WI MAN STOP BITA-ATI

3 | Kenki yu denki

Bijbeltekst:

„Kenki un denki, so taki unu kan kenki un libi. Dan unu o sabi san na a wani fu Gado di bun, di e gi en prisiri, èn di no e mankeri noti.”—ROMESMA 12:2.

San a wani taki:

A fasi fa wi e prakseri prenspari gi Gado (Yeremia 17:10). Wi musu du ala muiti fu no taki noso du hati sani nanga trawan fu di wi abi bita-ati. Ma wi musu du moro leki dati srefi. No frigiti taki bita-ati na wan sani di e bigin na ini wi ati nanga wi prakseri. Dati meki wi musu du ala muiti fu no denki sani di kan meki wi kisi bita-ati. Na dati wawan kan yepi wi fu „kenki” èn fu stop bita-ati.

San yu kan du:

De eerlijk èn ondrosuku fa yu e denki fu tra sma, spesrutu fu den sma di de fu wan tra kondre noso fu wan tra ras. Aksi yusrefi: ’Fa mi e si den? A fasi fa mi e si den abi fu du nanga san misrefi sabi fu den? Noso mi e krutu den sondro fu sabi fa den de trutru?’ No luku sani tapu Internet, felem noso tra sani di e sori fa sma abi bita-ati èn fa den e du ogri nanga trawan.

A Wortu fu Gado kan yepi wi fu puru bita-ati na ini wi ati nanga wi frustan

A no ala ten a makelek fu ondrosuku wisrefi èn fu kon sabi fa wi e firi èn e denki fu den sani disi. Ma a Wortu fu Gado kan yepi wi fu ’si krin san wi e denki na ini wi ati èn san wi abi na prakseri fu du’ (Hebrewsma 4:12). Sobun tan ondrosuku Bijbel. Luku efu den sani di yu e prakseri de a srefi leki den sani di skrifi na ini Bijbel èn du muiti fu tyari kenki kon na ini a fasi fa yu e denki. A Wortu fu Gado kan yepi wi fu wini bita-ati, wan firi di kan „tanapu steifi leki wan fortresi” na ini wi ati nanga wi frustan.—2 Korentesma 10:4, 5.

Wan tori di pasa trutru—STEPHEN

Kenki a fasi fa a ben e denki

Weti sma ben sori bita-ati gi Stephen nanga en famiri èn den ben du ogri nanga den. Dati meki Stephen go na ini wan politiek grupu di ben e feti gi den reti fu sma. Na a srefi ten dati a ben e du ogri fu di a ben abi bita-ati. Stephen e taki: „Wanwan leisi mi nanga den mati fu mi ben e go luku felem di ben e sori fa den wetiman fu Amerkankondre ben e pina den srafu di ben komoto fu Afrika. Den sani di wi ben si ben meki wi ati bron so te taki wi ben e fon den wetiman di ben kon drape fu luku a felem. Baka dati wi ben e go suku moro sma fu fon na ini den birti pe den wetiman ben e libi.”

A fasi fa Stephen ben e denki kon kenki di a bigin studeer Bijbel nanga Yehovah Kotoigi. A e taki: „Fosi mi no ben lobi tra ras, ma di mi si fa den Kotoigi ben e libi nanga makandra dan a sani dati naki mi ati. Fu eksempre, wan leisi di wan Kotoigi di ben de wan wetiman ben e go na wan tra kondre, dan a libi den pikin fu en gi wan Kotoigi di ben de wan blakaman. Boiti dati, wan tu wetiman ben meki wan blaka boi di no ben abi presi fu tan, kon libi na den oso.” Stephen ben kon si krin taki den Yehovah Kotoigi e libi makandra leki wan famiri èn den e meki a sani di Yesus ben taki kon tru. Dati na taki den ben o lobi makandra trutru.—Yohanes 13:35.

San yepi Stephen fu no du ogri èn fu no abi bita-ati moro? Romesma 12:2 yepi en. A e taki: „Mi kon si taki mi ben musu kenki a fasi fa mi e denki. A no mi denki wawan mi ben musu kenki fu man lobi tra sma, ma mi ben musu kon si taki disi na a moro bun fasi fa wan sma kan libi.” Now na moro leki 40 kaba Stephen e prisiri fu di a no abi bita-ati gi trawan.