Wi musu lobi makandra nanga wi heri ati

1. Sortu komando Yesus gi den disipel fu en? (Luku a fowtow tapu a kafti.)

A NETI fosi Yesus dede, a gi den disipel fu en a komando disi: „Neleki fa mi lobi unu, na so un musu lobi makandra tu.” Baka dati a taki: „Na a fasi disi ala sma o sabi taki unu na mi disipel, te unu lobi makandra.”​—Yoh. 13:34, 35.

2. Fu san ede a prenspari fu lobi makandra?

² Yesus ben taki dati efu den disipel fu en ben o sori lobi neleki en, dan sma ben o si taki den na den trutru bakaman fu en. Na so a ben de na ini a ten fu den apostel èn na so a de tu na ini a ten disi. Fu dati ede a prenspari srefisrefi taki wi lobi makandra awinsi a muilek son leisi!

3. San wi o luku na ini na artikel disi?

³ Fu di wi na sondusma, meki a muilek son leisi gi wi fu lobi makandra nanga wi heri ati. Toku wi musu pruberi fu teki na eksempre fu Krestes. Na ini na artikel disi wi o leri fa lobi kan yepi wi fu meki en bun baka nanga sma di abi wan sani nanga wi. Wi o leri tu fu no desko trawan èn fu kari sma kon na wi oso. Te yu o studeri na artikel disi, dan aksi yusrefi: ’San mi kan leri fu brada nanga sisa di tan sori lobi gi makandra awinsi a no ben makelek?’

MEKI EN BUN NANGA SMA

4. Soleki fa Mateyus 5:23, 24 e taki, dan fu san ede wi musu meki en bun baka nanga wan brada di abi wan sani nanga wi?

⁴ Yesus ben leri wi taki a prenspari fu meki en bun baka nanga wan brada noso wan sisa di abi wan sani nanga wi. (Leisi Mateyus 5:23, 24.) A sori taki ala ten wi musu libi bun nanga sma, efu wi wani taki Gado feni wi bun. Yehovah breiti te wi e du muiti fu meki en bun nanga wi brada nanga sisa. A no o feni na anbegi fu wi bun te wi e tan hori sma na ati èn te wi e weigri fu meki en bun baka nanga den.​—1 Yoh. 4:20.

5. Fu san ede a ben muilek gi Mark fu meki en bun baka nanga wan tra brada?

⁵ A kan muilek son leisi fu meki en bun baka nanga wan sma. Fu san ede? Luku san ben miti Mark.b A hati en di wan brada ben krutu en èn di a brada go fruteri tra sma na ini a gemeente wan lo ogri sani fu en. Mark taki: „Mi go rigeri nanga a brada fu di mi ati ben bron.” Ma bakaten Mark ben sari fu san a du. Dati meki a go aksi a brada pardon èn a pruberi fu meki en bun baka nanga en. Ma a brada no ben wani meki en bun baka nanga Mark. Na ini a bigin Mark ben e denki: ’Efu a brada no wani, dan fu san ede mi musu tan du muiti fu meki en bun baka nanga en?’ Ma a kring-opziener gi en deki-ati fu no gi abra. San Mark du?

6. (a) Fa Mark tan du muiti fu meki sani bun baka nanga wan brada? (b) Fa Mark du san skrifi na Kolosesma 3:13, 14?

⁶ Di Mark go sidon denki fu a tori, dan a kon si taki a no ben abi sakafasi èn taki son leisi a ben e denki taki a bun moro trawan. A si taki a ben musu kenki en denki (Kol. 3:8, 9, 12). A sori sakafasi èn a go aksi a brada baka fu gi en pardon. Mark skrifi brifi tu gi a brada fu sori en taki a e sari fu a sani di a du èn taki a ben wani tron mati nanga en baka. Mark gi a brada wan tu pikin kado di a ben denki taki a brada ben o lobi. Ma a sari taki a brada tan hori Mark na ati. Toku Mark tan gi yesi na a komando fu Yesus fu lobi en brada èn fu gi en pardon. (Leisi Kolosesma 3:13, 14.) Efu wi lobi trawan neleki Yesus, dan awinsi den e tan mandi nanga wi baka te wi du muiti fu meki en bun baka, wi o tan gi den pardon. Boiti dati, wi o tan begi taki wi kon bun baka nanga den.​—Mat. 18:21, 22; Gal. 6:9.

7. (a) Sortu deki-ati Yesus gi wi? (b) San miti wan sisa fu wi?

⁷ Yesus gi wi a deki-ati fu libi nanga trawan soleki fa wi wani taki den musu libi nanga wi. A sori wi taki wi no musu lobi soso den sma di lobi wi (Luk. 6:31-33). San yu ben o du te wan sma na ini a gemeente e wai pasi gi yu èn te a no wani gi yu odi? A sani disi no e pasa furu, ma na dati ben pasa nanga Lara. A e taki: „Wan sisa na ini a gemeente no ben wani taki nanga mi èn mi no ben sabi fu san ede. Mi ben broko mi ede nanga a sani disi èn a no ben switi gi mi fu go na den konmakandra.” Na ini a bigin Lara ben denki: ’Mi no du noti. Tra sma na ini a gemeente srefi feni taki a sisa disi muilek.’

8. San Lara du fu meki en bun baka nanga wan sisa èn san wi kan leri fu na ondrofenitori fu en?

⁸ Lara du sani fu meki en bun baka nanga a sisa. A begi Yehovah èn a bosroiti fu go taki nanga a sisa. Den taki fu a problema, den brasa makandra èn den meki en bun baka. A ben gersi leki a problema ben lusu. Ma Lara taki: „Bakaten a sisa ben du a srefi sani. Mi ben firi brokosaka.” Lara ben denki taki a ben kan de koloku soso te a sisa kenki en maniri. Ma te fu kaba Lara kon frustan taki a moro bun sani di a kan du, na fu tan sori lobi gi a sisa èn fu ’gi en pardon nanga en heri ati’ (Ef. 4:32–5:2). Lara memre taki trutru lobi „no e tan memre na ogri di trawan du. A e frudrage ala sani, a e bribi ala sani, a e howpu ala sani, èn a e horidoro awansi san e pasa” (1 Kor. 13:5, 7). Lara no ben broko en ede moro nanga a problema. Bakaten a sisa ben sori moro switifasi gi en. Te yu e du muiti fu meki en bun baka nanga wan brada noso wan sisa èn te yu e tan sori lobi gi en, dan yu kan de seiker taki ’a Gado fu lobi èn fu freide o de nanga yu’.​—2 Kor. 13:11.

WI MUSU LOBI ALA SMA

9. Soleki fa Tori fu den apostel 10:34, 35 e sori, dan fu san ede wi musu lobi ala sma?

⁹ Yehovah no lobi a wan sma moro a trawan. (Leisi Tori fu den apostel 10:34, 35.) Te wi lobi ala sma, dan wi o sori taki wi na pikin fu Gado. Wi e gi yesi na a komando fu lobi tra sma leki fa wi lobi wisrefi èn wi e du muiti fu libi bun nanga ala brada nanga sisa.​—Rom. 12:9, 10; Yak. 2:8, 9.

10-11. San yepi wan sisa fu kenki en denki?

¹⁰ Gi son sma a kan muilek fu no desko trawan. Luku san ben pasa nanga wan sisa di nen Rut. Di a ben yongu wan sma fu wan tra kondre ben du wan bigi ogri nanga en famiri. Fa disi ben meki Rut firi? A e taki: „Mi no ben lobi nowan sani fu a kondre dati. Mi ben denki taki ala sma fu a kondre dati ben de a srefi, srefi den brada nanga sisa.” San yepi Rut fu no firi so moro?

¹¹ Rut ben si taki a ben abi fu meki tranga muiti fu no denki so. A leisi ondrofenitori fu a kondre dati na ini den Yaribuku. A taki: „Mi du muiti fu no denki takru fu den sma fu a kondre dati. Mi bigin si taki den brada nanga sisa ben e dini Yehovah nanga den heri ati. A ben de krin taki den na mi brada nanga sisa tu.” Baka wan pisi ten, Rut si taki a ben musu sori tu taki a lobi den brada nanga sisa disi. A e taki: „Solanga mi ben miti brada nanga sisa fu a kondre dati, mi ben e du furu muiti fu sori switifasi gi den. Mi ben e taki nanga den èn mi ben kon sabi den moro bun.” San ben de a bakapisi? Rut e taki: „Mi no ben denki ogri fu den moro, ma mi bigin lobi den.”

12. Sortu problema wan sisa di nen Sara ben abi?

¹² Son sma e desko trawan sondro taki den sabi. Fu eksempre, Sara ben denki taki a no ben e desko sma fu di a no ben luku fu sortu ras wan sma de, omeni moni a abi noso sortu frantwortu a abi na ini na organisâsi. Ma a e taki: „Mi bigin si taki toku mi no ben lobi ala sma.” Fa so? Sara ben kweki na ini wan famiri pe furu sma go na heiskoro èn a ben abi a gwenti fu moksi soso nanga sma di ben go na heiskoro tu. Wan leisi a ben taigi wan mati: „Mi e moksi nanga brada nanga sisa di kisi heiskoro-leri. Mi e wai pasi gi den wan di no go na heiskoro.” A de krin taki Sara ben musu kenki en denki. San yepi en?

13. San wi e leri te wi e luku fa Sara kenki en denki?

¹³ Wan kring-opziener yepi Sara fu kenki en denki. Sara e taki: „A prèise mi taki mi e dini Yehovah fayafaya, taki mi e gi bun piki èn taki mi sabi Bijbel bun. Ma a sori mi taki te wi e kon frustan Bijbel moro bun, dan wi musu meki muiti fu kon abi fasi soleki sakafasi nanga sari-ati.” Sara du san a kring-opziener taigi en. A taki: „Mi si taki mi ben musu sori switifasi èn mi ben musu abi moro lobi.” Dati meki a bigin denki tra fasi fu den brada nanga sisa di no kisi heiskoro-leri. Sara e taki: „Mi pruberi fu si sortu moi fasi den abi èn fu san ede Yehovah lobi den.” Fa a de nanga wi? Noiti wi musu denki taki wi bun moro trawan fu di wi kisi heiskoro-leri. Efu wi „lobi ala brada” nanga sisa, dan wi no o desko nowan fu den.​—1 Petr. 2:17.

ABI A GWENTI FU KARI SMA KON NA YU OSO

14. Te wi e luku san Hebrewsma 13:16 e taki, dan fa Yehovah e firi te wi e kari sma kon na wi oso?

¹⁴ Yehovah lobi sma di lobi kari sma kon na den oso. (Leisi Hebrewsma 13:16.) A e si en leki wan pisi fu wi anbegi, spesrutu te wi e yepi den wan di de na nowtu (Yak. 1:27; 2:14-17). Dati meki Bijbel e gi wi a deki-ati fu „abi a gwenti fu gi sma wan switikon” (Rom. 12:13). Te wi e gi sma wan kari fu kon na wi oso, dan wi e sori den taki wi e broko wi ede nanga den, taki wi lobi den èn taki wi wani de den mati. Yehovah breiti te wi e kari sma fu kon nyan noso dringi wan sani nanga wi, awinsi a no furu. A lobi en tu te wi e meki ten gi den (1 Petr. 4:8-10). Ma son sani kan meki en muilek gi wi fu du disi.

15-16. (a) Fu san ede son sma feni taki den no man kari sma kon na den oso? (b) San yepi Edit fu de klariklari fu kari sma kon na en oso?

¹⁵ Son leisi a situwâsi fu wi kan meki taki wi no wani kari sma kon na wi oso. Luku na eksempre fu wan sisa di nen Edit di masra dede kaba. Fosi a tron wan Kotoigi, a no ben lobi moksi nanga sma. Edit ben feni taki den sma di ben abi en moro bun ben kan kari sma kon na den oso.

¹⁶ Baka di Edit tron wan Kotoigi, a kenki en denki. A bigin kari sma kon na en oso. A e fruteri: „Di den ben e meki a nyun Kownukondre zaal fu wi, wan owruman taigi mi taki wan trowpaar ben o kon yepi nanga a wroko èn a aksi mi efu den ben kan tan nanga mi tu wiki langa. Mi ben prakseri fa Yehovah ben blesi na uma fu Sarfat di masra ben dede kaba” (1 Kow. 17:12-16). Edit agri fu meki a trowpaar tan na en oso. A kisi blesi? A e taki: „Den no tan tu wiki nomo, ma tu mun. Wi tron bun mati fu makandra.” Edit kisi tra mati tu na ini a gemeente. Now a e pionier èn a lobi kari den sma di e wroko nanga en na ini a preikiwroko, kon na en oso fu dringi wan sani. A e taki: „Mi e firi bun te mi e gi sma sani! Èn mi e kisi bun furu blesi tu.”​—Hebr. 13:1, 2.

17. San Lukas nanga en wefi ben kon frustan?

¹⁷ Kande wi abi a gwenti kaba fu kari sma kon na wi oso. Ma wi kan du sani moro bun? Fu eksempre, Lukas nanga en wefi lobi kari sma kon na den oso. Den ben lobi kari den papa nanga mama, den famiri fu den, den mati, a kring-opziener nanga en wefi, kon na den oso. Ma Lukas e taki: „Wi ben si taki na soso den sma di wi ben sabi bun, wi ben e kari kon na wi oso.” San yepi Lukas nanga en wefi fu kari tra sma kon na den oso?

18. San yepi Lukas nanga en wefi fu kari tra sma kon na den oso?

¹⁸ Lukas nanga en wefi kenki den denki di den prakseri den wortu disi fu Yesus: „Efu unu lobi soso den sma di lobi unu, sortu bun unu du dan?” (Mat. 5:45-47) Den ben frustan taki den ben musu teki na eksempre fu Yehovah di e du bun gi ala sma. Dati meki den bosroiti fu kari brada nanga sisa di den no ben kari kon na den oso ete. Lukas e taki: „Wi alamala e prisiri te wi de nanga makandra. Ala sma e kisi deki-ati.”

19. Fa wi e sori taki wi na disipel fu Yesus èn san yu bosroiti fu du?

¹⁹ Wi si taki te wi lobi wi brada nanga sisa nanga wi heri ati, dan wi o meki en bun nanga den, wi no o desko den èn wi o abi a gwenti fu kari den kon na wi oso. Wi no musu meki noti tapu wi fu lobi wi brada nanga sisa nanga wi heri ati. Efu wi lobi den, dan wi o de koloku èn wi o sori taki wi na trutru disipel fu Yesus.​—Yoh. 13:17, 35.