Aksi fu leisiman
Na Lefitikus 19:16 Gado taigi en pipel fu no „suku fu kiri wan trawan”. Fa wi musu frustan den wortu disi èn san wi kan leri fu en?
Yehovah taigi den Israelsma taki den ben musu de wan santa pipel. Fu yepi den fu du disi, a taigi den: „Un no musu waka lontu e fruteri ogri-ati lei fu trawan. Un no musu suku fu kiri wan trawan. Mi na Yehovah.”—Lef. 19:2, 16.
Fa wi musu frustan den wortu: „Un no musu suku fu kiri wan trawan”? Na ini wan buku fu den Dyu di e taki fu Lefitikus, skrifi: „A pisi disi fu a vers muilek fu frustan fu di na ini Hebrewtongo a skrifi leki wan odo, èn wi no sabi krin san na odo disi wani taki. Disi na san odo e taki: ’No tanapu abrasei, seisei noso krosibei fu wan trawan.’
Son sabiman e taki dati a vers disi abi fu du nanga a vers na fesi pe skrifi: „Un no musu krutu sani na wan kruka fasi. Un no musu teki a sei fu nowan sma, awinsi na wan mofina sma noso wan gudu sma. Un musu krutu sma na wan reti fasi” (Lef. 19:15). Efu dati de so, dan a kan taki vers 16 pe Gado e taki dati den Israelsma no musu ’tanapu abrasei, seisei noso krosibei fu wan trawan’, wani taki dati den no ben musu bedrigi wan trawan te den ben de na fesi krutu noso te den ben e du bisnis. Den no ben musu bedrigi den famiri tu èn den no ben musu du kruka sani fu kisi wini gi densrefi. A tru taki leki Kresten wi no musu du den sortu sani disi tu. Ma wan tra fasi de fa wi kan frustan Lefitikus 19:16.
Luku san a tekst e taki na a bigin. Gado e taigi en pipel taki den no musu waka lontu e fruteri ogri-ati lei fu trawan. Aladi problema kan kon tu te wan sma e waka e taki sani fu trawan, toku wi musu hori na prakseri taki te wan sma e fruteri ogri-ati lei fu trawan, dan dati moro ogri srefi (Odo 10:19; Preik. 10:12-14; 1 Tim. 5:11-15; Yak. 3:6). Nofo tron sma e fruteri ogri-ati lei fu wan trawan fu di den wani pori a sma nen. A kan taki den e du dati, aladi den sabi taki disi kan meki a sma lasi en libi. Kande yu sabi ete taki tu falsi kotoigi ben taki ogri-ati lei fu Nabot èn dati meki sma ston en kiri (1 Kow. 21:8-13). Sobun, yu kan taki dati wan sma di e fruteri ogri-ati lei fu wan trawan, e suku fu kiri a sma soleki fa a skrifi na a lasti pisi fu Lefitikus 19:16.
Boiti dati, wan sma kan fruteri ogri-ati lei fu wan trawan fu di a e teige en. Na 1 Yohanes 3:15, wi e leisi: „Ibri sma di e teige en brada, na wan kiriman. Unu sabi taki nowan kiriman abi têgo libi.” A moi fu si taki baka di Gado taki: „Un no musu suku fu kiri wan trawan”, a e taki: „Un no musu abi bita-ati gi un brada.”—Lef. 19:17.
Sobun, Lefitikus 19:16 abi wan seryusu rai gi Kresten na ini a ten disi. Wi musu luku bun taki wi no e denki takru fu trawan èn taki noiti wi e fruteri ogri-ati lei fu sma. Efu wi ben o du dati, dan yu kan taki dati wi e ’suku fu kiri a sma’ fu di wi e teige en noso fu di wi e dyarusu na en tapu. Wi leki Kresten musu du ala san wi man fu no du den sani disi.—Mat. 12:36, 37.