Pristeri brochure foe soekoe den wan di abi belangstelling
1 Brochure na krakti wrokosani. Ini 32 bladzijde nomo, wan brochure kan poti steifi bijbel waarheid èn trowe den taki-go-taki-kon nanga leri di de kontrari a sabi foe Gado.—2 Kor. 10:5.
2 Baka di a ben leisi a brochure Jehovah Kotoigi—E doe Gado wani na heri grontapoe ini wánfasi, wan man en ati ben naki en foe skrifi: „Noiti ete mi si so wan organisâsi. . . . A de wan toemoesi moi sani foe feni sma di e teki a wani foe Gado serjoesoe ini a jarihondro disi pe joe abi someni hoigrifasi foe relisi.” Wan bonoeman ini Afrika ben studeri a brochure Njanboen Foe Têgo Foe A Libi Na Grontapoe! Fa disi ben wroko na en tapoe? A ben tapoe nanga a wroko foe en leki bonoeman èn a ben seni den oema nanga soema a ben e libi, gowe boiti a fosi oema foe en. Dan a ben go trow na lanti nanga en.
3 A brochure Joe moesoe poti bribi ini a Dri-wánfasi? na wan boekoe nanga boen boeweisi, a de reidelek èn a de wan wrokosani foe waarheid di abi boen bakapisi. Ini a taki di a ben taki foe a brochure, wan relisi skrifiman foe The Sunday Gleaner ini Jamaika, West-Indië, ben taki: „A poeblikâsi . . . na wan kefarlek moi boekoe foe den Kotoigi èn now nowan enkri sma di e bribi ini wan Dri-wánfasi—noso toe-wánfasi—kan de seiker moro foe en srefi. A brochure foeroe nanga wortoe di ben taki, èn di ben teki foe historia nanga theologis fonten foe sori taki a leri foe a Dri-wánfasi no ben komoto foe bijbel. . . . A moeilek toemoesi gi a relisi skrifiman disi foe si fa a gemiddelde noso srefi pikinso moro leki a gemiddelde foe den kerkimemre no ben kan taki noti kontrari den boeweisi, di e dwengi sma èn di e naki na ati foe sma, di den Kotoigi e tjari kon kontrari a prakseri taki Jesus na Gado.”
4 Gebroiki den boen: Foe abi boen bakapisi, den wrokosani di e hari sma prakseri èn di abi krakti tapoe sma moesoe pristeri na wan sma di wani foe leisi den. Bikasi wi abi difrenti brochure, ibriwan e taki foe wan tra tori, wi sa doe moeiti foe pristeri a wan di wi si taki a e fiti a sma di wi e gi kotoigi. Foe di wi sabi den brochure foe wi èn wi abi difrenti foe den na wi, a sa meki en moro makriki gi wi foe gebroiki den boen, awansi na velddienst, na oso noso na wan tra presi.
5 Foe eksempre, efoe wi e taki nanga wan sma di e broeja foe a leri foe a Dri-wánfasi foe krestenhèit noso di kande e denki taki Jesus na Gado, sortoebrochure joe sa gebroiki dan? Efoe wan sma e aksi foe san ede wan Gado foe lobi e gi pasi foe someni pina de, sortoe brochure sa de a piki tapoe a fanowdoe? Efoe wan sma e sori taki a e broko-ede foe a fanowdoe foe wan tiri di sa tjari boen gi a pipel, sortoe brochure kan de a moro joisti wan gi en?
6 Boiti taki joe sabi sortoe brochure joe kan gebroiki, doe moeiti foe wiki a lostoe foe a sma gi den tori san de na ini. Efoe den situwâsi e gi pasi, poti prakseri tapoe wan komentaar noso wan prenki di kan wiki en belangstelling foe go leisi a materiaal. Noso joe kan leisi wan noso toe paragraaf nanga en, soekoe den tekst di skrifi, èn taki foe a materiaal. Foeroe boen bijbelstudie ben bigin na a fasi disi.
7 Den brochure foe wi e gi piki di komoto foe bijbel èn pikinso pikinso den e gi howpoe na den sma di e soktoe èn geme foe den tegoe sani di e doe na ini grontapoe. (teki gersi Esekièl 9:4.) Sma di gersi skapoe sa doe wan sani a tapoe a boskopoe di den sortoe boekoe disi abi na ini. A de wan grani gi wi foe meki boen gebroiki foe den brochure ini ala taki foe wi diniwroko te wi e soekoe sma di abi belangstelling.