3 | Kisi wini fu den eksempre di de ini Bijbel

BIJBEL E TAKI FU . . . Man nanga uma di ben abi „den srefi firi leki wi” èn di ben tai hori na Gado.—YAKOBUS 5:17.

San a tekst disi wani taki

Na ini Bijbel wi kan leisi furu tori fu man nanga uma di ben e feti nanga difrenti firi. Te wi e leisi den tori disi, dan kande wi o si taki wan fu den ben e firi a srefi fasi leki wi.

Fa a sani disi kan yepi wi

Wi alamala abi sma fanowdu di e frustan fa wi e firi èn dati de spesrutu so te wi e stress hebi. Te wi e leisi Bijbel, dan wi e leisi fu mansma nanga umasma di ben e denki èn firi a srefi fasi leki wi. Disi o meki wi si taki tra sma ben e abi den srefi sortu problema leki wi èn disi o meki taki wi no o firi leki wi de wi wawan te den prakseri fu wi e trobi wi.

Bijbel abi furu tekst pe wi kan leisi taki sma ben e firi leki den no warti noti èn taki den ben lasi-ati. Oiti yu taki na yusrefi: ’Mi no man nanga a libi disi moro?’ Moses ben firi so èn Elia nanga David ben firi so tu.—Numeri 11:14; 1 Kownu 19:4; Psalm 55:4.
Bijbel e fruteri wi fu wan uma di nen Hana. Na uma disi „ben e sari srefisrefi” fu di a no man kisi pikin èn a tra wefi fu en masra ben e tanteri en doronomo.—1 Samuel 1:6, 10.
Bijbel e fruteri fu wan man di ben nen Yob. Kande wi e firi leki a man disi son leisi. Aladi Yob ben abi wan tranga bribi, toku den firi fu en ben abi krakti na en tapu èn a ben brokosaka srefisrefi. Dati meki a ben taki wan leisi: „Mi e tegu gi a libi disi. Mi no wani libi fu ala ten.”—Yob 7:16.

Te wi e leisi fa den sma disi ben horidoro aladi den ben firi son leisi leki den no warti noti, dan dati o gi wi a deki-ati di wi abi fanowdu fu man horidoro te a libi e hebi gi wi.

Fa Bijbel e yepi Kevin

Fa bipolaire stoornis abi krakti tapu mi

„Di mi ben abi bijna 50 yari, datra kon si taki mi abi wan siki di nen bipolaire stoornis.” A siki disi e meki taki a fasi fa wan sma e firi èn e tyari ensrefi kan kenki wantronso. „Son leisi mi e firi leki mi kan lusu iniwan problema di kon ini mi libi. Ma tra leisi baka mi e firi leki mi no wani libi moro.”

Fa Bijbel e yepi mi

„Petrus na wan fu den sma ini Bijbel di ben de na ini wan srefi sortu situwâsi leki mi. A ben meki fowtu di ben e meki taki a firi leki a no warti noti. Ma na presi fu tan denki so, Petrus go na den mati fu en di ben e broko den ede nanga en. Son leisi te a siki fu mi de na tapu, dan den fowtu fu mi e meki mi firi leki mi no warti noti. Neleki Petrus, mi leri fu meki muiti fu tan moksi nanga den mati fu mi di wani yepi mi fu horidoro.

„Wan tra sma ini Bijbel di de wan bigi trowstu gi mi, na Kownu David. Furu tron a situwâsi fu en ben e meki a firi brokosaka èn a ben sari srefisrefi te a ben prakseri den fowtu di a ben meki ini en libi. Wan srefi sortu sani e pasa nanga mi tu. Son leisi mi e taki noso du sani di e hati mi bakaten. Den wortu fu David di skrifi na ini Psalm 51 e trowstu mi. Na ini vers 3, a e taki: ’Mi sabi sortu fowtu mi meki, èn doronomo a sondu fu mi de na mi fesi.’ Na so mi e firi tu te mi brokosaka, fu di na den momenti dati a muilek gi mi fu denki bun fu misrefi. Ma mi e frustan tu san David e taki na ini vers 10. Drape a e taki: ’Gado, mi e begi yu, meki mi kon abi wan krin ati èn meki mi kisi wan nyun denki, so taki mi no degedege.’ Mi e gebroiki den srefi sortu wortu disi te mi e begi Gado fu yepi mi fu no denki takru fu misrefi. Leki lasti, vers 17 e trowstu mi trutru. A e taki: ’Mi Gado, yu no o tapu yu ai gi wan sma di firi brokosaka.’ A vers disi e gi mi a dyaranti taki Gado lobi mi.

„Te mi e poti prakseri na den eksempre fu sma na ini Bijbel èn te mi e luku san Gado e du gi mi nownow kaba, dan a howpu di mi abi gi a ten di e kon e kon moro tranga. A de neleki mi e si kaba fa den pramisi na ini Bijbel o kon tru èn dati e yepi mi fu horidoro.”