Fa Yehovah e piki den begi fu wi

1-2. San wi kan aksi wisrefi te a abi fu du nanga den begi fu wi?

A PSA wan leisi kaba taki yu aksi yusrefi efu Yehovah e piki den begi fu yu? Efu dati de so, dan yu a no a wan-enkri sma di du dati. Furu brada nanga sisa taki dati den aksi densrefi a sani disi, spesrutu di den ben abi problema. Te a libi hebi gi wi, dan a e muilek gi wi fu si fa Yehovah e piki den begi fu wi.

² Meki wi go luku fu san ede wi kan de seiker taki Yehovah e piki den begi fu den sma di e anbegi en (1 Yoh. 5:15). Wi o taki tu fu den aksi disi: Fu san ede a kan gersi son leisi leki Yehovah no e piki den begi fu wi? Na sortu fasi Yehovah e piki den begi fu wi na ini a ten disi?

SON LEISI YEHOVAH E PIKI DEN BEGI FU WI NA WAN FASI DI WI NO BEN FRUWAKTI

3. Fu san ede Yehovah wani taki wi begi en?

³ Bijbel e sori wi krin taki Yehovah abi bigi lobi gi wi èn taki a e si wi leki en gudu (Hag. 2:7; 1 Yoh. 4:10). Dati meki a e aksi wi fu begi en, so taki a kan yepi wi (1 Petr. 5:6, 7). A wani yepi wi fu tan krosibei na en èn fu horidoro te problema e miti wi.

4. Fa wi du sabi taki Yehovah e piki den begi fu den sma di e anbegi en? (Luku a fowtow.)

⁴ Na furu presi ini Bijbel wi e leisi taki Yehovah piki den begi fu den sma di e anbegi en. Yu sabi wan eksempre fu dati? Iya, Kownu David na wan fu den. A ben abi furu ogri-ati feanti èn dati meki a ben gwenti begi Yehovah fu a yepi en. Wan leisi a begi: „Yehovah, arki a begi fu mi. Poti yesi arki a fayafaya begi fu mi. Yu na wan Gado fu retidu èn yu e du ala ten san yu pramisi. Sobun, piki mi” (Ps. 143:1). Yehovah piki a begi fu David èn a frulusu en (1 Sam. 19:10, 18-20; 2 Sam. 5:17-25). Dati meki David ben kan taki nanga en heri ati: „Yehovah de krosibei fu ala den wan di e kari en.” Wi srefi kan de seiker fu dati.​—Ps. 145:18.

5. Gi wan eksempre di e sori taki a no ala ten Yehovah e piki den begi fu den futuboi fu en na a fasi fa den ben fruwakti. (Luku a fowtow.)

⁵ A kan taki Yehovah no e piki den begi fu wi na a fasi fa wi ben fruwakti. Na apostel Paulus ben ondrofeni a sani dati. A ben abi wan muilek problema di Bijbel e kari ’wan maka na ini en skin’. Dri leisi a begi Yehovah fu puru a problema disi gi en. Yehovah piki a begi fu en? Iya, ma a no leki fa a ben howpu. Yehovah no puru a problema gi Paulus, ma a gi en a krakti di a ben abi fanowdu fu tan dini en.​—2 Kor. 12:7-10.

6. Fu san ede a kan gersi son leisi leki Yehovah no e piki den begi fu wi?

⁶ Na ini a ten disi, Yehovah kan piki den begi fu wi tu na wan fasi di wi no ben fruwakti. Ma wi kan de seiker taki Yehovah sabi heri bun fa a musu yepi wi. A kan „du moro leki iniwan sani di wi e aksi noso prakseri” (Ef. 3:20). Dati meki a kan pasa son leisi taki a e piki den begi fu wi na wan ten noso na wan fasi di wi no ben fruwakti.

7. Fu san ede wi musu kenki prakseri son leisi èn aksi Yehovah wan tra sani ini begi? Gi wan eksempre.

⁷ Son leisi a kan taki Yehovah no e piki wan begi fu wi. Te wi kon si dati, dan wi musu kenki prakseri èn begi Yehovah fu wan tra sani. Luku na eksempre fu Martin Poetzinger. Syatu baka di Brada Poetzinger trow, a ben musu koti strafu na ini den strafuman-kampu fu den Nazisma. Na a bigin a begi Yehovah fu meki a komoto na ini a strafuman-kampu so taki a ben kan sorgu gi en frow èn bigin preiki baka. Ma baka tu wiki a si taki Yehovah no opo a pasi gi en so taki a kan kon fri. Ne a bigin begi: „Yehovah, mi e begi yu, sori mi san yu wani taki mi musu du.” Baka dati a bigin prakseri o muilek den brada na ini a strafuman-kampu ben abi en. Furu fu den ben e broko den ede fu di den ben e prakseri den frow nanga den pikin. Now Brada Poetzinger bigin begi: „Yehovah, grantangi gi a nyun toewijzing disi. Yepi mi so taki mi kan gi den brada fu mi deki-ati.” Na dati Brada Poetzinger du tu na ini den neigi yari di a ben de na strafu.

8. Sortu prenspari sani wi musu hori na prakseri te wi e begi?

⁸ Wi no musu frigiti taki Yehovah poti wan ten pe a o du san a abi na prakseri. Wan fu den sani di a o du na taki a o tyari wan kaba kon na ala den problema di e meki sma pina na ini a ten disi. Problema soleki rampu, siki nanga dede. Yehovah o gebroiki a Kownukondre fu en fu du san a abi na prakseri (Dan. 2:44; Openb. 21:3, 4). Ma solanga a ten dati no doro, Yehovah e gi pasi taki Satan e tiri grontapu (Yoh. 12:31; Openb. 12:9).b Efu Yehovah ben o lusu ala problema now, dan a ben o gersi leki Satan e tiri grontapu bun. Dati meki wi e wakti Yehovah fu a du san a abi na prakseri. Ma dati no wani taki dati a no e yepi wi now te wi abi en muilek. Meki wi go luku wan tu fasi fa a e yepi wi.

WAN TU FASI FA YEHOVAH E PIKI DEN BEGI FU WI NA INI A TEN DISI

9. Fa Yehovah e yepi wi te wi musu teki wan bosroiti? Gi wan eksempre.

⁹ A e gi wi koni. Yehovah pramisi wi taki a o gi wi a koni di wi abi fanowdu fu man teki bun bosroiti. Wi abi a koni fu Gado fanowdu spesrutu te musu teki bosroiti di o abi krakti tapu wi libi. Fu eksempre te wi musu bosroiti efu wi o trow noso efu wi o tan wi wawan (Yak. 1:5). Luku a tori fu Maria, wan sisa di no trow.c A ben e dini leki gewoon pionier di a miti wan brada. A taki: „O moro wi ben e leri sabi makandra, o moro wi ben e kon lobi makandra. Mi sabi taki mi ben abi fu teki wan bosroiti. Mi begi Yehovah furu fu a tori disi. Mi sabi taki Yehovah no ben o teki wan bosroiti gi mi, ma mi ben abi a tiri fu en fanowdu fu sabi san mi musu du.” Maria taki dati Yehovah piki a begi fu en. Fa a du dati? Di a ondrosuku sani na ini den buku nanga tijdschrift fu wi, a feni artikel di piki ala den aksi di a ben abi. A teki a rai tu di a kisi fu en mama di de wan lepi Kresten. A rai dati yepi en fu ondrosuku den firi fu en. Na so a ben man teki wan bun bosroiti.

10. Soleki fa Filipisma 4:13 e sori, dan san Yehovah o du fu yepi en futuboi? Gi wan eksempre. (Luku a fowtow.)

¹⁰ A e gi wi a krakti fu horidoro. Yehovah o gi wi a krakti fu horidoro te tesi e miti wi neleki fa a ben du dati nanga na apostel Paulus. (Leisi Filipisma 4:13.) Luku fa Yehovah ben yepi wan brada di nen Benjamin fu horidoro na ini muilek situwâsi. Na ini en yongu yari, Benjamin nanga en osofamiri ben musu tan na ini loweman-kampu na ini Afrika. Benjamin e taki: „Mi ben e begi Yehovah furu. Mi ben e aksi en fu gi mi a krakti fu du san a feni bun. Mi si taki Yehovah arki den begi fu mi. A kowru mi ati, a gi mi a deki-ati fu man tan preiki èn a sorgu taki mi kisi den buku nanga tijdschrift di yepi mi fu tan abi wan tranga bribi.” Benjamin e taki moro fara: „Fu di mi ben e leisi ondrofenitori fu brada nanga sisa di e fruteri fa Yehovah yepi den fu horidoro, meki dati tranga mi bribi èn a gi mi deki-ati fu tan horidoro.”

11-12. Fa Yehovah e gebroiki wi brada nanga sisa fu piki den begi fu wi? (Luku a fowtow.)

¹¹ A e gebroiki wi brada nanga sisa. A neti fosi Yesus gi en libi leki wan srakti ofrandi, a begi Yehovah fayafaya. A aksi Yehovah fu no meki sma si en leki wan man di kosi Gado. Yehovah yepi en fu di a seni wan engel fu gi en krakti (Luk. 22:42, 43). Yehovah kan yepi wi tu fu di a e meki wan brada noso sisa bel wi noso kon luku wi. Wi alamala kan suku okasi fu „taki switi” nanga wi brada noso sisa so taki wi kan gi den deki-ati.​—Odo 12:25.

¹² Luku na ondrofenitori fu wan sisa di nen Miriam. Wan tu wiki baka di en masra dede, en wawan ben de na oso. A ben e sari èn a ben e firi brokosaka. A ben e krei heri dei èn a ben abi wan sma fanowdu fu trowstu en. A e taki: „Mi no ben abi krakti fu bel sma. Dati meki mi begi Yehovah. Na begi mi ben e begi nanga furu watra-ai di mi yere mi telefon. Na wan owruman ben e bel, wan bun mati fu mi.” Na owruman nanga en frow trowstu Miriam. A sisa disi de seiker taki na Yehovah naki na owruman disi ati fu bel en.

13. Gi wan eksempre di e sori taki Yehovah kan gebroiki sma di no e anbegi en fu piki den begi wi.

¹³ A kan gebroiki sma di no e anbegi en (Odo 21:1). Son leisi Yehovah e piki den begi fu den futuboi fu en fu di a e gebroiki sma di no e anbegi en fu yepi den. Fu eksempre, a ben piki a begi fu Nehemia fu di a meki Kownu Artakserkses gi Nehemia primisi fu go na Yerusalem so taki a ben kan yepi fu bow a foto baka (Neh. 2:3-6). Na ini a ten disi, Yehovah kan gebroiki sma di no e anbegi en fu yepi wi tu.

14. Fa a tori fu Soo Hing gi yu deki-ati? (Luku a fowtow.)

¹⁴ Wan sisa di nen Soo Hing kon si taki Yehovah gebroiki a datra fu en fu yepi en. A boi fu a sisa disi e siki sensi di a gebore. Ma bakaten a situwâsi fu en kon moro takru di wan ongoloku miti en. Now Soo Hing nanga en masra ben musu libi den wroko fu sorgu gi en. Te fu kaba den ben kon abi moni problema. Soo Hing taki dati a libi ben kon hebi kefalek gi en èn a no ben man teki en moro. A fruteri Yehovah ala sani ini begi èn a aksi en fu yepi en. Ne a datra fu en bosroiti taki a o suku wan fasi fu yepi den. Na so den kon kisi yepi fu lanti èn wan oso fu tan di no ben diri tumusi. Bakaten, Soo Hing taki: „Wi si Yehovah anu ini a tori disi. En na trutru wan Gado ’di e arki begi’.”​—Ps. 65:2.

WI MUSU ABI BRIBI FU MAN SI FA YEHOVAH E PIKI DEN BEGI FU WI

15. San yepi wan sisa fu kon si taki Yehovah ben e piki den begi fu en?

¹⁵ Yehovah no e du kefalek sani fu piki den begi fu wi. Ma a fasi fa a e du dati nofo gi wi fu man tan du a wani fu wi hemel Papa. Sobun, de na ai fu si fa Yehovah e piki den begi fu yu. Wan sisa di nen Yoko ben feni taki Yehovah no e piki den begi fu en. Ma bakaten a bigin skrifi ala den sani di a aksi Yehovah. Baka wan pisi ten di a luku na ini a buku fu en, a si taki Yehovah ben piki bun furu fu den begi fu en, srefi den wan di a ben frigiti. Ten na ten, wi musu sidon prakseri fa Yehovah piki den begi fu wi.​—Ps. 66:19, 20.

16. Fa wi kan sori bribi te a abi fu du nanga den begi fu wi? (Hebrewsma 11:6)

¹⁶ Boiti taki wi musu abi bribi te wi e begi Yehovah, wi musu abi bribi tu fu si fa Yehovah e piki den begi fu wi, a no abi trobi fa a e du dati. (Leisi Hebrewsma 11:6.) Luku a tori fu Mike nanga en frow Chrissy. Den ben wani go dini na Betel. Mike e taki: „Omeni yari langa wi vul a formulier èn wi taki furu nanga Yehovah fu a tori disi. Ma noiti wi kisi a kari fu go na Betel.” Mike nanga Chrissy ben abi a frutrow taki Yehovah sabi san na a moro bun fasi fa a kan gebroiki den. Den tan du ala san den man na ini a diniwroko. Den ben dini leki gewoon pionier èn den yepi nanga furu bow-wroko fu na organisâsi. Now den de na ini a kring-wroko. Mike e taki: Yehovah no piki den begi fu wi na a fasi fa wi ben fruwakti, ma a piki den. A du dati na wan fasi di ben bun moro leki san wi ben prakseri.”

17-18. Soleki fa Psalm 86:6, 7 e sori, dan fu san wi kan de seiker?

¹⁷ Leisi Psalm 86:6, 7. A psalm skrifiman David ben abi a bribi taki Yehovah e arki èn a e piki den begi fu en. Yu kan abi a srefi bribi dati. Den eksempre di wi luku na ini na artikel disi, sori wi krin taki Yehovah kan gi wi a koni nanga a krakti di wi abi fanowdu fu horidoro. A kan gebroiki wi brada nanga sisa èn srefi sma di no e dini en fu yepi wi.

¹⁸ A kan taki Yehovah no e piki den begi fu wi na a fasi fa wi ben fruwakti, ma wi sabi taki a o piki den. A o gi wi precies san wi abi fanowdu na a yoisti ten. Sobun, tan begi èn abi a bribi taki Yehovah o sorgu gi yu now èn na ini a nyun grontapu a o „gi ala libisani san den e angri fu kisi”.​—Ps. 145: 16.