San e gi yu „prisiri”?
1. San e gi wi prisiri na a kaba fu ibri mun?
1 San e gi yu „prisiri” na a kaba fu a mun te wi musu gi wi preikiwroko raportu? (Gal. 6:4) Awinsi wi na spesrutu pionier di wroko 130 yuru na ini a diniwroko, noso wi na preikiman di abi primisi fu skrifi taki wi wroko 15 miniti noso moro furu, toku wi alamala musu prisiri taki wi dini Yehovah nanga wi heri ati.—Ps. 100:2.
2. Fu san ede wi musu meki tranga muiti te wi e du a diniwroko fu Yehovah?
2 Fu di Yehovah na a Moro Heiwan fu hemel nanga grontapu, meki wi musu gi en den moro bun sani di wi abi (Mal. 1:6). Fu di wi lobi en meki wi gi wisrefi abra na en fu du en wani. Sobun, te wi de seiker na a kaba fu wan dei noso na a kaba fu a mun taki wi gi a moro bun pisi fu wi ten, a koni fu wi, nanga a krakti fu wi na ini a diniwroko fu Yehovah, dan ibriwan fu wi abi reide fu prisiri (Odo 3:9). Ma efu wi konsensi e taigi wi taki wi ben kan du moro furu, dan wi musu luku san wi ben kan du moro bun.—Rom. 2:15.
3. Fu san ede a no de wan koni sani fu teki wisrefi gersi nanga tra sma?
3 ’Wi no musu teki wisrefi gersi nanga tra sma’: A no de wan koni sani fu teki wisrefi gersi nanga tra sma, noso nanga wisrefi di wi ben de moro tranga. A situwâsi fu wi kan kenki. A no ala sma sabi du sani a srefi. Te wi e teki wisrefi gersi nanga makandra, dan dati o meki taki wi o strei nanga makandra, noso wi o firi leki wi no bun nofo (Gal. 5:26; 6:4). Yesus no ben teki sma gersi nanga makandra. Na presi fu dati, a ben prèise wan sma gi san a sma dati srefi ben man du.—Mark. 14:6-9.
4. Sortu prenspari sani wi kan leri fu na agersitori di Yesus ben fruteri fu den talenti?
4 Na ini na agersitori di Yesus ben fruteri fu den talenti, ibri wrokoman ben kisi talenti fu a masra „fu di a ben sabi san ibriwan fu den ben man du” (Mat. 25:15). Di a masra drai kon baka èn a ben aksi den san den du nanga den talenti, dan den wan di ben wroko fayafaya fu di den ben du san den ben man, ben kisi prèise èn a masra ben prisiri nanga den (Mat. 25:21, 23). Te wi e preiki a Kownukondre boskopu fayafaya, dan wi kan de seiker taki Gado o feni wi bun èn wi o abi reide fu prisiri!