„Libi bun nanga ala sma”
1. Sortu rai fu Bijbel wi musu fiti te wi e miti ososma di e atibron?
1 A pipel fu Yehovah lobi freide èn a diniwroko fu wi e taki fu wan ten te ala sma o libi na ini freide (Yes. 52:7). Ma son leisi wi e miti sma di atibron fu di wi kon na den oso. San o yepi wi na ini den situwâsi dati fu sori taki wi wani libi bun nanga ala sma?—Rom. 12:18.
2. Fu san ede a de prenspari fu frustan a situwâsi fu sma?
2 Frustan a situwâsi fu sma: Son sma ati kan bron fu di den no wani yere a tru leri. Trawan kan atibron, no fu di den no wani arki a boskopu fu wi, ma fu di wan tra sani pasa nanga den. Kande wi no go na den na a yoisti ten. A kan taki na ososma atibron fu di a abi problema. Srefi efu a sma e atibron fu di a no wani arki a bun nyunsu, toku wi musu hori na prakseri taki kande a e atibron fu di sma kori en (2 Kor. 4:4). Te wi e frustan disi, dan dati o yepi wi fu tan sori switifasi èn fu frustan taki a sma no e atibron tapu wi.—Odo 19:11.
3. Fa wi kan sori lespeki gi na ososma?
3 Sori trawan lespeki: Furu sma na ini a kontren fu wi e hori nomonomo na san den e bribi (2 Kor. 10:4). Den abi a reti fu bosroiti efu den wani arki noso efu den no wani arki. Noiti wi wani krutu a bribi fu wan ososma, noso meki a firi taki wi sabi Bijbel moro en. Efu a taigi wi fu gowe, dan wi musu gowe.
4. San a wani taki fu taki nanga sma na wan switi fasi?
4 Taki na wan switi fasi: Srefi efu den e taki takru sani fu wi, dan toku wi musu tan sori switifasi (Kol. 4:6; 1 Petr. 2:23). Na presi taki wi e suku fu haritaki nanga a sma, wi musu pruberi fu kon sabi sortu sani yu nanga na ososma e agri. Kande wi kan aksi na ososma na wan switi fasi fu san ede a no e agri nanga wi. Ma fu no meki a sma kisi atibron, dan son leisi a moro bun fu no taki go doro nanga en.—Odo 9:7; 17:14.
5. Sortu bun bakapisi a abi te wi e sori na ini a diniwroko taki wi lobi freide?
5 Kande na ososma no o frigiti wi fu di wi ben taki na wan switi fasi, èn kande a o arki tra leisi te wan tra sma o preiki gi en (Rom. 12:20, 21). Srefi efu a gersi leki a no wani arki kwetikweti, toku wán dei a kan tron wi brada (Gal. 1:13, 14). Awansi a sma no wani sabi noti fu a tru anbegi, toku wi o gi grani na Yehovah èn wi o moi a leri fu en te wi e hori wisrefi fu no atibron èn te wi e sori taki wi lobi freide.—2 Kor. 6:3.