe a e hori: Waktitoren Skoro Centrum na ini Patterson, New York, Amerkankondre.

• Suma kan go: Te trowpaar o gi a formulier fu den, dan den musu dopu dri yari kaba, den no musu yongu moro 21 yari èn den no musu owru moro 38 yari. Den musu man taki Ingrisitongo, den musu trow tu yari kaba, èn tu yari baka makandra den musu de na ini a furuten diniwroko. Den musu abi wan bun gosontu. Pionier di e dini na ini wan tra kondre (sosrefi den wan di den e si leki zendeling), kring-opziener nanga distrikt-opziener, brada nanga sisa di e wroko na Betel, den wan di ben go kaba na a Dinariskoro, na a Bijbelskoro gi brada di no trow, noso na a Bijbelskoro gi Kresten trowpaar, kan gi den nen tu efu den doro den markitiki.

• Fa yu kan teki prati: Son bijkantoro e hori wan konmakandra na a ten fu a kongres gi den wan di wani go na a skoro disi. Yu o kisi moro bodoi na a konmakandra dati. Efu a konmakandra no e hori na ini yu kondre te a kongres de, dan yu kan skrifi go na yu bijkantoro efu yu wani sabi moro.

Skoro gi brada fu Bijkantoro Komte nanga den wefi fu den

• A marki fu a skoro: Fu yepi den brada fu a Bijkantoro Komte so taki den kan teki fesi moro bun na den Betel oso, fu poti prakseri na sani di abi fu du nanga a preikiwroko fu den gemeente, fu luku fa den kring-opziener nanga distrikt-opziener e du a wroko fu den, fu sorgu gi a vertaal wroko, a wroko fu druk èn fu seni den publikâsi go na den gemeente, èn fu sorgu gi den tra afdeling na Betel.​—Luk. 12:48b.

• O langa a e hori: Tu mun.

• A presi pe a e hori: Waktitoren Skoro Centrum na ini Patterson, New York, Amerkankondre.

• Suma kan go: Den memre fu den Bijkantoro Komte noso den Kondre Komte, noso wan sma di kisi so wan frantwortu.

• Fa den kan teki prati: Den brada di doro den markitiki makandra nanga den wefi fu den, e kisi wan kari fu a Tiri Skin.

[Futuwortu]

Nownow a skoro disi no e hori na ini ibri kondre.

Nownow a skoro disi no e hori na ini ibri kondre.

Nownow a skoro disi no e hori na ini ibri kondre.

Nownow a skoro disi no e hori na ini ibri kondre.