1 | Begi „Trowe ala un hebi na en tapu”

BIJBEL E TAKI: „Trowe ala un hebi na tapu [Gado], bika a e broko en ede nanga unu.”—1 PETRUS 5:7.

San a tekst disi wani taki

Yehovah Gado e aksi wi fu taki nanga en fu iniwan problema di e gi wi broko-ede (Psalm 55:22). Nowan problema bigi tumusi noso pikin tumusi fu begi fu dati. Efu a prenspari gi wi, a prenspari gi Yehovah tu. A prenspari fu begi Yehovah, fu di dati o yepi yu fu firi moro bun.—Filipisma 4:6, 7.

Fa begi kan yepi

Te wi depressief èn te wi abi den sortu siki di e meki taki wi e firi brokosaka doronomo, dan wi kan firi leki wi de wi wawan fu di tra sma no e frustan ala ten fa wi e firi (Odo 14:10). Ma te wi e fruteri Gado krin fa wi e firi, dan ala ten a o arki wi nanga pasensi èn a o frustan wi. Yehovah e si wi, a sabi sortu pen nanga sortu problema wi abi, èn te wi e begi, a wani meki wi fruteri en ala sani di e gi wi broko-ede.—2 Kroniki 6:29, 30.

Te wi e taki nanga Yehovah na ini begi, dan dati e tranga a frutrow di wi abi taki a e broko en ede nanga wi. Wi kan firi leki a psalm skrifiman di ben begi: „Yu si a banawtu fu mi. Yu sabi heri bun fa mi e pina” (Psalm 31:7). Te wi sabi taki Yehovah e si san e miti wi, dan dati kan yepi wi kaba fu horidoro te a libi hebi gi wi. Ma a no e si nomo sortu problema wi abi. Moro leki iniwan tra sma, Yehovah e frustan fa wi e firi èn a e yepi wi fu feni trowstu nanga deki-ati na ini Bijbel.

Fa Bijbel e yepi Julian

Fa frede nanga broko-ede abi krakti tapu mi

„Mi abi wan siki di e meki taki mi e frede èn e broko mi ede srefisrefi, nanga wan tra siki di e meki taki mi e du son sani ibri tron baka èn mi no man dwengi misrefi fu no du den. Mi kan frede wantronso sondro taki mi fruwakti dati. A wan momenti mi e firi bun èn a tra momenti mi e frede somaar so. Mi e frede spesrutu te mi de nanga tra sma, fu di mi e broko mi ede doronomo nanga san den e denki fu mi.

Den mati fu mi di sabi a situwâsi fu mi e du san den man fu yepi mi. Ma son leisi den e taki sani di no e yepi mi. Toku mi e warderi a muiti di den e meki fu yepi mi.

Son leisi te den sani disi e pasa nanga mi, dan a e muilek gi mi fu begi. Mi musu meki furu muiti fu man focus tapu san mi e taigi Yehovah. Disi de so fu di den prakseri fu mi e dyompo fu a wan sani go na a trawan èn a e pasa so snel taki a e bruya mi frustan. Te mi ede e bruya so, dan a e muilek gi mi fu focus èn fu fruteri Yehovah fa mi e denki èn fa mi e firi.”

A fasi fa Bijbel yepi mi

„Di mi studeri Bijbel, mi leri taki mi no abi fu begi langa èn mi no abi fu taki kefalek bun fu meki Gado arki mi. Son leisi te mi no man taki fa mi e firi, dan mi e taki disi nomo: ’Ke Yehovah, yepi mi.’ Awinsi mi begi so wan syatu begi, toku mi e firi taki Yehovah e frustan mi èn taki a e gi mi san mi abi fanowdu na a momenti dati. Boiti taki mi e tan begi, mi go suku datrayepi tu. Mi e prisiri taki a begi di mi e begi Yehovah nanga a datrayepi di mi kisi, yepi mi fu firi moro bun. Awinsi mi musu du bun furu muiti fu aksi mi hemel Papa fu yepi mi, toku mi e du en fu di mi de seiker taki a lobi mi èn taki a wani yepi mi.”