Aksi di opo kon

◼ Son leisi kerki organisâsi abi ati-oso noso presi pe sma e sorgu gi owrusma. A fiti taki wan Kotoigi fu Yehovah e teki datra-yepi na den sortu presi disi?

Difrenti kerki organisâsi abi ati-oso, noso presi pe sma e sorgu gi owrusma. Sma abi fu tan na den presi disi fu kisi datrayepi, kande fu wan syatu pisi ten, noso kande fu wan langa pisi ten. Nofo tron den presi disi no seti fu horibaka gi den afersi fu Babilon a Bigiwan (Openb. 18:2, 4). A kan taki wan kerki organisâsi bow den presi disi so taki den ben kan meki moni. Na ini a ten disi, son ati-oso abi wan kerki nen nomo fu di fositen wan kerki organisâsi ben bow na ati-oso, ma na a tra sei yu abi ati-oso tu pe den memre fu kerki srefi e wroko drape.

Efu wan Kotoigi fu Yehovah musu go didon na wan ati-oso, noso efu a musu go tan na wan presi pe sma e sorgu gi owrusma, èn kande wan kerki organisâsi e luku den afersi fu a presi dati, dan a kotoigi musu teki en eigi bosroiti efu a o go drape. Kande a konsensi fu wan sma e gi en pasi fu du dati, ma kande wan tra sma en konsensi no e gi en pasi fu du dati (1 Tim. 1:5). Difrenti sani de di kan abi krakti tapu a bosroiti di wan sma e teki, èn a bun fu poti prakseri na den sani disi.

Teki leki eksempre, wan ati-oso noso wan presi pe sma e sorgu gi owrusma, abi wan kerki nen, ma a kan taki disi na a wan-enkri presi na ini a kontren pe yu kan kisi datrayepi. Noso kande tra ati-oso noso presi pe sma e sorgu gi owrusma de na ini a birti, ma a wan di de fu a kerki organisâsi na a wan di e gi a moro bun datrayepi. A kan taki na ati-oso di abi a kerki nen, na a wan-enkri ati-oso di abi den wrokosani fu gi yu a yoisti datrayepi di de fanowdu, noso a kan taki na ati-oso dati na a wan-enkri ati-oso pe a datra fu yu e wroko. Ma son leisi a kan taki den ati-oso di de fu wan kerki organisâsi e lespeki a bosroiti di yu teki leki Kresten fu no teki brudu, aladi tra ati-oso di de fu lanti no e du dati. Disi na wan tu sani di yu kan hori na prakseri, te yu e teki wan bosroiti ini a tori disi.

Efu yu teki a bosroiti fu go didon na wan ati-oso noso fu go tan na wan presi pe sma e sorgu gi owrusma, èn wan kerki organisâsi abi a presi disi, dan yu kan si a sani disi nomo leki na pai yu e pai wan sma gi wan wroko di a du gi yu. Yu kan si en leki a kerki organisâsi abi wan bisnis pe den e du wan spesrutu wroko. Te yu e pai gi a wroko dati di den du, dan yu no e gi bijdrage fu horibaka gi a falsi bribi dati. Yu e pai nomo gi wan sani, noso gi a wroko di den du gi yu.

Ma a no de fu taki, dati leki Kresten yu musu luku bun taki na ini den situwâsi dati yu no e du sani di abi fu du nanga falsi bribi. Boiti dati, yu no o kari sma „Pater” noso „Domri”, soleki fa sma gwenti kari den kerki sma disi di e wroko na den presi disi, noso di e fisiti den presi disi (Mat. 23:9). Yu musu si a tori leki wan bisnis afersi pe yu e kisi datrayepi nanga tra yepi, èn a no de noti moro leki dati.

Te yu e go didon na ati-oso, dan yu kan taigi den sma di e wroko drape taki yu na wan Yehovah Kotoigi èn taki yu wani den owruman kon luku yu na ati-oso. Disi sa meki taki den owruman kan gi yu deki-ati na a ten te yu de na ati-oso.—1 Tes. 5:14.

Te owru brada nanga sisa e tan na presi pe sma e sorgu gi owrusma, dan den abi deki-ati fanowdu fu tan anbegi Yehovah na a yoisti fasi, spesrutu te wan kerki organisâsi abi a presi disi. Den famiriman di de na bribi, den owruman fu a gemeente, nanga trawan fu a gemeente musu teki en na den tapu fu yepi den brada nanga sisa disi. Wi no musu frigiti fu du disi doronomo, fu di dati sa yepi den fu no meki a fowtu fu teki prati na den kerki sani di sma e du na den presi dati, soleki te den e hori kerki, te den e hori fesa, noso wan tra sani.

Nanga den rai disi na prakseri, ibri sma sa musu luku ala den sani di abi fu du nanga a tori disi, èn den musu teki den eigi bosroiti na sortu ati-oso noso na sortu presi pe sma e sorgu owrusma, den sa go.—Gal. 6:5.