Yu e gebroiki na Audio Bijbel bun?

San na a audio Bijbel? Soleki fa wi sabi, wi kan arki Bijbel tapu MP3 ini difrenti tongo. Ma na audio Bijbel na a nyunwan fu a Nyun-Grontapuvertaling di de tapu MP3. Ibri tron te den brada kaba nanga wan Bijbel buku, dan den e poti en tapu jw.org nanga JW Library èn den e du dati na ini so furu tongo leki a kan. Wan fu den moi sani fu na audio Bijbel na taki yu e yere wan tra sten gi ibri sma na ini Bijbel. Den sma di e leisi e poti krakti tapu den yoisti wortu èn den e leisi nanga firi so taki den arkiman kan frustan a boskopu fu Bijbel bun.

Fa son sma e kisi wini fu na audio Bijbel? Furu sma di gwenti arki na audio Bijbel, lobi en srefisrefi. Te den e yere wan tra sten gi ibri sma ini Bijbel, dan dati e meki en moro makelek fu si na den fesi san ben pasa ini Bijbel ten. Boiti dati, a e yepi den fu frustan Bijbel moro bun (Odo 4:5). Furu sma taki tu dati te den abi broko-ede èn den e arki na audio Bijbel, dan dati e trowstu den.​—Ps 94:19.

Te wi e arki fa sma e leisi Gado Wortu, dan dati kan abi furu krakti tapu wi libi (2Kr 34:19-21). Efu na audio Bijbel de ini wan tongo di yu e frustan, dan kande yu kan poti wan fasti ten fu arki en.

LUKU A FELEM FA DEN MEKI NA AUDIO BIJBEL​—WAN SYATU PISI. BAKA DATI PIKI NA AKSI DISI:

San yu feni moi fu na audio Bijbel?