Teki a bun eksempre fu den profeiti—Mika
1. San Mika ben aksi ensrefi kande, èn fu san ede a boskopu di a ben e preiki no ben de fu soso?
1 ’O ten na ogri grontapu disi o kaba?’ A profeiti Mika ben musu aksi ensrefi a srefi sani disi aladi a ben meki bekènti taki Yehovah ben o strafu a kownukondre fu Israel nanga Yuda. Ma a boskopu di Mika ben preiki no ben de fu soso. Na ini a yari 740 Fosi Krestes, di Mika ben de na libi ete, Yehovah ben du san a pramisi fu du nanga Samaria (Mik 1:6, 7). Bakaten, Yerusalem ben kisi pori na ini a yari 607 Fosi Krestes (Mik 3:12). Fa wi kan teki na eksempre fu Mika aladi wi e wakti a dei te Yehovah o krutu sma na a ten fu wi?
2. Fa wi musu sori taki wi abi pasensi aladi wi e wakti a dei fu Yehovah, èn fu san ede wi musu abi pasensi?
2 Abi pasensi: Mika ben skrifi: „Mi dati o wakti Yehovah. Nanga pasensi mi o wakti mi Gado di o frulusu mi” (Mik 7:7). A no de fu taki dati Mika no ben e sidon wakti nomo teleki a kaba kon. A ben e tan wroko leki profeiti fu Yehovah. Aladi wi e wakti a dei fu Yehovah ’wi musu tyari wisrefi na wan santa fasi èn du sani di e sori taki wi e dini Gado fayafaya’ (2 Petr. 3:11, 12). Fu di Yehovah abi pasensi, meki sma e kisi na okasi fu abi berow (2 Petr. 3:9). Fu dati ede wi e teki a rai di Bijbel e gi wi fu waka baka na eksempre fu den profeiti di ben abi pasensi.—Yak. 5:10.
3. Fu san ede wi musu begi Yehovah meki a gi wi en santa yeye?
3 Suku krakti na Yehovah: Fu di Mika ben abi wan muilek wroko fu du, meki a suku krakti na Yehovah fu man du a wroko (Mik 3:8). Na fu dati ede Bijbel e gi wi a deki-ati fu aksi Yehovah meki a gi wi krakti. A lobi gi krakti na den wan di weri so taki den kan du a wroko di a gi den fu du (Ps. 84:5, 7; Yes. 40:28-31). Yusrefi ben ondrofeni taki Yehovah ben gi yu krakti fu man du yu diniwroko? Yu gwenti aksi Yehovah fu yepi yu nanga en santa yeye di abi furu krakti?—Luk. 11:13.
4. Fa wi kan waka baka a moi eksempre fu Mika na ini a ten disi?
4 A moro prenspari sani na ini a libi fu Mika ben de fu du a wani fu Gado. Aladi den sma di ben libi na ini a ten fu en ben du wan lo ogri sani, toku Mika ben teki a bosroiti fu tan du san Yehovah wani. Neleki Mika, ibri dei wi e kisi tesi fu no du san Yehovah wani. Fu dati ede, meki wi abi a fasti bosroiti ’fu tyari a nen fu Yehovah wi Gado fu têgo èn fu du san a wani’.—Mik 4:5.