’Tan du san yu leri’

1. Sortu wini wi e kisi te wi e fruteri trawan fa wi kon na ini waarheid?

„FA YU kon na ini waarheid?” A no de fu taki dati yu piki na aksi dati furu leisi. Dati na wan fu den fosi sani di wan brada noso sisa o aksi wi te wi e miti den. Wi lobi fu yere fa wi brada nanga sisa kon sabi èn lobi Yehovah. Nanga prisiri wi e fruteri den tu fa wi lobi fu de na ini waarheid (Rom. 1:11). Den sortu takimakandra disi e yepi wi fu tan si a waarheid leki wan sani di wi e warderi trutru. Den takimakandra disi e yepi wi tu fu tan du den sani di wi leri, noso fu tan libi na wan fasi di Yehovah feni bun.​—3 Yoh. 4.

2. San wi o luku na ini na artikel disi?

² Na ini na artikel disi wi o luku wan tu reide baka fu san ede wi lobi a waarheid. Baka dati wi o luku fa wi kan tan sori taki wi lobi a waarheid trutru. A no de fu taki dati den sani disi o meki wi kisi moro warderi gi san Yehovah du gi wi di a hari wi kon na ini a waarheid (Yoh. 6:44). Boiti dati, a o gi wi deki-ati tu fu fruteri trawan den tru tori fu Bijbel.

FU SAN EDE WI LOBI A WAARHEID

3. San na a moro prenspari reide fu san ede wi lobi a waarheid?

³ Furu reide de fu san ede wi lobi a waarheid. A moro prenspari reide na taki wi lobi Yehovah Gado, a sma fu pe ala sani di de tru e komoto. Nanga yepi fu en Wortu, Bijbel, wi kon sabi en leki na Almaktiwan di meki hemel nanga grontapu èn leki wi lobi-ati hemel Tata di e broko en ede nanga wi (1 Petr. 5:7). Wi sabi taki a Gado fu wi „abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki” (Eks. 34:6). Yehovah lobi retidu (Yes. 61:8). A e hati en te a e si taki wi e pina. Dati meki a e angri fu tyari wan kaba kon na pina èn a o du dati na a ten di a poti (Yer. 29:11). Wi srefi e angri fu si a tumusi moi ten dati! Dati meki wi lobi Yehovah so te!

4-5. Fu san ede na apostel Paulus agersi a howpu fu wi nanga wan ankra?

⁴ San na wan tra reide fu san ede wi lobi a waarheid? Wi e kisi furu wini fu a waarheid. Luku wan eksempre. Den tru tori na ini Bijbel e gi wi wan howpu gi a ten di e kon. Na apostel Paulus e gebroiki wan agersitori fu sori o prenspari a howpu dati de di a skrifi: „A howpu fu wi de leki wan ankra gi wi libi. A tranga èn a e hori wi tanapu” (Hebr. 6:19). Neleki fa wan ankra e hori wan boto na en presi, na so a howpu di Bijbel e gi wi e hori wi tanapu te wi e kisi tesi na ini wi libi.

⁵ Na ini den vers fu a kapitel disi, Paulus e taki fu a howpu di salfu Kresten abi fu go na hemel. Den salfu Kresten e warderi a howpu disi trutru. Ma den wortu fu Paulus abi fu du tu nanga Kresten di abi a howpu fu libi fu têgo na ini wan paradijs na grontapu (Yoh. 3:16). Iya, di wi kon sabi taki wi abi a howpu fu libi fu têgo, dan wi kon de moro koloku fu di wi e frustan fu san ede wi de na libi.

6-7. Sortu wini Yvonne kisi di a kon sabi san o pasa na ini a ten di e kon?

⁶ Luku na ondrofenitori fu wan sisa di nen Yvonne. A sisa disi no gro kon na ini waarheid èn di a ben pikin a ben frede dede. A e memre ete taki a ben leisi wan sani di a no ben man frigiti: „Ala sma o dede wan dei.” A e taki: „Den wortu dati meki taki mi no ben sribi te neti fu di mi ben e denki a ten di e kon. Mi ben prakseri: ’Na fu a sani disi wi de na libi nomo? Moro no de? Fu san ede mi de na libi?’ Mi no ben wani dede.”

⁷ Bakaten di Yvonne kon moro bigi, a miti Yehovah Kotoigi. A e fruteri: „Mi bigin bribi taki mi kan abi a howpu now fu libi fu têgo na ini Paradijs na grontapu.” Sortu wini a sisa fu wi kisi di a kon leri sabi a waarheid? A e taki moro fara: „Mi man sribi now te neti fu di mi no e broko mi ede moro nanga a ten di e kon noso nanga dede.” A de krin taki Yvonne lobi a waarheid èn a lobi fruteri trawan fu a moi howpu gi a ten di e kon.​—1 Tim. 4:16.

8-9. (a) O prenspari a gudu ben de gi a man na ini Yesus agersitori? (b) Fa yu e si a waarheid?

⁸ A bun nyunsu fu Gado Kownukondre na wan tra tru tori na ini Bijbel. Yesus ben agersi den tru tori di abi fu du nanga a Kownukondre, nanga wan gudu di kibri. Na Mateyus 13:44 Yesus e taki: „A Kownukondre fu hemel de leki wan gudu di kibri na ini wan gron. Dan wan man feni en èn a go kibri en baka. A e prisiri so te, taki a e go seri ala den sani fu en èn a e bai a gron.” Luku taki a man no ben e suku a gudu. Ma di a feni en, a seri ala den sani fu en soso fu man abi a gudu. Iya, a libi ala sani na baka fu man abi a gudu dati. Fu san ede a du dati? Fu di a ben sabi o warti a gudu de. A gudu ben warti moro iniwan sani di a ben libi na baka.

⁹ Na so yu e si a waarheid tu? Iya, seiker. Wi sabi taki nowan tra sani na ini a grontapu disi e gi wi moro prisiri leki fu dini Yehovah èn fu abi a howpu fu libi fu têgo na ondro a tiri fu Gado Kownukondre. A grani di wi abi fu de wan mati fu Yehovah warti moro iniwan sani di wi libi na baka fu man abi a matifasi dati. A sani di e gi wi moro prisiri na fu tyari wisrefi na wan fasi „di Yehovah feni bun”.​—Kol. 1:10.

10-11. San meki taki Michael tyari bigi kenki kon na ini en libi?

¹⁰ Furu fu wi libi furu sani na baka so taki Yehovah kan feni wi bun. Son sma libi wan bun wroko pe den ben kan meki en na ini a grontapu disi. Trawan no e feti baka gudu moro. Tra sma baka, drai den heri libi di den kon leri sabi Yehovah. Na dati Michael du. A no gro kon na ini waarheid. Di a ben de wan yongu man, a leri fu feti karate. A e taki: „Mi ben si en leki wan tumusi prenspari sani fu train mi skin bun. Son leisi mi ben e firi leki noti no man pasa nanga mi.” Ma di Michael bigin studeri Bijbel, a kon si fa Yehovah e denki fu ogridu (Ps. 11:5). Michael e taki fu a trowpaar di ben studeri nanga en: „Noiti den no taigi mi taki mi musu stop nanga karate. Den tan leri mi den tru tori fu Bijbel nomo.”

¹¹ O moro Michael ben e leri fu Yehovah, o moro a ben kon lobi En. A sani di ben naki en ati trutru, na a lobi di Yehovah abi gi den anbegiman fu en. Bakaten, Michael kon frustan taki a ben musu tyari bigi kenki kon na ini en libi. A e taki: „Mi ben sabi taki a no ben o makelek srefisrefi gi mi fu stop nanga karate. Ma mi ben sabi tu taki Yehovah ben o feni dati bun. Mi ben de seiker taki nowan fu den sani di mi ben o libi na baka ben warti moro leki fu dini Yehovah.” Michael ben sabi taki den tru tori di a kon sabi warti srefisrefi gi en èn na den sani dati meki taki a tyari bigi kenki kon na ini en libi.​—Yak. 1:25.

12-13. Fa den tru tori na ini Bijbel yepi Mayli?

¹² Fu sori o prenspari a waarheid de, Bijbel e agersi a waarheid nanga wan lampu di e skèin na ini a dungru (Ps. 119:105; Ef. 5:8). Mayli, di e libi na Aserbadyan, abi furu warderi gi a yepi di a kisi fu Gado Wortu. Di a ben e gro kon, en papa nanga mama no ben abi a srefi bribi. En papa ben de Moslim èn en mama ben de Dyu. Mayli e taki: „Noiti mi ben e tweifri taki Gado de, ma mi ben abi furu aksi. Mi ben aksi misrefi: ’Fu san ede Gado meki libisma? Fu san ede wan sma musu pina en heri libi langa efu a musu pina fu têgo tu na ini hel?’ Fu di sma e taki dati ala sani di e pasa na fu di Gado wani en so, meki mi ben aksi misrefi: ’A de so taki Gado e du nanga libisma san a wani èn taki lobi fu si fa den e pina?’”

¹³ Mayli tan suku piki tapu den aksi fu en. Baka wan pisi ten a bigin studeri Bijbel èn a tron wan Kotoigi fu Yehovah. A e taki: „A krin fasi fa Bijbel e taki fu den sani fu a libi, yepi mi fu frustan sani moro bun èn a yepi mi fu de moro koloku. Den tru tori di mi feni na ini Gado Wortu, e meki mi abi wan korostu firi.” Neleki Mayli, wi alamala e prèise Yehovah „a sma di kari [wi] komoto na ini a dungru fu kon na ini en tumusi moi leti”.​—1 Petr. 2:9.

14. Fa wi kan kon lobi a waarheid moro? (Luku a faki tu di nen „Tra agersitori”.)

¹⁴ Disi na wan tu eksempre nomo di e sori fa a waarheid prenspari srefisrefi. A no de fu taki dati yu abi omeni tra eksempre tu. Fu san ede yu no e ondrosuku sani moro fini fu kon sabi sortu tra reide de fu lobi a waarheid? O moro wi lobi a waarheid, o moro wi o feni fasi fu sori taki wi lobi en.

FA WI E SORI TAKI WI LOBI A WAARHEID

15. San na wan fasi fa wi kan sori taki wi lobi a waarheid?

¹⁵ Wi kan sori taki wi lobi a waarheid te wi e studeri Bijbel nanga den buku fu wi doronomo. Awinsi o langa wi de na waarheid, wi kan leri moro ala ten. A fosi leisi di a tijdschrift disi kon na doro, a ben taki: „Den tru tori fu Gado de leki wan pikin bromki di e gro na mindri takru wiwiri. Neleki fa takru wiwiri e suku fu tyokro a pikin bromki disi, na so falsi leri e suku fu tapu pasi gi den tru tori fu Gado. Efu yu wani feni a pikin bromki disi, dan yu musu tan suku en. . . . Efu yu wani piki en, dan yu musu bukundu fu piki en. No breiti nanga wán bromki nomo. . . . Suku fu feni moro nanga moro fu den.” Wi musu meki tranga muiti fu studeri, ma a muiti dati no de fu soso.

16. Fa yu e studeri Bijbel? (Odo 2:4-6)

¹⁶ A no ala sma lobi leisi èn studeri. Ma Yehovah e gi wi a deki-ati fu „tan suku”, so taki wi man frustan waarheid moro bun. (Leisi Odo 2:4-6.) Te wi e meki a muiti disi, dan wi o kisi wini ala ten. Te Corey e leisi Bijbel, dan a e poti prakseri na ibri vers. A brada disi e taki: „Mi e leisi ala den futuwortu, mi e suku ala den tekst di abi fu du nanga a vers dati èn mi e ondrosuku tra sani tu. . . . Mi e leri so furu sani te mi e studeri na a fasi disi.” Wi kan studeri na a fasi disi noso na wan tra fasi. Ma awinsi fa a no fa, wi e sori warderi gi a waarheid te wi e teki ten fu leisi Bijbel èn te wi e meki muiti fu studeri en.​—Ps. 1:1-3.

17. Fu san ede a no nofo fu studeri Bijbel nomo? (Yakobus 1:25)

¹⁷ Wi sabi taki a no nofo fu studeri Bijbel nomo. Efu wi wani kisi wini trutru, dan wi musu du den sani di wi e leri. Soso te wi e du dati, dan a waarheid o meki wi de koloku trutru. (Leisi Yakobus 1:25.) Fa wi kan sorgu taki wi e du den sani di wi e leri? Wan brada e taki dati wi kan luku wi eigi libi fu si efu wi e du den sani di wi leri èn na sortu sani wi musu wroko ete. Na apostel Paulus taki en so: „Efu a de so taki wi go na fesi kaba, dan meki wi tan go na fesi na a srefi fasi.”​—Fil. 3:16.

18. Fu san ede wi e du muiti fu ’tan du san wi leri’?

¹⁸ Prakseri den wini di wi e kisi te wi e tan du muiti fu ’du den sani di wi leri’. A libi fu wi e kon moro bun èn Yehovah nanga den brada nanga sisa fu wi o breiti nanga wi (Odo 27:11; 3 Yoh. 4). Disi na den moro bun reide fu lobi a waarheid èn fu du den sani di wi leri, yu no feni dati tu?