No frigiti den wan na den presi pe den e sorgu owrusma
1. Fu san ede wi musu meki muiti fu preiki gi den sma di e tan na den presi pe den e sorgu owrusma?
1 Furu sma e kon owru èn e kon swaki (Preik. 12:1-7). Fu di son owrusma e libi na spesrutu presi pe den e sorgu owrusma, meki wi no e miti den te wi e preiki oso fu oso. Disi e pasa srefi na ini kondre pe owrusma gwenti tan nanga den pikin noso nanga tra famiriman. A kan taki owrusma no man waka bun moro èn taki den no man memre sani bun moro. Ma toku den sma disi èn tra sma di e tan na ini den presi pe den e sorgu owrusma, man leri fu Yehovah èn kon lobi en. San wi kan du fu preiki a bun nyunsu gi den, so taki den kan kisi howpu?—Tit. 2:13.
2. Pe wi kan feni den adres fu den presi pe den e sorgu gi owrusma?
2 Fa fu bigin: Nofo tron yu kan feni den presi pe den e sorgu owrusma te yu e luku na ini a telefonbuku. A dienst-opziener kan meki preikiman di abi ondrofeni go na ibriwan fu den presi disi. Te wi sreka sani bun èn wi e frutrow na tapu Yehovah, dan a no o muilek fu bigin wan Bijbelstudie nanga wan grupu sma di e libi drape.—Odo 21:5; 1 Yoh. 5:14, 15.
3, 4. (a) Suma wi musu aksi efu wi mag hori a grupu studie? (b) San wi kan taigi den sma fu a fasi fa wi o hori a studie nanga den owrusma?
3 Yu musu luku fosi fa sani orga na den presi disi fosi yu aksi fu hori wan Bijbelstudie drape. Na den bigi presi pe furu sma e wroko, a moro bun fu taki nanga a sekretarsi èn aksi en efu yu man taki nanga a driktoro.
4 Fruteri den taki yu e gebroiki yu ten fu gi deki-ati na sma di lobi leisi èn di lobi taki Bijbel tori. Aksi efu owrusma de drape di wani kon makandra fu taki fu wan Bijbel tori wan afu yuru ibri wiki. Yu kan gebroiki difrenti buku, ma furu preikiman si taki den sma lobi Mi buku nanga Bijbel tori èn A moro bigi man di oiti ben libi. Kande yu kan sori a driktoro den buku disi. Taki nanga a driktoro fu sabi tapu sortu dei, o lati, èn na ini sortu kamra yu kan hori a studie. Nofo tron den e skrifi den sani disi tapu a bord pe den e meki sani bekènti. No frede fu taigi en taki yu na wan Yehovah Kotoigi. Meki a sabi tu taki yu no o kon drape fu hori kerki, ma taki yu e gi sma leri fu Bijbel.
5. Fa yu kan sorgu taki a studie e waka switi èn taki den owrusma e leri wan sani?
5 Fa fu studeri nanga wan grupu owrusma: Fosi yu bosroiti fa yu o hori a studie a ben o bun fu luku fa a situwâsi de. Dati meki yu musu gebroiki koni èn fiti yusrefi. A preikiman di e hori a studie musu tyari wan tu fu den buku di a o studeri nanga den owrusma èn a musu teki den baka te a kaba nanga a studie. A kan taki a musu tyari buku di abi bigi letter gi sonwan fu den sma. Unu kan leisi den paragraaf, poti aksi èn meki sma gi piki soleki fa wi gwenti du na wan Bijbelstudie. Den sma di wani èn di man, kan leisi den paragraaf noso Bijbeltekst. Sori switifasi te yu e hori a studie èn gi den sma deki-ati fu taki. Efu a driktoro gi yu primisi, dan wanwan leisi yu kan sori wan fu den video fu wi di e gi sma deki-ati fu bribi na ini Bijbel noso di e taki fu wan spesrutu Bijbel tori. Kande yu kan bigin èn tapu a studie nanga wan syatu begi. Son preikiman e singi Kownukondre singi nanga den sma.
6. San yu kan du te wan sma na ini a grupu no e agri nanga wan sani?
6 San yu kan du efu wan fu den sma no e agri nanga wan sani di unu leisi noso di unu taki na a studie? Taki na wan switi fasi te yu e piki en (Kol. 4:6). Kande yu kan leisi wan Bijbeltekst di e gi wan krin piki tapu a sani di a sma aksi. Efu dati no kan, dan a ben o moro bun fu aksi a sma na wan switi fasi efu yu kan taki a tori dati nanga en baka a studie.
7. San yu kan du efu wan fu den sma e poti wan aksi di e sori taki trutru a wani sabi moro fu Bijbel?
7 Son leisi wan fu den sma kan poti wan aksi di e sori taki a wani leri moro. Wan sisa e piki so: „Dati na wan moi aksi. Ma fu di disi na wan sani di yu wani sabi, dan wi o wakti te wi kaba leisi. Dan mi nanga yu kan taki fu a tori dati.” Nofo tron yu o man hori wan Bijbelstudie nanga sma di wani sabi moro èn yu o man du dati na wan tra ten èn na wan tra presi.
8. Fa wi musu teri den yuru nanga gobaka fu a grupu studie na den presi pe den e sorgu owrusma? Fa wi musu teri den yuru nanga gobaka te wi e studeri nanga wán sma na den presi disi?
8 A moro bun fu meki den srefi Kotoigi hori a studie na a presi pe den e sorgu owrusma. Ala den preikiman di e teki prati na a grupu studie, kan teri a ten fu a studie. Te a studie bigin kaba, dan a preikiman di e teki fesi kan teri wán gobaka ibri leisi, èn ibri mun a kan teri wán Bijbelstudie te a e hori a studie nanga a grupu. Te yu bigin wan Bijbelstudie nanga wan sma drape di man frustan san yu e leri en, dan yu kan teri dati leki fa wi gwenti.
9, 10. Sortu fasi den wan di e studeri nanga wan grupu owrusma musu abi? Fruteri fu san ede dati de fanowdu.
9 Hori a studie ibri wiki: A bun fu hori a studie ibri wiki tapu a srefi dei èn na a srefi ten. Den sma nanga den wrokoman fu a presi o fruwakti taki a studie o hori doronomo èn taki a o bigin èn tapu biten (Mat. 5:37). Dati meki yu musu du san yu pramisi, yu musu de fayafaya èn yu musu orga sani bun. Wi kon si taki a moro bun te tu preikiman di abi ondrofeni e hori a grupu studie (Preik. 4:9, 10). Na den presi pe furu owrusma e tan, a kan de fanowdu fu tyari moro preikiman go.
10 A prenspari tu fu sori switifasi èn fu kon sabi den sma moro bun (Fil. 2:4). Te yu o hori a fosi grupu studie, dan teki ten fu taki nanga ibri sma di kon na a studie. Skrifi den nen èn pruberi fu memre den nen fosi yu hori a studie a tra wiki. Ma hori na prakseri taki son owrusma no lobi en te wan sma di den no sabi e kari den na den fesinen. Efu yu abi pasensi èn yu e sori switifasi, dan ala den sma na ini a grupu o firi bun.
11. Fa den wan di e hori a studie kan sori lespeki gi den wrokoman fu a presi èn gi den famiriman fu den owrusma?
11 A de prenspari tu fu sori lespeki nanga switifasi gi den sma di e wroko drape èn gi den famiriman fu den owrusma. Efu a studie e hori kaba na wan spesrutu ten, dan a no ben o bun fu kenki a ten sondro fu taki fosi nanga a driktoro. Ten na ten yu kan aksi a driktoro fa a feni taki a studie e go. Efu famiriman fu den owrusma de drape te a studie e hori, dan go taki nanga den. Fruteri den fu san ede yu e hori Bijbelstudie nanga den owrusma. Meki den sabi taki yu e hori a bun fu a famiri fu den na prakseri. Aksi den fu kon sidon na a studie fu arki.
12, 13. Fruteri wan tu ondrofenitori di e sori den bun bakapisi di a abi fu preiki na den presi pe sma e sorgu owrusma.
12 Bun bakapisi: Den kring-opziener nanga den gemeente e fruteri taki preikiman ondrofeni moi sani di den du a wroko disi. Na wán presi sowan 20 owrusma kon na a fosi takimakandra. Disi meki taki den ben man hori Bijbelstudie nanga siksi sma fu a presi. Te fu kaba wan fu den siksi sma disi teki dopu. Wan Bijbelstudie di hori na wan tra presi pe den e sorgu owrusma meki taki wan uma fu 85 yari bigin go na den konmakandra fu a gemeente na ini en birti. A ben wani teki dopu srefi. Wan presi pe den e sorgu owrusma tyari kenki kon èn den tapu a grupu studie di Yehovah Kotoigi ben e hori drape. Di dati pasa, den owrusma go kragi na a driktoro! Baka wan pisi ten den ben mag hori a studie baka èn sowan 25 te go miti 30 sma ben e kon na a studie.
13 A no den owrusma wawan e warderi a lobi di wi e sori den. Son leisi den sma di e sorgu gi den owrusma e kon sidon na a studie èn den e gi piki. A muiti di wi e meki fu yepi den owruwan e sori den birtisma taki wi e du bun gi ala sma (1 Petr. 2:12). Di den preikiman taigi a driktoro fu wan fu den presi disi fu san ede wi e hori a grupu studie, dan a aksi: „Fu san ede a teki so langa fosi unu kon dya? O ten unu wani bigin nanga a studie?” Wan tra driktoro skrifi: „Mi ben o wani taki den hori wan grupu studie na ala den presi pe den e sorgu owrusma na ini a kontren. Yehovah Kotoigi e du a wroko disi sondro fu kisi pai, fu di den wani yepi sma.” Wan presi pe den e sorgu owrusma na ini Hawai ben gi Yehovah Kotoigi wan prijs gi a bun wroko di den e du. Den kisi wan papira pe skrifi taki den Kotoigi di ben kon studeri nanga den owrusma ben de wan „gudu” gi den.
14. Fu san ede wi musu yepi den wan di e tan na den presi pe den e sorgu owrusma?
14 Yehovah e gi den owrusma wan kari fu prèise en (Ps. 148:12, 13). Den wan di e tan na den presi pe den e sorgu owrusma, e kisi a kari dati tu. Den presi dati de na ini a kontren fu yu? Yu abi owrusma drape di ben o wani yere a bun nyunsu? Nanga yepi fu den gemeente owruman nanga den driktoro fu den presi pe den e sorgu gi owrusma, wi o man preiki gi den sma di e tan drape. Te wi e poti prakseri na den owrusma, dan wi e teki na eksempre fu Yehovah.—Ps. 71:9, 18.