Fa fu preiki moro bun yepi Bijbelstudie fu go na fesi, so taki den kan gi densrefi abra na Gado èn teki dopu

FU SAN EDE A PRENSPARI: Efu den Bijbelstudie wani taki Yehovah feni den bun, dan den musu gi densrefi abra na en èn den musu teki dopu (1Pe 3:21). Te wan sma e libi soleki fa a pramisi Yehovah, dan Yehovah o yepi en fu tan abi wan tranga bribi (Ps 91:1, 2). Wan Kresten no e gi ensrefi abra na wan tra libisma, na wan wroko, noso na wan organisâsi, ma a e gi ensrefi abra na Yehovah. Dati meki den Bijbelstudie musu kon abi lobi gi Gado èn den musu leri warderi den sani di Gado du gi den.​—Ro 14:7, 8.

FA WI MUSU DU DATI:

• Te yu e studeri nanga a sma, dan yepi en fu kon si san a tori e sori fu Yehovah. Sori en taki a prenspari srefisrefi fu leisi Bijbel ibri dei èn fu begi Yehovah „doronomo”.​—1Te 5:17; Yak 4:8

• Gi yu Bijbelstudie deki-ati fu go na fesi so taki a kan gi ensrefi abra na Gado èn teki dopu. Ma fosi a doro den marki dati, yepi en fu gi piki na den konmakandra, noso fu fruteri den sma na ini a birti èn na wrokope san a leri. Hori na prakseri taki Yehovah no e dwengi nowan sma fu dini en. Wan sma srefi musu bosroiti efu a o gi ensrefi abra na Gado.​—De 30:19, 20

• Gi yu Bijbelstudie deki-ati fu tyari kenki kon fu kan plisi Yehovah èn fu kan teki dopu (Odo 27:11). Kande wan tu fasi nanga denki fu a Bijbelstudie rutu dipi. Dati meki yu o abi fu tan yepi en fu kenki a owru fasi fa a ben de èn fu kisi nyun fasi (Ef 4:22-24). Taki nanga en fu wan tu fu den Waktitoren artikel di nen „Bijbel e kenki sma libi”

• Fruteri en fa yu e prisiri fu di yu e dini Yehovah.​—Yes 48:17, 18