Teki, gebroiki, èn njanboen foe Gado Wortoe
1 Ala di miljoenmiljoen sma abi wan bijbel, tokoe foeroe foe den no e teki en leki a Wortoe foe Gado, moro foeroe foe den no e gebroiki a koni rai di de na ini, èn dati meki pikinso sma e njanboen foe en. Ma, a pipel foe Jehovah e bribi troetroe taki a de a Wortoe foe Gado èn taki a boen gi ala sani (2 Tim. 3:16, 17). Foe dati ede a thema foe a kringkonmakandra programa foe a dienstjari foe 1993 sa de „Teki, gebroiki, èn njanboen foe Gado Wortoe”.
2 Wi sa abi lezing, demonstrâsi, sjatoe sori foe sani, ondrofeni nanga aksi takimakandra foe gi wi deki ati, foe meki wi warderi foe a Wortoe foe Gado kon moro dipi, èn foe jepi wi foe gebroiki en moro boen ini ala kontren foe a libi. A satra bakadina programa sa taki foe rai èn tranga leri ini na osofamiri ini tori di abi foe doe nanga ontspanning, demakandra nanga a lobi foe grontapoe goedoe. A sa sori wi fa wi kan de tra fasi leki grontapoe èn taki wi no e teki den takroe maniri èn sondro respeki noso doti taki foe grontapoe abra. Moro ete, deki-ati sa gi toe so taki papa nanga mama di de den wawan sondro foe trow èn pikin di de sondro papa kan njan boen foe dati.
3 So toe, na satra sma di gi densrefi abra njoenjoen sa abi na okasi foe teki dopoe baka te den jere wan bijbel taki foe na afersi disi. Den wan di e meki plan foe teki dopoe na a kringkonmakandra moesoe meki a fesiman opziener foe a gemeente kon sabi a winsi foe den so esi leki a kan, taki a sa abi nofo ten foe seti afersi meki den owroeman loekoe den aksi, gi den sma di o teki dopoe, nanga den.
4 A sonde mamanten programa sa ondrosoekoe fasi fa wi kan hori wisrefi aparti foe grontapoe foe di wi e fiti wisrefi na a Wortoe foe Gado. A prensparifasi foe na fasi fa wi krosi de èn fa foe tan farawe foe meki wi jeje no kon kroektoe, de na mindri den tori di wi sa go ondrosoekoe. Na a bakadina, a distriktopziener sa hori na poebliki taki di abi na titel „San e marki a bijbel leki a Wortoe foe Gado?” Wi wani de seiker taki joe kari ala sma di abi belangstelling kon na a heri moi programa disi.
5 Den dei nanga a presi pe a kringkonmakandra disi sa hori, oenoe kringopziener sa gi oenoe, èn wi e gi oen alamala na deki ati foe de drape so taki oenoe kan teki, gebroiki èn njanboen foe na rai foe a Wortoe foe Gado. — Jak. 1:22-25.