Yehovah e si te yu e krei èn a e broko en ede trutru nanga yu

1-2. Sortu sani kan meki wi krei?

WI ALAMALA e krei son leisi. Son leisi wi e krei fu di wi breiti srefsrefi. A kan taki yu e krei fu di wan prenspari sani psa na ini yu libi. Kande yu beibi gebore, kande yu prakseri wan moi momenti na ini yu libi, noso kande yu si wan bun mati fu yu di yu no ben si omeni yari langa.

² Ma nofo tron wi e krei fu di wi e sari dipi na ini wi ati. Kande wi e krei fu di wi sma du wan hati sani nanga wi. Kande wi e krei fu di wan siki e pina wi wan heri pisi ten kba noso fu di wan lobiwan fu wi lasi libi. Son leisi wi kan firi neleki fa Yeremia ben e firi di Babilon pori Yerusalem. Yeremia ben taki: „Doronomo mi ai e lon watra . . . Mi krei langalanga watra-ai èn mi no o tapu fu krei. Iya, mi e tan krei.”​—Sari 3:48, 49.

3. Fa Yehovah e firi te a e si taki den futuboi fu en e pina? (Yesaya 63:9)

³ Yehovah sabi soifri omeni leisi wi krei fu di wi ben e sari. Bijbel e taki dati a sabi te wan futuboi fu en e pina èn taki a e yere wi te wi e begi en fu yepi wi (Ps. 34:15). Ma Yehovah no e si nomo te wi e krei èn a no e yere nomo te wi e krei. A e du moro leki dati. Yehovah na wi P’pa èn a lobi wi trutru. Dati meki te a e si taki wi e krei, dan a e sari èn a no e draidrai fu yepi wi.​—Leisi Yesaya 63:9.

4. Sortu Bijbel eksempre wi o luku, èn san wi o leri fu Yehovah?

⁴ Na ini a Wortu fu en, Yehovah e taigi wi san a du di den futuboi fu en ben e krei. Wi kan si dati te wi e luku san ben psa nanga Hana, David, nanga Kownu Heskia. Fu san ede den ben e krei? Fa Yehovah yepi den? Èn fa na eksempre fu den kan de wan trowstu gi wi te wi e krei fu di wi e sari, fu di wan sma du wan hati sani nanga wi, noso fu di wi lasi howpu?

YEHOVAH E SI TE YU E KREI FU DI YU E SARI SREFSREFI

5. Fa Hana ben e firi?

⁵ Hana ben abi difrenti problema di ben e meki taki a ben e sari èn fu dati ede a ben e krei. Hana en masra ben abi ete wan frow. A ben nen Penina èn a ben e teige Hana. Ma dati no ben de ala. Hana no ben abi pkin aladi Penina ben abi wan tu pkin (1 Sam. 1:1, 2). Penina ben e tanteri Hana doronomo fu di a no ben man kisi pkin. Fa yu ben o firi efu yu ben de na ini a situwâsi dati? Fu di Hana „ben e sari srefisrefi”, meki a „a no ben wani nyan”.​—1 Sam. 1:6, 7, 10.

6. San Hana du fu man feni trowstu?

⁶ Fa Hana feni trowstu? Wan sani di yepi en na taki a go na a tabernakel. Kande a ben de krosbei fu a mofodoro fu a tabernakel, di „a bigin begi Yehovah èn a krei langalanga watra-ai”. A begi Yehovah: „Mi e begi yu, poti prakseri na a nowtu fu yu umasrafu èn memre mi trutru” (1 Sam. 1:10b, 11). Hana taigi Yehovah ala san ben de na tapu en ati. Di Yehovah si fa Hana ben e krei, dan a ben e sari tu. A ben wani trowstu Hana fu di a ben e si en leki en lobi umapkin.

7. Fa Hana kisi trowstu di a taigi Yehovah ala san ben de na tapu en ati?

⁷ Baka di Hana taigi Yehovah ala san ben de na tapu en ati, dan Granpriester Eli pramisi en taki Yehovah ben o piki a begi fu en. Fa a ben e firi baka dati? Bijbel e taki: „Na uma gowe go nyan èn a no ben de nanga wan sari fesi moro” (1 Sam. 1:17, 18). Aladi a problema fu Hana ben de ete, tòg a ben e firi moro bun. A ben trowe a problema fu en tapu Yehovah. Yehovah ben e ferstan fa a ben e firi, a arki a begi fu en, èn bakaten a yepi en fu kisi pkin.​—1 Sam. 1:19, 20; 2:21.

8-9. Fu san ede wi musu du ala san wi man fu go na den Kresten konmakandra soleki fa Hebrewsma 10:24, 25 e sori? (Luku a prenki.)

⁸ San disi e leri wi. Kande yu abi problema di e meki yu sari srefsrefi. Kande yu e sari fu di wan famiriman noso wan mati fu yu kon dede. Te den sortu sani disi psa, dan a kan taki yu o wani de yu w’wan èn wi kan ferstan dati. Ma neleki fa Hana kisi trowstu nanga dek’ati di a go na a tabernakel, na so yu kan kisi trowstu te yu e go na den Kresten konmakandra awinsi yu e sari. (Leisi Hebrewsma 10:24, 25.) Na den konmakandra wi e arki Bijbel vers di e gi wi dek’ati. Na so Yehovah e yepi wi fu no prakseri sani di e meki wi firi sari, awinsi a situwâsi fu wi no e kenki wantronso.

⁹ Na den konmakandra fu wi, den brada nanga sisa fu wi e gi wi dek’ati èn den e sori wi o furu den lobi wi. Èn wi e firi moro bun te wi de nanga den (1 Tes. 5:11, 14). Prakseri na ondrofenitori fu wan spesrutu pionier brada di wefi kon dede. A ben taki: „Son leisi mi wani de mi w’wan fu di mi e misi mi wefi so te, taki mi no man kba krei. Ma den konmakandra fu wi e gi mi dek’ati. Den moi sani di mi brada nanga sisa e taigi mi èn den piki di den e gi na den konmakandra e trowstu mi trutru. Awinsi fa mi musu feti nanga misrefi fu go na konmakandra, tòg ala ten mi e firi moro bun te mi de drape.” Te wi de na den konmakandra fu wi, dan Yehovah kan gebroiki wi brada nanga sisa fu yepi wi.

10. Fa na eksempre fu Hana kan yepi wi te wi e sari srefsrefi?

¹⁰ Hana ben e firi moro bun baka di a taigi Yehovah san ben de na tapu en ati. Yu kan du dati tu. Neleki Hana yu kan ’trowe ala yu hebi na tapu Yehovah’ èn yu kan de seiker taki a o arki yu (1 Petr. 5:7). Wan sisa di lasi en masra fu di fufurman kiri en, e taki: „A ben gersi leki mi ati ben broko pis’pisi èn taki noiti moro a ben o kon bun baka. Ma mi begi mi lob’ati P’pa Yehovah èn na so mi feni trowstu. Son leisi mi no ben sabi san mi ben musu taki, ma a ben e ferstan fa mi ben e firi. Te mi ben e sari srefsrefi, dan mi ben e begi en fu gi mi wan korostu firi. Mi ben e firi moro bun wantewante èn na so mi ben man du san mi ben musu du a dei dati.” Te yu e krei gi Yehovah èn te yu e taigi en san de na tapu yu ati, dan a e firi sari tu èn a e ferstan heri bun fa yu e firi. Awinsi a situwâsi fu wi no e kenki, tòg Yehovah kan trowstu wi èn a kan yepi wi fu no bruya (Ps. 94:19; Fil. 4:6, 7). A e si a muiti di yu e du fu tan gi yesi na en èn a o blesi yu.​—Hebr. 11:6.

TE WAN SMA DI YU LOBI E DU WAN HATI SANI NANGA YU

11. Fa David ben e firi di tra sma du hati sani nanga en?

¹¹ Difrenti muilek situwâsi ben miti David na ini a libi fu en èn den sani dati ben meki a krei. Furu sma ben e teige en. Srefi sonwan fu den mati nanga famiriman fu en ben du hati sani nanga en èn den pruberi fu du ogri nanga en (1 Sam. 19:10, 11; 2 Sam. 15:10-14, 30). Di wan seryusu problema ben miti en, dan a skrifi: „Mi kon weri fu den geme fu mi. Heri neti mi krei, mi heri bedi nati. Den watra-ai fu mi sungu mi bedi.” Fu san ede David ben e firi so? A taki: „Fu den sani di mi feanti du nanga mi” (Ps. 6:6, 7). Den hati sani di sma ben e du nanga David meki taki a ben e sari so te taki a ben e krei furu.

12. San David ben sabi seiker, soleki fa Psalm 56:8 e sori?

¹² Aladi furu problema ben e miti David, tòg a ben sabi taki Yehovah ben lobi en. A ben skrifi: „Yehovah o yere fa mi e krei” (Ps. 6:8). Wan tra leisi, David ben taki a moi sani di wi e feni na Psalm 56:8. (Leisi en.) Den wortu dati e sori krin taki Yehovah lobi wi èn taki a e broko en ede nanga wi. David ben taki dati a ben de neleki Yehovah ben poti den watra-ai fu en na ini en lerisaka noso taki a ben skrifi fu den na ini en buku. David ben sabi seiker taki Yehovah ben e poti prakseri na en èn taki a ben e si taki a ben e sari. A ben de seiker taki en lobi P’pa na hemel ben sabi sortu problema a ben abi èn fa den problema dati ben e meki a firi.

13. Te trawan e du hati sani nanga wi, dan san wi musu hori na prakseri? (Luku a prenki.)

¹³ San disi e leri wi. Yu e sari fu di wan sma du wan hati sani nanga yu? Kande yu e sari fu di a verkering noso a trow fu yu broko sondro taki yu ben ferwakti dati. Noso kande wan lobiwan fu yu tapu fu dini Yehovah. Wan brada di wefi ben waka gi en èn di gwe libi tu, e taki: „Mi no ben man bribi san miti mi. Mi ben e sari, mi ben e atibron, èn mi ben e firi leki mi no warti noti.” Efu wan sma du wan hati sani nanga yu, dan sabi taki Yehovah noiti o gwe libi yu. A brada taki: „Mi kon si taki libisma kan meki yu fesi fadon, ma Yehovah noiti o du dati fu di a de wi Stonbergi. Awinsi san e psa, a o yepi wi ala ten. Noiti a o gwe libi den wan di e tai hori na en” (Ps. 37:28). No fergiti taki Yehovah lobi yu moro leki fa iniwan libisma kan lobi yu. Te wan sma di yu lobi du wan hati sani nanga yu, dan a sani dati no switi srefsrefi. Ma Yehovah o tan lobi yu fu di yu warti gi en (Rom. 8:38, 39). San wi musu hori na prakseri, na taki awinsi san wan sma du nanga yu, yu P’pa na hemel lobi yu.

14. San Psalm 34:18 e pramisi wi?

¹⁴ Te wan sma du wan hati sani nanga wi, dan wi kan feni trowstu tu na ini den wortu fu David di e gi wi dek’ati. Luku san a e taki na Psalm 34:18. (Leisi en.) Wan buku e taki dati den wan „di brokosaka” kande abi fu du nanga den wan „di no abi nowan howpu”. Fa Yehovah e yepi den wan di lasi howpu fu di trawan du wan hati sani nanga den? Yehovah „de krosbei” fu den. A de leki wan p’pa di e brasa wan pkin hori te a e krei. Te wi e sari fu di wan sma du wan hati sani nanga wi noso fu di wan sma gwe libi wi, dan Yehovah e firi gi wi èn a no e draidrai fu yepi wi. A e angri fu trowstu wi te wi e sari èn te wi e denki taki wi no warti noti. Èn a e pramisi wi furu moi sani so taki wi kan hordoro te wi e kisi tesi.​—Yes. 65:17.

YEHOVAH E SI TE WI E KREI FU DI WI SIKI

15. Fu san ede Heskia ben e sari so te taki a krei?

¹⁵ Di Kownu Heskia fu Yuda ben abi 39 yari, dan a kon sabi taki a ben abi wan seryusu siki. Yehovah ben meki a profeiti Yesaya go taigi Heskia taki a ben o dede (2 Kow. 20:1). A ben gersi leki howpu no ben de gi Heskia. Heskia ben e firi brokosaka di a yere a nyunsu èn dati meki a krei langa watra-ai. A begi Yehovah fayafaya fu yepi en.​—2 Kow. 20:2, 3.

16. San Yehovah du gi Heskia?

¹⁶ Di Yehovah yere a begi fu Heskia èn a si den watra-ai fu en, dan a ben e firi gi Heskia. A taigi en: „Mi yere a begi fu yu èn mi si fa yu krei. Luku, mi o meki yu kon betre.” Nanga yepi fu Yesaya, Yehovah pramisi Heskia taki a ben o meki a libi moro langa èn taki a ben o ferlusu Yerusalem fu den Asiriasma.​—2 Kow. 20:4-6.

17. Fa Yehovah e yepi wi te wi abi wan seryusu siki? (Psalm 41:3) (Luku a prenki.)

¹⁷ San disi e leri wi. San yu kan du te a gersi leki dresi no de gi a siki fu yu? Taigi Yehovah fa yu e firi, awinsi yu e krei srefi. Bijbel e gi wi a dyaranti taki „a Tata di abi furu sari-ati, [èn] a Gado fu ala trowstu” o trowstu wi na ini ala sortu banawtu (2 Kor. 1:3, 4). Na ini a ten disi, wi no kan ferwakti taki Yehovah o puru ala den problema fu wi, ma wi kan de seiker taki a o yepi wi ala ten. (Leisi Psalm 41:3.) Yehovah e gebroiki en santa yeye fu gi wi krakti, koni, nanga wan korostu firi so taki wi kan hordoro (Odo 18:14; Fil. 4:13). Wan tra fasi fa a e trowstu wi, na taki a e pramisi wi taki nowan sma no o siki moro na ini a ten di e kon.​—Yes. 33:24.

18. Sortu Bijbeltekst gi yu trowstu di wan hebi tesi ben miti yu? (Luku a faki „Wortu di e trowstu wi te wi e krei”.)

¹⁸ Den wortu fu Yehovah trowstu Heskia. Wi kan feni trowstu tu te wi e arki san Yehovah e taigi wi na ini a Wortu fu en. Te wi e sari, dan den wortu fu Yehovah na ini Bijbel kan trowstu wi èn den kan yepi wi fu no bruya (Rom. 15:4). Di wan sisa na ini West-Afrika kon sabi taki a ben abi kanker, dan a ben e krei furu. A e ferteri: „Wan Bijbeltekst di gi mi furu trowstu, na Yesaya 26:3. A tru taki nofo tron wi no man kenki a situwâsi fu wi, ma a vers dati e pramisi taki Yehovah kan gi wi wan korostu firi èn a kan yepi wi fu psa iniwan tesi.” Wan Bijbeltekst de di e gi yu furu trowstu te yu de na ini wan muilek situwâsi pe a kan gersi srefi leki howpu no de?

19. San wi kan ferwakti na ini a ten di e kon?

¹⁹ Wi e libi na a kba fu den lasti dei èn wi kan ferwakti taki moro sani o miti wi di o meki wi sari èn krei. Ma soleki fa den eksempre fu David nanga Kownu Heskia e sori, dan Yehovah e si te wi e krei èn a e firi gi wi. Yehovah e warderi en te wi e tan gi yesi na en aladi wi e sari, èn a no e fergiti den watra-ai fu wi. Dati meki te sari sani e miti wi, dan wi musu begi Yehovah fu taigi en san de na tapu wi ati. Noiti wi musu hori wisrefi aparti fu wi lobi brada nanga sisa na ini a gemeente. Èn meki wi tan leisi Bijbel fu kan feni trowstu. Wi kan de seiker taki Yehovah o blesi wi te wi e tan gi yesi na en. Iya, wan ten e kon pe wi no o krei moro fu di wi e sari, fu di sma du hati sani nanga wi, noso fu di wi e siki (Openb. 21:4). Na a ten dati wi o krei soso fu di wi e prisiri.