Den wrokosani di wi abi fu gi sma leri
1. Fa preikiman de leki bun wrokoman?
1 Wan bun wrokoman e gebroiki difrenti wrokosani. Fu eksempre, wan temreman e gebroiki son wrokosani wanwan leisi gi wan spesrutu wroko, ma trawan a e gebroiki ala dei. Wrokoman di abi ondrofeni, abi den wrokosani disi ala ten na den èn den sabi fa fu gebroiki den bun. Bijbel e gi Kresten deki-ati fu meki muiti fu du a diniwroko fu den bun èn fu de „wan wrokoman di no abi fu syen fu noti” (2 Tim. 2:15). San na a moro prenspari wrokosani fu wi? Dati na Gado Wortu di wi e gebroiki fu ’meki sma tron disipel’ (Mat. 28:19, 20). Sobun, wi musu du muiti fu kon sabi fa fu ’gebroiki Gado wortu na wan yoisti fasi’ fu gi sma leri. Ma wi abi tra wrokosani tu di ala Kresten musu man gebroiki bun fu leri sma san Bijbel e taki trutru.—Odo 22:29.
2. Sortu tra wrokosani wi abi fu gi sma leri?
2 Wrokosani di wi gwenti gebroiki: Sortu tra wrokosani wi musu gebroiki? Wi e gebroiki a buku San Bijbel e leri wi trutru? fu leri sma den tru tori fu Bijbel. Te wi kaba studeri a buku disi nanga wan sma, dan wi musu gebroiki a buku Meki Gado tan lobi yu. A buku disi o leri en fa a kan gebroiki den rai na ini Bijbel na ini en aladei libi. Dati meki wi musu sabi fa fu gebroiki den tu buku disi bun. Wi kan gebroiki son brochure tu. A brochure Gado abi bun nyunsu gi wi! na wan fu den brochure di wi gwenti gebroiki fu bigin Bijbelstudie. Efu a kontren fu wi abi sma di no man leisi bun noso di e taki wan tongo di wi no abi furu buku na ini noso nowan buku srefi, dan wi kan gebroiki den brochure Arki Gado nanga Arki Gado èn libi fu têgo. Wan brochure di o yepi den studenti fu kon sabi moro fu na organisâsi na Suma e du a wani fu Yehovah na ini a ten disi? Sonwan fu den felem kan yepi wi tu fu meki sma tron disipel. Felem soleki Fu san ede wi musu studeri Bijbel?, San wi e du na ini wan Kownukondre zaal?, noso Heeft God een naam? Wi musu sabi fa fu gebroiki den felem disi bun.
3. Fa den artikel di o kon na ini Wi Kownukondre diniwroko o yepi wi?
3 Na ini a ten di e kon, artikel o kon na ini Wi Kownukondre diniwroko di o leri wi fa fu gebroiki den wrokosani disi bun. Te wi e du muiti fu gebroiki den wrokosani disi bun, dan wi e du san Bijbel e taki: „Tan poti prakseri na yusrefi èn na den sani di yu e leri sma. Tan du den sani disi, bika te yu du disi, dan yu o frulusu yusrefi nanga den sma di e arki yu.”—1 Tim. 4:16.