Den brochure — Wrokosani di warti gi a diniwroko
1 Wan bekwaam anoe-wrokoman foeroetron e tjari nanga en difrenti sortoe wrokosani, di ibriwan foe den, joe kan gebroiki gi wan spesroetoe wroko. Leki Kownoekondre preikiman, wi abi foeroe difrenti sortoe brochure, di e jepi wi foe sorgoe na wan bekwaamfasi gi den sani di den sma gi soema wi e preiki, abi fanowdoe na jeje fasi (Odo 22:29). Na a wan doro joe kan miti wan sma di lasi-ati. Na wan tra doro, na ososma wani abi wan boen tiri, ala di wan tra sma e aksi ensrefi efoe a libi abi wan marki. Fa wi kan gebroiki den brochure foe wi, foe jepi den sma disi?
2 Te joe e pristeri a brochure „Bekommert God zich werkelijk om ons?” („Gado e broko en ede troetroe nanga wi?”), dan joe ben sa kan taki so wan sani:
◼ „Te son sma e loekoe a njan pina nanga na ongeregtighèit na grontapoe, dan den gwenti foe taki dati na Gado wani en so. Den e taki-go-taki-kon dati, foe di Gado de almakti, a ben sa tjari wan kaba kon na a njan pina foe wi, efoe a ben broko en ede troetroe nanga wi. Fa joe e prakseri foe dati? [Gi okasi foe piki.] Psalm 72:12-14 e sori taki Gado troetroe e broko en ede nanga wi. A no de en fowtoe taki njan pina nanga ongeregtighèit de. A pramisi kaba taki a sa poeroe den sma di e doe ogridoe. A brochure disi, Bekommert God zich werkelijk om ons? (Gado e broko en ede troetroe nanga wi?), e sori san a sa doe èn fa wi kan kisi wini foe dati.” Kande joe kan go doro foe taki foe bladzijde 27, paragraaf 22.
3 Efoe joe e gebroiki a „Doel van het leven” („Marki foe a libi”) brochure, dan joe ben sa kan bigin na a fasi disi:
◼ „Te foe kaba, dan pikinmoro mendri leki ala sma e aksi densrefi san na a marki foe a libi. A de foe libi 70 noso 80 jari nomo èn baka dati dede? Noso a libi abi moro na ini en? San joe e prakseri? [Gi okasi foe piki.] Djaso na Psalm 37:29, wi e si a moi prakseri foe Gado gi libisma nanga grontapoe.” Baka te joe leisi a tekst, dan go na a prenki tapoe bladzijde 31, èn taki moro fara fa a sa de foe libi ini a paradijs.
4 Joe ben kan pristeri a „Zie!” („Loekoe!”) brochure, foe di joe e sori a heri prenki na fesi sei, èn joe kan aksi:
◼ „San joe e denki, de fanowdoe foe meki grontapoe loekoe leki fa a de djaso? [Gi okasi foe piki.] Ibri sma tapoe a prenki dja, abi wan oso èn abi wroko di e gi prisiri. Vrede de èn den abi nofo foe njan, èn grontapoe de sondro sani di e pori en. Ala di libisma tiri e doe foeroe moeiti, tokoe den no man foe meki so wan grontapoe kon. Ma, bijbel e gi wi a djaranti taki Gado sa ’meki ala sani kon njoen’. [Go na bladzijde 30, èn leisi Openbaring 21:3, 4.] A brochure disi kan jepi joe foe kon sabi san joe abi fanowdoe foe libi ini a njoen grontapoe dati.” Efoe a sma sori nofo belangstelling, dan go na bladzijde 3, èn sori fa wi e hori wan bijbelstudie.
5 Nanga a „Njan boen” brochure, joe ben sa kan gebroiki a fasi disi foe bigin:
◼ „Foeroe sma e denki taki den moesoe go na hemel foe njan boen foe têgo libi, ma san joe ben sa denki foe libi na grontapoe foe têgo? [Gi okasi foe piki.] Bijbel e gi wi a djaranti taki têgo libi na wan sani di kan, èn a e taigi wi fa wi kan doro a marki dati.” Leisi Johanes 17:3. Baka dati sori na ososma prenki 49, èn aksi en: „Fa joe ben o feni en, foe libi na ini so wan grontapoe?” Pristeri a brochure, èn seti sani gi wan gobaka.
6 Den brochure e taki foe tori di e fiti, den e gi piki tapoe sani di sma e aksi densrefi, èn den e gi trowstoe. Te wi e gebroiki den wrokosani disi na wan bekwaamfasi, dan wi kan jepi opregti sma foe „kon kisi wan joisti reti sabi foe a waarheid”. — 1 Tim. 2:4.