Wan ten te bita-ati no o de moro!
Awinsi wi no abi bita-ati gi trawan moro, toku wi no man tapu den fu abi bita-ati. Furu leisi na sma di no du noti e firi den takru bakapisi fu a fasi disi. Suma man stop bita-ati fu ala ten?
Na Yehovah Gado wawan man puru ala bita-ati di wi e si na wi lontu èn dati na san Bijbel e pramisi.—Odo 20:22.
GADO O PURU DEN SANI DI E MEKI TAKI BITA-ATI DE
1. SATAN DIDIBRI. Satan na a engel di ben opo ensrefi teige Gado. En na a sma di e meki taki so furu bita-ati de. Gado o kiri Satan nanga ala den sma di abi bita-ati gi trawan.—Psalm 37:38; Romesma 16:20.
2. NA OGRI GRONTAPU FU SATAN. Gado o puru iniwan sani di e meki taki bita-ati de. Sani soleki den kruka politiek man nanga kerki fesiman di e gi sma deki-ati fu abi bita-ati. Gado o pori den gridi bisnis man tu di kruka èn di e meki moni na sma tapu.—2 Petrus 3:13.
3. SONDU. Bijbel e sori taki ala libisma abi sondu. Den abi a firi fu denki èn du sani di no bun (Romesma 5:12). Wan fu den firi dati na bita-ati. Gado o yepi libisma fu no abi den firi disi moro èn na so bita-ati o kaba fu ala ten. —Yesaya 54:13.
BIJBEL E PRAMISI WI WAN GRONTAPU SONDRO BITA-ATI
1. KRUKTUDU NO O DE MORO. A Kownukondre fu Gado o tiri grontapu. A o tiri komoto fu hemel èn ala ten a o du sani na wan reti fasi (Danièl 2:44). Sma no o krutu trawan moro èn nowan sma o abi bita-ati gi trawan. Gado o puru ala ogri di sma e miti now èn a o du sani na wan reti fasi.—Lukas 18:7.
2. ALA SMA O ABI FREIDE. Nowan sma o pina fu di ogri nanga feti de (Psalm 46:9). Den sma di o libi na grontapu o lobi freide èn den no o frede moro.—Psalm 72:7.
3. ALA SMA O ABI WAN BUN LIBI FU ALA TEN. Ala sma o sori trutru lobi gi makandra (Mateyus 22:39). Nowan sma o pina. Den no o prakseri den sani moro di ben meki den sari èn di ben e gi den broko-ede (Yesaya 65:17). Te bita-ati no de moro, dan ala sma „o prisiri srefisrefi fu di freide o de pasa marki.”—Psalm 37:11.
Yu wani libi na ini so wan grontapu? Nownow kaba furu sma e leri fu no abi bita-ati moro, fu di den e du san Bijbel e taki (Psalm 37:8). Dati na san Yehovah Kotoigi na heri grontapu e du. Den lobi makandra èn den e libi leki wan famiri, aladi den de fu difrenti kondre nanga kulturu.—Yesaya 2:2-4.
Yehovah Kotoigi e breiti fu leri sma san e yepi den te sma e desko den noso te den e du ogri nanga den. Den sani di yu o leri, kan yepi yu fu puru iniwan firi di kan meki taki yu kisi bita-ati èn den o yepi yu fu kon lobi tra sma. Yu kan leri fa fu libi bun nanga tra sma, srefi nanga sma di no de nanga tangi èn di e sori bita-ati. Dati o yepi yu fu de koloku nownow kaba èn yu o man libi moro bun nanga trawan. Boiti dati yu o si tu san yu kan du fu libi na a ten te Gado Kownukondre o tiri grontapu èn te bita-ati no de moro.—Psalm 37:29.