Moi artikel di kan yepi wi na ini a preikiwroko
1. Sortu tu sani wi kan du nanga den artikel di nen „Wan takimakandra nanga wan birtisma”?
1 Wanwan leisi A Waktitoren gi a preikiwroko abi wan artikel na ini di nen „Wan takimakandra nanga wan birtisma”. Wi kan gebroiki den artikel disi na tu fasi: Na wan moi fasi wi kan leri sma san Bijbel e leri èn den e sori wi fa wi kan taki-go-taki-kon na wan koni fasi fu son tori (1 Petr. 3:15). Fa wi kan gebroiki den artikel disi bun?
2. Fa wi kan gebroiki den artikel disi na ini a diniwroko?
2 Gebroiki den na ini a diniwroko: Yu kan kibri wan tu Waktitoren di abi den artikel disi na ini. Te wan ososma, wan sma di wani sabi moro fu Bijbel, noso wan Bijbelstudenti poti wan aksi noso a taki dati a no e agri nanga wan tori di skrifi na ini wan fu den artikel disi, dan yu kan gi en wan tijdschrift di e taki fu na artikel disi èn aksi en fu taki nanga en fu na artikel. Efu yu no abi wan fu den tijdschrift di e taki fu na artikel, dan kande yu kan download en na a jw.org website.
3. Fa wi kan taki fu wan fu den artikel disi nanga wan ososma?
3 Fa yu kan taki fu wan fu den artikel disi nanga wan sma? Son preikiman aksi a sma fu leisi a pisi na ini na artikel pe a birtisma e taki, aladi densrefi e leisi a pisi pe a Kotoigi e taki. Den kon si taki a fasi disi e meki taki na ososma man kon sabi san wi e bribi, sondro taki wi e hati den firi fu en.—Deut. 32:2.
4. Fa wi kan gebroiki den artikel disi fu tron moro bun preikiman?
4 Gi yusrefi leri èn leri trawan tu: Te yu e leisi den artikel disi, dan poti prakseri na den Bijbeltekst, den agersitori, èn a fasi fa den e taki-go-taki-kon fu a tori. Pruberi fu si nanga sortu firi den artikel skrifi. Dan yu musu pruberi fu du dati tu na ini a diniwroko (Odo 1:5; 9:9). Wan sisa taki: „Te yu e leisi den artikel disi, dan a gersi leki yu e leri sani fu wan pionier patna di abi furu ondrofeni èn di sabi ala ten fa a musu gi a yoisti piki!”
5. Fa wi kan sreka wi Bijbelstudenti gi a diniwroko?
5 Yu kan gebroiki den eksempre na ini den artikel disi fu sreka yu Bijbelstudenti gi a diniwroko. Yu kan leisi na artikel disi makandra nanga yu Bijbelstudenti èn meki a du neleki en na a preikiman. Na so wan fasi a Bijbelstudenti o man fruteri trawan na wan switi fasi san a e bribi (Kol. 4:6). Fu tru, den artikel disi na wan fu den furu fasi fa Yehovah e yepi wi fu du wi diniwroko „finifini”.—2 Tim. 4:5.