Yu e gebroiki A Waktitoren bun?
1 „Mi no man wakti fu gebroiki en na ini a preikiwroko!” Dati na san wan sisa ben skrifi baka di a leisi A Waktitoren fu 1 yanuari 2008. Yu poti prakseri na wan tu fu den artikel di e kon doronomo na ini A Waktitoren di wi e prati gi sma? Na sortu fasi yu e pristeri a tijdschrift disi gi sma?
2 „Den sani di Yesus leri wi”: Kande na artikel disi yepi yu fu opo bijbelstudie. Efu yu no du dati ete, dan kande yu kan leisi a nen fu na artikel disi gi na ososma. Baka dati, sori a sma san Yesus ben taki fu a tori disi soleki fa a skrifi na ini a fosi paragraaf. Efu wan sma wani sabi moro, dan du muiti fu go doro nanga a takimakandra fu di yu o taki fu den tra ondro-edeprakseri. Den ondro-edeprakseri dati, na aksi di e meki sma denki dipi fu a tori. Aksi na ososma fu taki fa a e denki fu na aksi. Taki syatu fu den prenki èn baka dati, taki fu a tra paragraaf. Kande yu o man taki fu a fosi pisi fu na artikel a fosi leisi te yu e taki nanga a sma. Te yu go baka na a sma wan tra leisi, yu kan taki fu a tra pisi fu na artikel. Sorgu taki yu de srekasreka fu studeri go doro nanga a sma na ini a Bijbel leri-buku.
3 „Fa yu kan abi wan koloku osofamiri libi?”: Na artikel disi di e kon wan leisi ibri dri mun, kan yepi masra, wefi, papa, nanga mama fu si fa fu fiti Bijbel gronprakseri na ini den osofamiri. Den kan du dati spesrutu te den abi problema di kan meki taki vrede no de na ini na osofamiri. Yu kan gebroiki den artikel disi tu fu yepi sma di no de Kotoigi, fu kon si taki koni rai skrifi na ini Bijbel.—2 Tim. 3:16, 17.
4 Den artikel gi den yonguwan: Na artikel „Gi den yonguwan” skrifi na so wan fasi taki a leisiman e kisi na okasi fu denki fu den Bijbel tori èn a e yepi en fu ondrosuku wan spesrutu Bijbel tori moro bun. Yu kan gebroiki na artikel disi fu yepi yonguwan di yu e miti na ini a preikiwroko, fu si sortu wini den o kisi te den e studeri Gado Wortu (Ps. 119:9, 105). Te yu e taki nanga wan papa noso wan mama, dan yu kan taki fu na artikel „Leri den pikin fu yu”. Na artikel disi e kon wan leisi ibri tu mun. Den artikel disi di de gi den yonguwan, kan yepi pikin-nengre fu leri prenspari sani fu sma di ben e libi na ini Bijbel ten. Yu e leisi den artikel dati nanga yu pikin?
5 Tra artikel fu A Waktitoren: Ibri mun na artikel „Leisiman e aksi” e taki fu wan sani di sma di no de Kotoigi kan aksi densrefi. Yu kan taki fu na artikel disi te yu e pristeri den tijdschrift oso fu oso. Na artikel di nen „Wan brifi fu . . . ”, na wan artikel pe zendeling, noso tra sma e fruteri na wan moi fasi nanga sortu sani den e kisi fu du na ini a diniwroko fu den. Den artikel disi kan yepi sma di wani sabi moro, fu kon si taki wi e preiki a bun nyunsu na heri grontapu, leki kontru fu a marki fu Krestes en denoya.—Mat. 24:3, 14.
6 Na artikel „Kon krosibei na Gado” e kon ibri mun, èn a teki puru fu a Bijbel leisipisi fu a Theokrasia Diniwroko-skoro. Na artikel disi kan meki taki reti-atisma wani sabi moro fu Yehovah. Fo leisi wan yari wi e kisi na artikel „Abi bribi neleki den” èn a skrifi na so wan fasi taki a de neleki a sma di e leisi, e si wan spesrutu Bijbel tori e pasa na en fesi. Na so fasi a sma e kon frustan fa den sma di ben e libi na ini Bijbel ten ben de. A e kon si sortu bosroiti den ben teki, na ini sortu muilek situwâsi den ben de, èn o tranga a bribi fu den ben de.
7 Wi breiti trutru taki ibri mun wi e kisi A Waktitoren di meki spesrutu fu gebroiki na ini a preikiwroko! Fu dati ede, meki wi leisi den artikel na ini a tijdschrift disi èn meki wi gebroiki den artikel dati na ini a preikiwroko.