Fu san ede wi e preiki?
1. San lobi abi fu du nanga a preikiwroko fu wi?
1 A moro prenspari wroko di wi kan du na ini a ten disi na fu preiki a bun nyunsu fu Gado Kownukondre. Iya, nanga a prenspari wroko disi wi e sori taki wi e gi yesi na den tu moro bigi komando, fu lobi Yehovah èn fu lobi tra sma (Mark. 12:29-31). Lobi e gi wi furu deki-ati fu de fayafaya preikiman.—1 Yoh. 5:3.
2. Fa wi e sori lobi gi Yehovah te wi e du a preikiwroko?
2 Lobi gi Yehovah: Lobi gi a moro bun Mati fu wi Yehovah e gi wi a deki-ati fu opo taki gi en. Sowan 6000 yari kaba Satan e fruteri ogri-ati lei fu en (2 Kor. 4:3, 4). Dati meki sma e bribi taki Gado e pina sondu sma na ini helfaya. Den e bribi taki Gado na dri sma na ini wán èn taki sma no man frustan a leri dati krinkrin. Boiti dati den e bribi taki Gado no e broko en ede nanga libisma. Furu sma e taki srefi dati Gado no de. Iya, wi wani taki sma kon sabi suma na wi hemel Tata trutru! Te wi e du a diniwroko fayafaya, dan wi e prisiri Gado, ma Satan en ati e bron.—Odo 27:11; Hebr. 13:15, 16.
3. Na sortu fasi a diniwroko fu wi e sori taki wi lobi tra sma?
3 Lobi sma: Ibri leisi te wi e preiki gi sma, wi e sori taki wi lobi a sma. Na ini a muilek ten disi sma abi en fanowdu trutru fu yere a bun nyunsu. Furu sma de leki den sma fu Ninefei na ini a ten fu Yona, di „no sabi srefi san na den reti-anu èn san na den kruktu-anu” (Yona 4:11). Te wi e du wi diniwroko, dan wi e leri sma fa fu abi wan bun èn koloku libi (Yes. 48:17-19). A e gi den howpu (Rom. 15:4). Efu den e arki èn e du san den e leri, dan den „o kisi frulusu”.—Rom. 10:13, 14.
4. San Yehovah no o frigiti noiti?
4 Bun pikin no e sori taki den lobi den papa nanga mama soso na spesrutu okasi. Den e meki muiti fu sori lobi ala ten. Na so a de tu taki a tranga lobi di wi abi gi Gado èn gi sma musu gi wi deki-ati fu suku okasi fu preiki ala ten. Wi no musu preiki soso na a ten di wi gwenti du, ma wi musu du dati doronomo (Tori 5:42). Yehovah no o frigiti so wan lobi noiti.—Hebr. 6:10.