Poti sma prakseri tapoe brochure foe prati joe kownoekondre howpoe
1 Ala di wi de kotoigi foe na kontroe foe den bijbel profeititori, wi e prisiri ini a Kownoekondre howpoe foe wi, èn sani e troesoe wi foe taki foe en nanga iniwan sma di wani arki (Luk. 6:45; Rom. 12:12). Poti prakseri tapoe den brochure, di wi o gebroiki ini a velddienst ini a moen juli, na wan fasi fa wi kan prati wi Kownoekondre howpoe nanga tra sma so leki Jesus ben komanderi. — Mat. 24:14.
2 Foe di wi abi wan toe moi kloroe brochure, di kan leri sma foeroe sani, èn di wi kan pikin na mindri den, dan sortoe wan foe den ben sa gi satisfaksi moro betre na den fanowdoe foe den sma ini a kontren foe wi èn ben sa wiki den belangstelling? Foe wi kan gebroiki den brochure so boen leki a kan, wi moesoe sabi san skrifi na ini den. A sjatoe overzicht di e kon now sa jepi wi ini a tori disi.
3 A Tiri di sa tjari a Paradijs kon: Di Jesus ben de na grontapoe, a Kownoekondre foe Gado ben de a thema foe a preiki di a ben e preiki. A brochure disi e sori taki a Kownoekondre disi na wan troetroe tiri èn fa a sa loesoe problema di e meki a libi de so tranga ini a ten disi.
4 Njanboen foe tègo foe a libi na grontapoe!: A e tjari kon a krin foe san ede Gado meki libisma èn fa wi kan njan boen foe têgo foe a libi na grontapoe. Den prenki di e froeteri sma wan sani èn den tori di skrifi sjatoe ini a brochure disi, e hari na prakseri foe jongoewan èn foe den sma di no man leisi so boen. A kan gebroiki toe foe gi den sma di no man jere so boen den gronleri foe bijbel.
5 A nen foe Gado di sa tan foe têgo: A brochure disi e taki foe Gado nen ini a leti foe bijbel nanga historia, foe di a e sori foe san dede a de prenspari gi kresten foe sabi èn foe gebroiki a nen ini na anbegi foe den.
6 „Loekoe! Mi e meki ala sani njoen”: A brochure disi e prenki a paradijs èn a e bow warderi gi a bijbel èn gi wi Mekiman. Bakaten a kaba taki foe san ede Gado e gi pasi taki ogridoe de, a e sori srapoe tapoe dri gronleri foe bijbel: a loesoe paiman, na opobaka èn a Kownoekondre. A brochure disi abi aksi toe na ondrosei foe den bladzijde, san e meki en moro makriki gi wi foe hori wan bijbelstudie na ini.
7 Joe moesoe bribi ini a Driwan-fasi?: Sma e taki kande taki den e bribi ini a Driwan-fasi, ma tokoe den e kenki foe a fasi fa den e froestan en. A brochure disi e piki den sortoe aksi disi leki: San na a Driwan-fasi? A bijbel e leri en? Jesus Krestes na a almakti Gado èn wan pisi foe a Driwan-fasi? San na a santa jeje, èn fa a e wroko?
8 Efoe wi kaba soekoe sortoe brochure wi wani gebroiki ini a oso foe oso diniwroko noso te wi e gi okasi preiki, wi moesoe loekoe den artikel baka, di de na bakasei foe a nomroe disi foe Wi Kownoekondre Dienst. Drape wi sa feni bodoi foe pristeri wi boekoe èn foe go na gobaka nanga a prakseri foe kweki belangstelling èn bigin wan bijbelstudie.
9 Na foeroe okasi, awansi te wi e preiki so leki fa wi gwenti doe dati noso na okasi preiki, wan spesroetoe brochure na joisti san de fanowdoe foe gi wan toemoesi boen kotoigi. Ma, wi moesoe sreka wisrefi, abi nofo brochure na wi, sabi san skrifi na ini den, èn gebroiki a koni foe wi foe si sortoe wan fiti na den difrenti okasi. Meki a de so taki a blesi foe Jehovah tapoe a diniwroko foe wi, di wi e doe nanga faja, abi leki bakapisi taki foeroe sma moro e prisiri nanga wi ini a Kownoekondre howpoe! — Tori. 13:47, 48.