WI MAN STOP BITA-ATI

4 | Gado kan yepi yu fu no abi bita-ati moro

Bijbeltekst:

„Den fasi di a yeye e meki sma kisi na lobi, prisiri, freide, langa pasensi, switifasi, bun-ati, bribi, safri-ati, a dwengi di wan sma man dwengi ensrefi.”—GALASIASMA 5:22, 23.

San a wani taki:

Gado kan yepi wan sma fu no abi bita-ati moro. A santa yeye fu en kan yepi wi fu kisi moi fasi di noiti wi ben o man abi efu ensrefi no yepi wi. Sobun, na presi fu suku fu stop bita-ati wisrefi, a bun fu aksi Gado fu yepi wi. Efu wi du dati wi o si taki a sani di na apostel Paulus taki na tru. A ben skrifi: „Mi man du ala sani nanga yepi fu a sma di e gi mi krakti” (Filipisma 4:13). Èn wi o man taki: ’Mi yepi e komoto fu Yehovah.’—Psalm 121:2.

San yu kan du:

„Mi ben de wan ogri-ati man, ma Yehovah kenki mi kon tron wan man di lobi freide.”—WALDO

Begi Yehovah nanga yu heri ati èn aksi en fu gi yu en santa yeye (Lukas 11:13). Aksi en fu yepi yu fu sori den moi fasi fu en na ini yu libi. Ondrosuku san Bijbel e taki fu den fasi di kan yepi yu fu no abi bita-ati moro. Fasi leki lobi, freide, pasensi nanga dwengi yusrefi. Suku okasi fu sori den fasi disi na ini yu eigi libi èn moksi nanga sma di e suku fu abi den fasi disi tu. Den sma disi kan gi yu „deki-ati fu abi lobi èn fu du bun wroko.”—Hebrewsma 10:24.

Wan tori di pasa trutru—WALDO

Wini bita-ati

A libi no ben makelek gi Waldo di a ben yongu. Disi ben meki a kon kisi furu bita-ati. A e fruteri: „Mi ben gwenti feti na strati nanga sma di ben e seri drugs. . . . Wan leisi wan grupu ogri man pai wan sma fu kiri mi, ma mi ben man lowe gowe baka di a dyuku mi nanga wan nefi.”

Waldo no ben breiti di en frow bigin studeer Bijbel nanga Yehovah Kotoigi. A e taki: „Mi ben e teige den Kotoigi èn nofo tron mi ben e bari sani kosi den. Ma noiti den ben e kosi mi baka.”

Baka wan pisi ten Waldo bigin studeer Bijbel. A e taki: „A no ben makriki fu du den sani di mi ben e leri. Mi ben denki taki noiti mi o man basi a faya-ati fu mi.” Ma wan sani di a leri na ini Bijbel kenki en libi.

Waldo e taki: „Wan dei, Alejandro, a brada di ben e studeri Bijbel nanga mi aksi mi fu leisi Galasiasma 5: 22, 23. . . . Alejandro fruteri mi taki mi no ben o man kweki den fasi disi nanga mi eigi krakti, ma nanga yepi fu Gado en santa yeye. A sani disi meki mi kisi wan heri tra denki fu sani!”

Waldo ben man stop a bita-ati di a ben abi gi trawan fu di a meki Gado yepi en. A e taki: „Den famiri fu mi nanga den mati di mi ben abi fosi no man bribi taki mi kenki so. A e taki tu: „Fosi, mi ben de wan ogri-ati man, ma Yehovah kenki mi kon tron wan man di lobi freide.”