A spesrutu wroko fu kari sma kon na a Memrefesa o bigin tapu 17 maart
1. Sortu spesrutu wroko o bigin tapu 17 maart?
1 A Memrefesa di wi e hori ibri yari na fu meki sma sabi fu a dede fu Yesus (1 Kor. 11:26). Fu dati ede wi wani taki trawan kon nanga wi fu arki fa Yehovah sori lobi gi wi di a gi wi a lusu-paiman (Yoh. 3:16). A yari disi, tapu satra 17 maart, wi o bigin du a spesrutu wroko fu kari sma kon na a Memrefesa. Yu e angri fu du so furu leki yu man na ini a wroko disi?
2. San wi kan taki te wi e gi sma wan kari?
2 San wi kan taki: A moro bun fu no taki langa nanga na ososma. Wi kan taki: „Fa a e go? Wi de dyaso fu gi yu osofamiri a kari disi gi wan prenspari konmakandra di e hori ibri yari. A konmakandra disi o hori na heri grontapu tapu 5 april. Wan Bijbel lezing o hori di o sori san wi kan kisi fu di Yesus dede gi wi èn san Yesus e du now. Yu no abi fu gi moni te yu kon na a konmakandra. Na tapu a papira disi yu kan leisi pe èn o lati a konmakandra disi o hori na ini a birti fu wi.” Te wi e prati den papira tapu satra nanga sonde, dan wi musu pristeri den tijdschrift tu te dati fiti.
3. Fa wi kan kari so furu sma leki wi man fu kon na a Memrefesa?
3 Kari so furu sma leki yu man: Wi wani kari so furu sma leki wi man. Fu dati ede, sorgu taki yu kari yu Bijbelstudenti, den gobaka fu yu, yu famiri, sma na wrokope nanga skoro, birtisma èn tra sma di yu sabi. Den owruman fu a gemeente o fruteri unu fa fu wroko a heri kontren. Na alayari wroko disi di wi e du fu kari sma kon na a Memrefesa, abi bun bakapisi. A yari di pasa, wan uma ben waka kon na ini a presi pe a konmakandra ben hori, èn wan fu den dienst-yepiman ben wani yepi en fu feni a preikiman di gi en wan kari. Ma na uma ben taki dati a no ben sabi nowan sma drape èn taki a ben kisi a kari fu wan sma di ben e go oso fu oso a srefi dei dati.
4. Fu san ede wi musu teki prati fayafaya na a spesrutu wroko fu kari sma kon na a Memrefesa?
4 Kande wan sma di yu gi wan kari sa kon na a Memrefesa. Awansi wan sma di yu kari, no kon, toku a muiti di yu o meki o de wan kotoigi kaba. Nanga den kari di yu o prati, yu o sori sma taki Yesus na wan makti Kownu now. Te yu e teki prati fayafaya na a wroko disi, dan yu o sori ala den sma na ini a kontren, den tra preikiman, èn san moro prenspari, yu o sori Yehovah taki yu trutru e warderi a seti fu a lusu-paiman.—Kol. 3:15.