Leri wan sani fu preikiman di abi ondrofeni

Wi breiti trutru taki na ini wi gemeente wi abi preikiman di abi ondrofeni. Sonwan fu den e dini Yehovah furu yari langa kaba. Trawan leri no so langa pasa fa fu du a preikiwroko moro bun. Den preikiman disi si fa Yesus yepi a Kresten gemeente na ini den lasti dei disi fu di a meki a preikiwroko èn a wroko fu meki disipel go na fesi (Mat. 28:19, 20). Fu di den e du a preikiwroko, meki den kisi „a krakti di bigi pasa marki” te den abi problema èn te den kisi tesi (2 Kor. 4:7). Wi kan leri furu fu den brada nanga sisa disi di abi furu ondrofeni. Te den kisi na okasi, dan den lobi fu leri tra preikiman den sani di densrefi ben leri (Ps. 71:18). Dati meki wi musu suku okasi fu leri wan sani fu den. Fa wi kan du disi?

Na ini a preikiwroko. Nyun preikiman noso den wan di no abi so furu ondrofeni, abi yepi fanowdu fu du a preikiwroko bun. Wi kan leri furu te wi e luku fa lepi Kresten e du a preikiwroko. (Luku na artikel na ini A Waktitoren fu 15 februari 2015 di nen „Tan du a preikiwroko fayafaya”. Luku a di fu dri paragraaf fu na ondro-edeprakseri di nen „Yepi den nyun preikiman”.) San yu leri di yu wroko nanga den lepi preikiman disi?

Kande yu kan aksi wan lepi preikiman fu wroko nanga yu na ini a preikiwroko. Efu a preikiman owru èn a swaki, dan kande wanwan leisi yu kan hori wan fu den Bijbelstudie fu yu na en oso. Baka a studie, aksi en fa a feni taki yu hori a studie èn sortu bun rai a abi gi yu.

Teki ten fu kon leri sabi den: Teki ten fu du sani makandra nanga den lepi preikiman so taki yu kan kon leri sabi den moro bun. Aksi wan fu den fu kon na yu Osofamiri Anbegi èn aksi en fu fruteri wan sani fu ensrefi. Efu a preikiman owru èn a swaki, dan kande yu kan sreka sani fu hori yu Osofamiri Anbegi na en oso. Meki a fruteri fa a tron wan Kotoigi fu Yehovah. Sortu blesi a kisi? Fa a si taki a wroko gro na ini a gemeente? San gi en prisiri fu dini Yehovah?

No fruwakti tumusi furu fu den. Neleki fa a de nanga wi alamala, na so den lepi preikiman disi no abi a srefi ondrofeni na ini a preikiwroko (Rom. 12:6-8). Fu di sonwan fu den owru kaba, meki den no man du so furu moro makandra nanga wi. Toku wi kan leri furu fu den sani di den ondrofeni fu di den e dini Yehovah langa ten kaba.