Fa fu gebroiki den ’Eksempre fa fu hori wan takimakandra’

Bigin fu a mun yanuari 2018 den ’Eksempre fa fu hori wan takimakandra’ kon de fu si tapu a kafti fu a Wi Kresten libi nanga a preikiwroko​—Studie-buku. Fa wi kan gebroiki den eksempre disi?

Te wan studenti o hori wan takimakandra tapu a podium: Gebroiki den aksi, a tekst nanga den tra sani di den brada poti na ini a eksempre. Ma disi no wani taki dati yu musu taki ala sani soifri soleki fa a de na ini a felem ’Eksempre fa fu hori wan takimakandra’. Yusrefi kan bosroiti fa yu o preiki gi wan sma na ini wan tra situwâsi, fa yu o bigin a takimakandra èn fa yu o taki-go-taki-kon nanga a sma. Yu kan gebroiki den buku nanga tra sani fu a Teaching Toolbox, awinsi dati no de na ini na ’Eksempre fa fu hori wan takimakandra’.

Na ini a preikiwroko: Den ’Eksempre fa fu hori wan takimakandra’ na fu yepi wi fu kon nanga tra fasi fu preiki. Yu kan go doro nanga a takimakandra efu wan sma wani sabi moro. Kande yu kan gebroiki na eksempre fa fu hori gobaka. Efu yu wani, yu kan poti a aksi wan tra fasi noso yu kan taki fu wan tra tori. Yu si leki wan fu den aksi fu den mun di pasa noso wan Bijbeltekst kan abi moro krakti tapu den sma ini yu birti? Den sma na ini yu birti lobi taki fu sani di pasa na ini a kontren? Awinsi fa yu o gebroiki den eksempre disi, hori na prakseri taki a marki na fu ’du ala sani fu a bun nyunsu ede, so taki yu kan prati en nanga trawan’​—1Kor 9:22, 23.