Fa fu gebroiki den mp3 fu wi
1. Boiti den buku fu wi di yu kan leisi, sortu tra moi sani wi abi?
1 Furu sma lobi fu go tapu jw.org fu leisi switi wortu di soifri èn di tru (Preik. 12:10). Ma yu gebroiki den mp3 fu den buku noso brochure di de tapu jw.org tu? Nanga yepi fu den mp3 wi kan arki furu sani di de tapu a website fu wi. Fa wi kan kisi wini fu den sani di de tapu mp3?
2. Fa wi kan gebroiki den mp3 gi wisrefi èn gi wi osofamiri?
2 Gebroiki den gi wisrefi èn gi wi osofamiri: Yu kan arki Bijbel, den tijdschrift fu wi noso tra buku tapu mp3 na ini furu tongo. Wi kan arki den sani disi te wi e rèi go na wan presi noso te wi e du tra sani. Na so wi kan gebroiki wi ten moro bun (Ef. 5:15, 16). Wi kan meki wi Osofamiri Anbegi moro switi te wi e plèi wan mp3 fu wan buku, aladi wisrefi e leisi tu na ini a buku. Te yu wawan e studeri èn yu e arki den mp3, dan dati o yepi yu fu leisi moro bun noso a kan yepi yu te yu e leri wan tra tongo.
3. Suma na ini wi kontren kan kisi wini fu den mp3 fu wi?
3 Gebroiki den na ini a preikiwroko: Kande wi abi sma na ini wi kontren di feni taki den no abi ten fu leisi den buku fu wi, ma den wani arki den mp3. Noso wi kan miti sma di e taki wan tra tongo èn di o de moro gaw fu arki te den yere a Kownukondre boskopu na ini den „eigi tongo” (Tori 2:6-8). Na ini son kontren sma abi a gwenti fu leri sani te den e arki san trawan e taki. Fu eksempre na ini a Hamong kulturu, den bigisma gwenti fruteri den yonguwan den fositen tori fu a pipel fu den èn den yonguwan man hori den sani di den yere bun na ede. Furu Afrikan pipel abi a gwenti tu fu fruteri wan tori di e leri tra sma wan sani.
4. San wi kan du fu yepi sma na ini wi kontren?
4 Fa a de na ini yu kontren? Kande yu kan plèi wan pisi fu wan brochure noso traktaat tapu mp3 meki na ososma yere en na ini en eigi tongo. Kande wi kan seni wan e-mail nanga wan mp3 fu wan buku noso brochure gi wan sma di wani arki en. Efu wan sma wani sabi moro, dan wi kan download wan buku tapu mp3, bron en na tapu wan CD gi a sma èn gi en dati makandra nanga a buku. Ibri leisi te yu gi wan sma di yu miti na ini a preikiwroko wan heri buku, brochure, traktaat noso tijdschrift di yu download fu jw.org, dan yu kan teri en tapu yu preikiwroko raportu. Den mp3 meki so taki wi kan gebroiki den fu studeri èn fu meki sma kon sabi a Kownukondre boskopu.—1 Kor. 3:6.