Yu e memre disi ete?
Yu man memre san yu leisi na ini den Waktitoren di kon na doro a yari disi? Luku efu yu kan piki den aksi di e kon now:
Fa Yehovah e leri wi fu sori lespeki gi umasma?
A no lobi den man moro den uma. Gado e arki umasma, a e poti prakseri na den firi nanga den brok’ede fu den. Èn a e gi den wroko fu du fu di a e fertrow den.—w24.01, blz. 15-16.
Fa wi kan fiti Efeisesma 5:7, pe skrifi: „Un no musu abi noti fu du nanga den”?
Na apostel Paulus ben e warskow wi fu no moksi nanga sma di ben o meki en muilek gi wi fu du san Yehovah feni bun. Boiti taki wi musu luku bun nanga suma wi e moksi na ini wi ala dei libi, wi musu luku bun tu nanga sma di wi e miti tapu social media.—w24.03, blz. 22-23.
Nanga sortu leitori wi musu luku bun?
Wi musu luku bun nanga leitori di wi Kresten brada noso sisa ferteri wi fu gi wi dek’ati, aladi den no ondrosuku efu den tori dati tru. Wi musu luku bun tu nanga e-mail fu sma di wi no sabi, èn nanga sma di e du neleki den wani kon sabi a waarheid aladi den fadon kmoto na bribi.—w24.04, blz. 12.
San wi sabi èn san wi no sabi te a abi fu du nanga a fasi fa Yehovah o krutu Kownu Salomo nanga den sma di dede na ini Sodom nanga Gomora èn na ini a Frudu?
Wi no sabi seiker efu Yehovah besroiti taki den sma disi dede fu ala ten. Ma san wi sabi, na taki a sabi ala sani finfini èn a abi furu sar’ati.—w24.05, blz. 3-4.
Fu di wi sabi taki Gado de „wan Stonbergi”, dan fu san wi kan de seiker? (Deut. 32:4).
Wi kan suku kibri na Yehovah. A e tai hori na wi, fu di ala ten a e du san a pramisi. Èn a no e kenki, fu di den fasi fu en no e kenki èn den prakseri fu en e tan a srefi tu.—w24.06, blz. 26-28.
Fa yu kan fiti yusrefi na ini wan nyun gemeente?
Fertrow tapu Yehovah di o yepi yu neleki fa a yepi den futuboi fu en na ini a ten di psa. No teki yu owru gemeente gersi nanga a nyunwan. Wroko makandra nanga yu nyun gemeente èn du muiti fu meki nyun mati.—w24.07, blz. 26-28.
San wi e leri fu den dri agersitori di de fu feni na ini Mateyus kapitel 25?
Na agersitori fu den skapu nanga den bokoboko e sori krin taki wi musu de getrow na Gado. Na agersitori fu den koni nyunwenke nanga den don nyunwenke e sori taki a prenspari fu de srekasreka èn fu de na ai. Èn na agersitori fu den talenti e sori o prenspari a de fu de fayafaya.—w24.09, blz. 20-24.
O hei a gadri fu a tempel fu Salomo ben de?
Na 2 Kroniki 3:4, son owruten kopi fu Bijbel e taki „120 el”, èn dati wani taki dati a gadri ben hei 53 meter (175 ft). Ma tra prenspari owruten kopi fu Bijbel e taki „20 el”, èn dati wani taki dati a gadri ben hei neigi meter (30 ft). Wi kan bribi taki a gadri ben hei neigi meter te wi e luku o deki den skotu fu a tempel ben de.—w24.10, blz. 31.
San a wani taki dati wan dinari ini a diniwroko musu de „masra fu wán wefi nomo”? (1 Tim. 3:12)
Dati wani taki dati a mag trow nanga wán uma nomo èn a no musu du hurudu. Boiti dati, a no musu kisi lobi firi gi tra umasma.—w24.11, blz. 19.
Fu san ede wi kan taki dati Yohanes 6:53 no e ferklari san ben o psa na a Avondmaal fu Masra?
Yohanes 6:53 e taki dati sma musu nyan Yesus en skin èn dringi en brudu. Na disi Yesus ben taigi wan grupu Dyu na ini a yari 32, fu sori den taki di ben musu poti bribi ete na ini en. Ma na Avondmaal fu Masra ben seti wán yari baka dati na ini Yerusalem. Drape Yesus ben taki nanga sma di ben o tiri na ini hemel makandra nanga en.—w24.12, blz. 10-11.