Abi deki-ati èn de wan sma di lobi vrede tu
1 Furu sma di wi e preiki gi, e bribi sani di no e kruderi nanga Bijbel. Aladi wi musu du a preikiwroko sondro frede, wi wani de sma tu di e „libi na ini vrede nanga ala sma” èn wi no wani afrontu sma fu soso (Rom. 12:18; Tori. 4:29). Fa wi kan de sma di abi deki-ati, èn di lobi vrede tu te wi e preiki a Kownukondre boskopu?
2 Suku penti pe wi e kruderi nanga den sma: Wan sma di lobi vrede no e haritaki nanga trawan. Wan ososma no sa wani arki wi te wi e haritaki fu soso nanga en fu den sani di a e bribi fayafaya. Efu a e taki wan sani di no tru, dan kande a ben o fiti fu taki fu sani di wi nanga na ososma e bribi. Te wi e poti prakseri na den sani di wi nanga na ososma e bribi, dan kande wi kan puru den takru firi di a abi èn wi kan naki en ati.
3 Efu wi no e taki noti te wan ososma abi wan fowtu denki, a de so dan taki wi e agri nanga en, noso taki wi e meki a tru bribi lasi krakti? Nôno. A diniwroko di wi e du leki Kresten, no de fu sori sma ala den fowtu denki di den abi, ma fu preiki a bun nyunsu fu Gado Kownukondre (Mat. 24:14). Na presi taki wi e bruya te wan sma taki sani di no tru, wi kan si disi leki wan okasi fu kon sabi fa a sma e denki fu sani.—Odo 16:23.
4 Tan sori lespeki: Son tron wi musu sori sma den fowtu leri di den e bribi, èn wi musu abi deki-ati fu du dati. Ma fu di wi na sma di lobi vrede, wi no sa meki spotu nanga sma di e bribi èn di e leri falsi leri, èn wi no sa lagi den te wi e taki fu den. Te wi e du leki wi bun moro den, dan dati sa meki taki den no sa wani arki wi. Ma te wi e taki nanga sakafasi èn na wan switi fasi, dan disi sa meki taki sma di wani sabi a tru anbegi, sa wani arki wi. Te wi e sori lespeki gi den arkiman èn te wi e lespeki a bribi fu den, dan wi e sori taki wi e warderi den, èn disi e meki en makriki gi den fu teki a boskopu di wi e tyari gi den.
5 Na apostel Paulus ben lespeki a bribi fu den sma di a ben preiki gi, èn a ben pruberi fu tyari a bun nyunsu na wan fasi di ben o naki den ati (Tori. 17:22-31). A ben de klariklari fu tron „ala sani gi ala sortu sma”, so taki a ben kan „frulusu awinsi wan tu sma nomo” (1 Kor. 9:22). Wi kan du dati tu te wi de sma di lobi vrede, aladi wi e preiki a bun nyunsu sondro frede.