Preiki gi „ala sortu sma”
1. Na sortu fasi bun preikiman de leki bun wrokoman?
1 Wan koni wrokoman abi furu wrokosani. A sabi o ten èn fa a musu gebroiki ibriwan fu den. Na so wi abi difrenti wrokosani tu fu yepi wi du wi wroko leki preikiman bun. Fu eksempre, brochure di e taki fu difrenti tori ben meki fu yepi wi fu preiki gi „ala sortu sma” (1 Kor. 9:22). Na iniberi pisi fu Wi Kownukondre diniwroko kari wan tu fu den brochure disi èn a e sori gi sortu sma den meki. Boiti dati, a e sori fa wi kan pristeri den brochure disi.
2. O ten wi kan gebroiki den brochure na ini a preikiwroko?
2 O ten wi musu gebroiki brochure: Wan wrokoman o gebroiki wan wrokosani te a si taki a o tyari wini kon. Na a srefi fasi wi o pristeri wan brochure te wi e si taki wan sma ben o kisi wini fu dati. Wi no o du dati wawan na ini den mun te wi e pristeri den brochure. Fu eksempre, efu wi e pristeri a Bijbel leri-buku èn wi e preiki na ini wan kontren pe furu sma no abi a Kresten bribi èn den no wani sabi moro fu Bijbel, dan a ben o bun fu pristeri wan brochure di fiti den sma dati. Baka dati, te a sma bigin sori taki a wani sabi moro, dan wi kan pristeri a Bijbel leri-buku.
3. Fu san ede wi musu tron sma di e wroko bun nanga den wrokosani di wi abi fu du a preikiwroko?
3 Bijbel e prèise den sma di sabi du den wroko bun (Odo 22:29). A no de fu taki dati nowan wroko prenspari moro leki „a santa wroko fu preiki a bun nyunsu” na ini a ten disi (Rom. 15:16). Te wi wani de „wan wrokoman di no abi fu syen fu noti”, dan wi o du muiti fu tron sma di e wroko bun nanga den wrokosani fu wi.—2 Tim. 2:15.