Fu san ede so furu bita-ati de?

San na bita-ati?

Bita-ati na te wan sma no lobi wan tra sma noso wan grupu fu sma, a no wani si a sma srefisrefi. Bita-ati a no na atibron di wan sma e firi gi wan trawan fu wan pisi ten nomo.

FU SAN EDE SMA E KISI BITA-ATI

Difrenti sani kan meki sma bigin kisi bita-ati. Furu leisi sma e kisi bita-ati gi trawan, fu di den de fu wan spesrutu grupu, ma no fu di den sma dati du wan ogri. Den no e si den sma disi leki bun sma, ma leki sma di de nomonomo fu du den ogri, noso leki sma di no man kenki. Den e si leki den no prenspari, noso leki na den e tyari problema kon. Den sma di a sani disi e miti e kisi bita-ati tu, fu di sma du ogri nanga den, sma no krutu sani gi den na wan retifasi noso tra sani miti den fu di sma no lobi den.

FA BITA-ATI E PANYA

Wan sma kan abi bita-ati gi trawan sondro taki a sabi den sma dati bun. Fu eksempre, sondro taki wan sma sabi a kan teki a takru denki abra fu tra sma di a e lespeki noso di de en mati. Na so bita-ati kan panya makelek na ini wan grupu fu sma di abi a srefi denki.

Te wi frustan o makelek bita-ati e panya, dan dati o yepi wi fu frustan fu san ede so furu sma abi bita-ati. Ma wan tra reide de fu san ede so furu bita-ati de na grontapu. Efu wi wani kon sabi dati, dan wi musu go luku pe bita-ati bigin. Bijbel e sori wi dati.

BIJBEL E SORI PE BITA-ATI BIGIN

LIBISMA NO BEN MEKI FU ABI BITA-ATI. Bita-ati bigin di wan engel opo ensrefi na ini hemel. Bakaten na engel disi kisi a nen Satan Didibri. Didibri „ben de wan kiriman di a bigin” opo ensrefi. Fu di „a de wan leiman èn a tata fu ala lei,” meki a e tan du sani fu meki sma du ogri èn fu kisi bita-ati (Yohanes 8:44; 1 Yohanes 3:11, 12). Bijbel e sori taki a abi ogri-ati, en ati e bron èn taki a de nomonomo fu du ogri nanga sma.​—Yob 2:7; Openbaring 12:9, 12, 17.

WI KAN KISI BITA-ATI FU DI WI ABI SONDU. Adam di ben de a fosi libisma, teki na eksempre fu Satan. Dati meki ala libisma abi sondu en den e meki fowtu (Romesma 5:12). Kain di ben de a fosi pikin fu Adam kiri en eigi brada Abel fu di a ben abi bita-ati gi en (1 Yohanes 3:12). A tru taki furu sma e sori taki den lobi trawan èn taki den e firi gi den. Ma fu di libisma abi sondu meki furu fu den e denki densrefi nomo, den e dyarusu èn den abi heimemre. Den sani disi e meki taki moro nanga moro bita-ati de.​—2 Timoteyus 3:1-5.

TE SMA NO LOBI TRAWAN DI NO DE LEKI DEN. A grontapu disi e gi sma deki-ati fu no abi sari-ati èn fu libi takru nanga trawan. Disi e meki taki sma e kisi moro bita-ati. Sma no lobi trawan di no de leki den, den e krutu trawan sondro fu sabi fa den de trutru, den e taki noso du hati sani nanga sma èn sma e pori tra sma sani fu di „heri grontapu de na ini na makti fu na ogriwan,” Satan Didibri.​—1 Yohanes 5:19.

Ma Bijbel no e sori nomo fa bita-ati bigin. A e sori wi tu fa a problema disi o lusu.