Yu kan de seiker taki Yehovah feni yu bun

1. San son getrow futuboi fu Yehovah e aksi densrefi son leisi?

A MOI fu sabi taki Yehovah feni a pipel fu en bun. Bijbel e taki: „Yehovah e prisiri nanga a pipel fu en” (Ps. 149:4). Ma son leisi, sonwan fu wi kan firi brokosaka so te taki wi kan aksi wisrefi: ’Yehovah feni mi bun?’ Furu getrow futuboi fu Yehovah na ini Bijbel ten ben e aksi densrefi a sani disi.​—1 Sam. 1:6-10; Yob 29:2, 4; Ps. 51:11.

2. Suma Yehovah feni bun?

² Bijbel e sori krin taki Yehovah kan feni wi bun awinsi wi na sondu sma. San wi musu du so taki Yehovah kan feni wi bun? Wi musu poti bribi na ini Yesus Krestes èn teki dopu (Yoh. 3:16). Na so wi e sori ala sma taki wi abi berow fu den sondu fu wi èn taki wi pramisi Gado taki wi o du a wani fu en (Tori 2:38; 3:19). Yehovah breiti srefsrefi te wi e du den sani disi fu tron wan moro bun mati fu en. Te wi e tan du ala san wi man fu tan dini Yehovah soleki fa wi pramisi en, dan a o feni wi bun èn a o si wi leki en bun mati.​—Ps. 25:14.

3. San wi o luku now?

³ Ma fu san ede son sma e denki son leisi taki Gado no feni den bun? Fa Yehovah e sori wi taki a feni wi bun? Èn fa wan Kresten kan de seiker taki Yehovah feni en bun?

FU SAN EDE SON SMA E DENKI SON LEISI TAKI YEHOVAH NO FENI DEN BUN

4-5. Fu san wi kan de seiker awinsi wi e firi leki wi no warti noti?

⁴ Yonguyongu kba, furu fu wi ben e firi leki wi no warti noti (Ps. 88:15). Wan brada di nen Adrián e taki: „Ala ten mi ben e firi leki mi no warti noti. Mi sabi ete taki di mi ben yongu, mi ben lobi begi taki mi famiri ben kan libi na ini Paradijs, aladi mi ben de seiker taki mi no ben bun nofo fu libi drape.” Tony di no ben gro kon na ini wan osofamiri di ben de Kotoigi e taki: „Noiti mi p’pa nanga mi m’ma taigi mi taki den lobi mi noso taki den breiti nanga mi. A sani disi ben e meki mi firi taki noti san mi ben e du ben bun nofo gi den.”

⁵ Efu son leisi wi e firi leki wi no warti noti, a bun fu hori na prakseri taki na Yehovah srefi hari wi kon na en (Yoh. 6:44). A e si a bun na ini wi, srefi efu wi no e si dati èn a sabi wi moro bun leki fa wi sabi wisrefi (1 Sam. 16:7; 2 Kron. 6:30). Sobun, wi kan bribi en te a e taki dati wi warti gi en.​—1 Yoh. 3:19, 20.

6. Fa den sondu di Paulus ben du fosi ben meki a firi?

⁶ Den sani di sonwan fu wi du fosi wi kon leri sabi waarheid, kan meki taki wi e firi sari ete (1 Petr. 4:3). Srefi getrow Kresten e feti nanga den swakifasi fu den. Fa a de nanga yu? Yu e firi son leisi leki Yehovah no man gi yu pardon? Efu na so yu e firi, dan a o gi yu dek’ati fu sabi taki getrow futuboi fu Yehovah ben firi so tu son leisi. Fu eksempre, na apostel Paulus ben e firi brokosaka te a ben e prakseri den sondu di a ben du (Rom. 7:24). A no de fu taki dati Paulus ben sori berow fu den sondu fu en èn a teki dopu. Toku a ben e si ensrefi leki „a moro pikinwan fu den apostel” èn leki a „a moro bigiwan fu den” sondari.​—1 Kor. 15:9; 1 Tim. 1:15.

7. Te a abi fu nanga den sondu di wi ben du fosi, dan san wi musu hori na prakseri?

⁷ Wi hemel Papa pramisi taki a o gi wi pardon efu wi abi berow (Ps. 86:5). Sobun, efu wi abi berow trutru fu den sondu di wi du, wi kan bribi Yehovah te a e taki dati a gi wi pardon.​—Kol. 2:13.

8-9. Fa wi kan kakafutu gi a denki taki noiti Yehovah o breiti nanga wi?

⁸ Wi alamala wani du ala san wi man fu dini Yehovah. Ma sonwan fu wi kan firi taki awinsi san wi e du, Yehovah no o feni wi bun noiti. Wan sisa di nen Amanda e taki: „Furu leisi mi abi a denki taki efu mi wani taki Yehovah feni mi bun, dan dati wani taki dati mi musu du moro ibri leisi baka. Dati meki furu leisi mi e suku fu du moro leki san mi man. Èn te mi no man doro wan marki di mi poti, dan mi e firi sari èn mi e denki taki Yehovah no breiti nanga mi.”

⁹ Fa wi kan kakafutu gi a denki taki noiti Yehovah o breiti nanga wi? Wi o man du dati te wi e hori na prakseri taki Yehovah no e aksi tumsi furu fu wi. Noiti a e aksi wi moro leki san wi man gi trutru. A e warderi ala san wi e du gi en, solanga wi e du dati nanga wi heri ati. Prakseri sma na ini Bijbel di dini Yehovah nanga den heri ati. Prakseri Paulus. Paulus ben e wroko tranga omeni yari langa. A ben e waka dusundusun kilometer fu a wan presi go na a trawan èn a seti omeni gemeente. Ma di a situwâsi fu en kenki èn a no ben man du so furu moro na ini a preikiwroko, dan a ben e denki taki Yehovah no ben feni en bun moro? Nôno. A ben e tan du san a man èn Yehovah blesi en (Tori 28:30, 31). Na so a de tu taki wi no man du furu ala ten gi Yehovah. San prenspari gi Yehovah, na fu san ede wi e du den sani dati. Meki wi poti prakseri na wan tu fasi fa Yehovah e sori taki a feni wi bun.

FA YEHOVAH E SORI TAKI A FENI WI BUN?

10. Fa wi kan sabi taki Yehovah feni wi bun? (Yohanes 16:27)

¹⁰ Nanga yepi fu Bijbel. Yehovah e suku fasi fu sori en pipel taki a lobi den èn taki a feni den bun. Bijbel e taki fu tu okasi pe Yehovah sori taki Yesus na en lobi Manpkin èn taki a feni en bun (Mat. 3:17; 17:5). Yu ben o wani yere fa Yehovah e taki kmoto fu hemel taki a feni yu bun? Yehovah no e taki nanga wi kmoto fu hemel, ma a e taki nanga wi nanga yepi fu Bijbel. Te wi e leisi fa Yesus e taki na wan lob’ati fasi nanga den disipel fu en, dan a de neleki wi kan yere fa Yehovah e taigi wi den sani dati. (Leisi Yohanes 16:27.) Nowan sma sori den fasi fu Yehovah leki fa Yesus du dati. Sobun, te wi e leisi taki Yesus ben taigi den bakaman fu en taki a lobi den, aladi den ben de sondu sma, dan a de leki Yehovah e taigi wi a sani dati.​—Yoh. 15:9, 15.

11. Fu san ede wi no musu denki taki Yehovah no feni wi bun moro te wi e kisi tesi? (Yakobus 1:12)

¹¹ A e gi wi san wi abi fanowdu. Yehovah e angri fu yepi wi èn a e gi wi san wi abi fanowdu. Ma son leisi Yehovah e gi pasi taki tesi miti wi, leki fa dati ben psa nanga a reti’ati man Yob (Yob 1:8-11). Te wi e kisi tesi, dan wi no musu denki taki Yehovah no feni wi bun moro. Na presi fu dati den tesi disi e gi wi okasi fu sori o furu wi lobi Yehovah èn efu wi e fertrow na en tapu. (Leisi Yakobus 1:12.) Wi o si fa a o sorgu gi wi èn fa a o yepi wi fu hordoro.

12. San wi kan leri fu na ondrofenitori fu Dmitrii?

¹² Poti prakseri na san miti Dmitrii, wan brada di e libi na ini Asia. A lasi a wroko fu en èn omeni mun langa a no ben man feni wan tra wroko. Fu di a ben e fertrow tapu Yehovah, meki a besroiti fu du moro na ini a preikiwroko. Baka dati omeni mun psa èn tòg a no ben man feni wan wroko. Ma baka wan pisi ten a kon siki seryusu èn a no ben man kmoto na ini en bedi srefi. A ben e bigin aksi ensrefi efu a ben de wan bun p’pa noso wan bun masra èn efu Yehovah ben feni en bun ete. Ma wan neti, a meisje fu en print wan papira èn den wortu di ben de na en tapu ben de fu Yesaya 30:15 pe skrifi: „Efu unu wani de tranga, dan a wan-enkri sani di un musu du na fu tan tiri èn frutrow na mi tapu” (Yes. 30:15). A tyari a papira disi gi en p’pa di ben e d’don na ini en bedi èn a taigi en: „P’pa, te yu no e firi bun, dan prakseri a tekst disi.” Dmitrii kon ferstan taki na Yehovah ben e sorgu taki en osofamiri ben abi krosi, n’nyan, nanga wan presi fu tan. A e taki: „A wan-enkri sani di mi ben musu du, na fu tan tiri èn fertrow na tapu mi Gado.” Efu so wan tesi e miti yu tu, dan yu kan abi a fertrow taki Yehovah o sorgu gi yu èn taki a o yepi yu fu hordoro.

13. Suma Yehovah kan gebroiki fu sori taki a feni wi bun èn fa a e du dati?

¹³ Nanga yepi fu wi brada nanga sisa. Yehovah e gebroiki wi brada nanga sisa fu sori taki a feni wi bun. Fu eksempre, a kan meki wan brada noso wan sisa gi wi dek’ati te wi abi dati fanowdu trutru. Wan sisa na ini Asia ondrofeni a sani disi di wan lo problema ben e miti en. A ben lasi en wroko èn a ben kon siki seryusu. Baka dati, en masra du wan seryusu sondu èn den puru en leki owruman. A sisa e taki: „Mi no ben man ferstan fu san ede den sani disi ben e miti mi. Mi ben denki taki mi ben du wan sani di no bun èn taki Yehovah no ben feni mi bun moro.” A sisa fu wi begi Yehovah èn a aksi en fu sori en taki a lobi en ete. Fa Yehovah sori en taki a feni en bun ete? A sisa e taki: „Den owruman na ini a gemeente taki nanga mi èn den gi mi a dyaranti taki Yehovah lobi mi.” Baka wan pisi ten a sisa aksi Yehovah baka fu sori en taki a lobi en. A sisa e taki: „A srefi dei dati mi kisi wan brifi fu wan grupu brada nanga sisa na ini a gemeente. Di mi ben e leisi den moi wortu di den ben skrifi, dan mi ben e firi taki Yehovah ben yere a begi fu mi.” Iya, furu leisi Yehovah e gebroiki wi brada nanga sisa fu sori taki a lobi wi.​—Ps. 10:17.

14. San na wan tra fasi fa Yehovah e sori taki a feni wi bun?

¹⁴ Wan tra fasi fa Yehovah e sori taki a feni wi bun, na taki a e gebroiki brada nanga sisa fu gi wi rai te wi abi dati fanowdu. Fu eksempre, na ini a fosi yarihondro, Yehovah ben gebroiki na apostel Paulus fu skrifi 14 brifi nanga yepi fu santa yeye gi den brada nanga sisa fu en. Na ini den brifi disi, Paulus ben gi den brada nanga sisa fu en krin rai na wan lob’ati fasi. Fu san ede meki Yehovah gebroiki na apostel Paulus fu gi den brada nanga sisa den rai dati? Yehovah na wan bun Papa èn a e pir’ai gi den pkin fu en „di a lobi” (Odo 3:11, 12). Sobun, te wan sma e gi wi rai nanga yepi fu Bijbel, dan dati no wani taki dati Yehovah no feni wi bun moro, ma na presi fu dati a e sori taki a lobi wi (Hebr. 12:6). Na sortu tra fasi Yehovah e sori taki a feni wi bun?

TRA FASI FA YEHOVAH E SORI TAKI A FENI WI BUN

15. Suma Yehovah e gi a santa yeye fu en èn fu san ede disi kan gi wi dek’ati?

¹⁵ Yehovah e gi en santa yeye na den sma di a feni bun (Mat. 12:18). Wi kan aksi wisrefi: ’Mi e sori den fasi di a yeye fu Gado e meki sma kisi?’ Yu kon abi moro pasensi nanga trawan sensi di yu tron wan Kotoigi fu Yehovah? O moro yu e meki muiti fu sori den fasi di a yeye fu Gado e meki sma kisi, o moro yu kan de seiker taki Yehovah feni yu bun.​—Luku a faki „Den fasi di a yeye e meki sma kisi na . . .”

16. Suma Yehovah e gebroiki fu preiki a bun nyunsu, èn fa dati e meki yu firi? (1 Tesalonikasma 2:4)

¹⁶ Yehovah e gi den sma di a feni bun a wroko fu preiki a bun nyunsu. (Leisi 1 Tesalonikasma 2:4.) Poti prakseri na a fasi fa wan sisa di nen Jocelyn kisi wini fu di a prati a bun nyunsu nanga trawan. Wan dei di Jocelyn wiki, a ben e firi brokosaka. A e taki: „Mi no ben e firi fu du noti èn mi ben e firi leki mi no warti noti. Ma mi ben e pionier èn a dei dati mi ben o go preiki. Sobun, mi begi èn mi go na ini a preikiwroko.” A m’manten dati, Jocelyn miti Mary, wan uma di ben abi switifasi èn di ben wani studeri Bijbel. Wan tu mun baka dati, Mary ferteri Jocelyn taki na sdon a ben e sdon begi Gado fu yepi en, di Jocelyn naki na en doro. San Jocelyn leri fu na ondrofeni tori dati? A e taki: „A ben gersi leki Yehovah ben e taigi mi ’Mi feni yu bun.’” A no de fu taki dati a no ala sma o arki a bun nyunsu di wi e tyari go gi den. Ma te wi e du ala san wi man fu prati a bun nyunsu nanga trawan, dan wi kan de seiker taki Yehovah breiti nanga wi.

17. San yu kan leri fu a sani di Vicky taki fu a lusu-paiman? (Psalm 5:12)

¹⁷ Yehovah e gi den sma di a feni bun pardon nanga yepi fu a lusu-paiman (1 Tim. 2:5, 6). Ma fa a de efu wi e denki ete taki Yehovah no feni wi bun, aladi wi e bribi na ini a lusu-paiman èn wi teki dopu? Wi musu hori na prakseri taki den firi fu wi kan kori wi, ma wi kan fertrow tapu Yehovah. Yehovah e si den wan di e bribi na ini a lusu-paiman leki reti’ati sma èn a e pramisi taki a o blesi den (Leisi Psalm 5:12; Rom. 3:26). Wan sisa di nen Vicky ben e denki dipi fu a lusu-paiman. Wan dei di a ben denki dipi fu a lusu-paiman, a kon ferstan wan sani moro krin. A e taki: „Yehovah ben abi so furu pasensi nanga mi . . . Ma te yu luku en bun, dan mi ben e taigi en: ’A lobi fu yu no bigi nofo fu abi krakti na mi tapu. A lusu-paiman fu yu Manpkin no o man tapu den sondu fu mi.’” Fu di Vicky ben e denki dipi fu a lusu-paiman, meki a bigin firi taki Yehovah lobi en. Te wi e denki dipi fu a lusu-paiman, dan wi o firi tu taki Yehovah lobi wi èn taki a feni wi bun.

18. Fu san wi kan de seiker efu wi e tan sori wi hemel Papa taki wi lobi en?

¹⁸ Aladi wi o du tranga muiti fu fiti den rai na ini na artikel disi, tòg wi kan firi brokosaka son leisi èn kande wi o aksi wisrefi efu Yehovah feni wi bun. Te wi e bigin denki so, dan hori na prakseri taki Yehovah feni den wan bun „di e tan lobi en” (Yak. 1:12). Sobun, tan du muiti fu kon moro krosbei na Yehovah èn poti prakseri na ala den fasi fa a e sori taki a feni yu bun. Èn no fergiti noiti taki Yehovah „no de fara fu nowan fu wi”.​—Tori 17:27.