„Unu srefi musu bosroiti tide suma unu wani dini”

1. San wi musu du fu man de koloku trutru èn fu san ede wi musu du dati? (Yesaya 48:17, 18)

WI P’PA na hemel lobi wi trutru èn a wani taki wi de koloku now èn na ini a ten di e kon (Preik. 3:12, 13). A meki wi na sowan fasi taki wi man du kfalek sani. Ma a no gi wi a reti fu tiri wisrefi noso fu besroiti gi wisrefi san bun èn san no bun (Preik. 8:9; Yer. 10:23). A sabi taki efu wi wani de koloku trutru, dan wi musu dini en èn wi musu gi yesi na en.​—Leisi Yesaya 48:17, 18.

2. San Satan wani taki wi musu bribi, ma san Yehovah du?

² Satan wani taki wi musu bribi taki wi kan de koloku sondro fu dini Yehovah èn taki wi no abi en fanowdu fu tiri wi (Gen. 3:4, 5). Dati meki Yehovah gi libisma na okasi fu tiri densrefi wan pisi ten, so taki a kan kon na krin taki Satan e lei. A no muilek fu si taki libisma no man tiri densrefi. Ma Bijbel e taki fu furu man nanga uma di ben de koloku fu di den ben e dini Yehovah. Fu den alamala, Yesus ben de a moro koloku sma. Meki wi go luku fosi fu san ede a besroiti fu dini Yehovah. Baka dati wi o luku fu san ede wi musu anbegi Yehovah w’wan. Leki lasti, wi o poti prakseri na wan tu fu den reide di wi abi fu dini Yehovah.

FU SAN EDE YESUS BESROITI FU DINI YEHOVAH

3. San Satan ben wani gi Yesus, èn san Yesus besroiti fu du?

³ Di Yesus ben de na grontapu, a ben musu besroiti suma a ben o dini. Syatu baka di Yesus teki dopu, Satan taki dati a ben o gi en ala den kownukondre fu grontapu, ma a ben wani taki Yesus ben musu anbegi en wán leisi nomo. Yesus piki en: „Gowe fu dya, Satan! Bika Gado Buku taki: ’Na Yehovah yu Gado, yu musu anbegi èn na en wawan yu musu dini’” (Mat. 4:8-10). Fu san ede Yesus besroiti fu dini Yehovah w’wan? Wi o poti prakseri na wan tu reide fu san ede a du dati.

4-5. San na wan tu reide fu san ede Yesus besroiti fu dini Yehovah?

⁴ A moro prenspari reide fu san ede Yesus besroiti fu dini Yehovah, na fu di a lobi en P’pa trutru (Yoh. 14:31). Boiti dati, Yesus e dini Yehovah fu di dati na a yoisti sani fu du (Yoh. 8:28, 29; Openb. 4:11). A sabi taki Yehovah na a sma di gi wi libi, taki wi kan fertrow en, èn taki a e gi wi furu bun sani (Ps. 33:4; 36:9; Yak. 1:17). Ala ten Yehovah ben taigi Yesus san tru èn ala sani di Yesus abi a kisi fu Yehovah (Yoh. 1:14). Ma Satan de heri tra fasi leki Yehovah. A meki taki libisma sondu èn taki den e dede. Satan e lei, a gridi, èn a e denki ensrefi nomo (Yoh. 8:44). Ma Yesus ben sabi Yehovah bun èn a ben sabi Satan bun tu. Dati meki noiti a ben wani de leki Satan di opo ensrefi teige Yehovah.​—Fil. 2:5-8.

⁵ Wan tra reide fu san ede Yesus besroiti fu dini Yehovah, na fu di a ben sabi taki furu bun sani ben o psa leki bakapisi fu dati (Hebr. 12:2). A ben sabi taki efu a ben e tan getrow, dan a ben o santa a nen fu en P’pa èn a ben o meki tu taki sondu nanga dede no de moro.

FU SAN EDE WI MUSU ANBEGI YEHOVAH W’WAN

6-7. Fu san ede so furu sma na ini a ten disi no e dini Yehovah, ma fu san ede wi musu anbegi en w’wan?

⁶ Furu ma na ini a ten disi no e dini Yehovah fu di den no sabi den moi fasi fu en èn fu di den no sabi sortu bun sani a du gi den. Na so a ben de tu nanga den sma di Paulus ben preiki gi na ini Ateine. Den no ben sabi Gado tu.​—Tori 17:19, 20, 30, 34.

⁷ Paulus ben taigi den arkiman fu en taki a tru Gado „e gi ala sma libi, na en e meki den bro èn na en e gi den ala sani”. A ben taki moro fara: „Na en meki taki wi de na libi, taki wi e beweigi èn taki wi de.” Gado na a Mekiman èn „fu wán sma nomo a meki ala tra sma fu libi na heri grontapu”.​—Tori 17:25, 26, 28.

8. San Yehovah no o du noiti èn fa a sori taki a lobi wi trutru?

⁸ Fu di Yehovah na a Mekiman èn a Moro Heiwan na hemel nanga grontapu, meki a man du ala san a wani. Efu a ben wani, a ben kan dwengi wi fu dini en. Ma Yehovah no o du dati noiti. Na presi fu dati, a gi wi furu beweisi di e sori taki a de trutru èn taki a lobi wi srefsrefi. A wani taki so furu sma leki a man tron en mati fu ala ten (1 Tim. 2:3, 4). Dati meki Yehovah leri wi fu ferteri trawan fu den bun sani di a o du gi libisma èn fa a o du dati (Mat. 10:11-13; 28:19, 20). A sorgu taki wi kan kon makandra na ini gemeente pe wi kan anbegi en èn pe wi kan kisi yepi fu lob’ati owruman.​—Tori 20:28.

9. Na sortu fasi Yehovah sori taki a lobi ala sma?

⁹ Wi kan si taki Yehovah lobi libisma te wi e luku den bun sani di a e du gi den sma di no e bribi na ini en. Prakseri den sani disi: Dusundusun yari langa, furu sma besroiti fu du san densrefi feni bun noso ogri, na presi fu gi yesi na Yehovah. Tòg Yehovah ben de klarklari fu gi den sma disi san den ben abi fanowdu fu man tan na libi èn fu man de koloku (Mat. 5:44, 45; Tori 14:16, 17). Tangi fu en, meki den abi mati nanga famiriman di lobi den, den kan meki pkin, den kan wroko, èn den kan nyan bun fu a libi fu den (Ps. 127:3; Preik. 2:24). Den sani disi e sori krin taki wi P’pa na hemel lobi ala libisma (Eks. 34:6). Meki wi go luku now fu san ede wi besroiti fu dini Yehovah èn fa a e blesi den wan di e dini en.

FU SAN EDE WI BESROITI FU DINI YEHOVAH

10. (a) San na a moro prenspari reide fu san ede wi e dini Yehovah? (b) Fa Yehovah sori taki a abi pasensi nanga yu? (Psalm 103:13, 14)

¹⁰ Soleki fa wi si, dan a moro prenspari reide fu san ede Yesus ben e dini Yehovah, na fu di a lobi en nanga en heri ati. Na so a de tu nanga wi (Leisi Mateyus 22:37.) Te wi e kon sabi den fasi fu Yehovah, dan wi e kon lobi en. Fu eksempre, prakseri fa a de klarklari fu gi wi pardon. Di den Israelsma ben trangayesi en, dan a begi den: „Grantangi, meki ibriwan fu unu tapu nanga na ogri di a e du” (Yer. 18:11). Yehovah sabi taki wi na sondusma èn taki na fu doti wi meki. (Leisi Psalm 103:13, 14.) Te yu e prakseri den leisi di Yehovah gi yu pardon, dan dati no e meki taki yu wani dini en fu têgo?

11. San na ete wan tu reide fu san ede wi besroiti fu dini wi P’pa na hemel?

¹¹ Wan tra reide fu san ede wi e dini Yehovah, na fu di dati na a yoisti sani fu du (Mat. 4:10). Boiti dati, wi sabi taki efu wi e tai hori na Yehovah, dan furu bun sani o psa leki bakapisi fu dati. Te wi e tan dini Yehovah getrow, dan dati e yepi fu santa a nen fu en, wi e sori taki Satan e lei, èn wi e prisiri na ati fu wi P’pa. Èn efu tide wi e besroiti fu dini Yehovah, dan wi o abi a howpu fu dini en fu têgo.​—Yoh. 17:3.

12-13. San wi kan leri fu na ondrofenitori fu Jane nanga Pam?

¹² Yonguyongu kba, wi kan leri fu lobi Yehovah trutru èn a lobi di wi abi gi en o kon moro tranga. Na dati psa nanga tu sisa di nen Jane nanga Pam.a Jane ben abi 11 yari èn Pam ben abi 10 yari di den bigin studeri Bijbel. Aladi a p’pa nanga a m’ma fu den no ben wani studeri Bijbel, tòg den gi Jane nanga Pam primisi fu bemui nanga den Kotoigi. Ma den ben wani taki den meisje fu den ben musu go na kerki nanga den ibri sonde. Jane e taki: „Den sani di den Kotoigi leri mi fu Bijbel yepi mi fu no de leki den pkin na skoro di ben e gebroiki drugs èn ben e libi wan yayolibi.”

¹³ Baka wan tu yari, ala tu meisje tron preikiman. Bakaten, den bigin pionier èn na a srefi ten den ben e sorgu gi a p’pa nanga m’ma fu den di ben e kon owru. Jane e ferteri fa a e firi te a e prakseri ala den sani di Yehovah du gi den. A e taki: „Mi leri taki Yehovah ala ten e sorgu gi den mati fu en èn taki ’Yehovah sabi den sma di de fu en’, soleki fa 2 Timoteyus 2:19 e taki.’” A de krin taki Yehovah ala ten e sorgu gi den wan di lobi en èn e dini en.

14. Fa wi kan opo taki gi Yehovah? (Luku den prenki.)

¹⁴ Wi wani taki sma e kon sabi den tru tori fu Yehovah. Fu eksempre, kow taki dati yu abi wan bun mati di abi swit’fasi, a lobi gi sma sani, èn a de klarklari fu gi trawan pardon. Wan dei, yu e yere fa wan sma e taki dati yu mati abi ogr’ati èn taki a lobi lei. San yu ben o du? A no de fu taki dati yu ben o opo taki gi en. Na so a de tu taki te sma e ferteri lei fu Yehovah, dan wi e opo taki gi en. Iya, wi e meki den kon sabi den san tru (Ps. 34:1; Yes. 43:10). Wi e taki èn e du sani di e sori taki wani dini Yehovah nanga wi heri ati.

15. San na wan tu fu den moi sani di Paulus ondrofeni baka di a tyari bigi kenki kon na ini en libi? (Filipisma 3:7, 8)

¹⁵ Wi de klarklari fu tyari kenki kon na ini wi libi so taki wi kan dini Yehovah na wan fasi di a feni bun, noso fu man du moro gi en. Fu eksempre, na apostel Paulus ben de wan prenspari sma na ini a Dyu bribi, ma a drai baka gi a bribi dati fu man tron wan disipel fu Krestes èn fu dini Yehovah (Gal. 1:14). A sani disi meki taki a ondrofeni moi sani na ini a diniwroko di a du gi Yehovah èn a kisi a grani fu tiri makandra nanga Krestes na hemel. Noiti a hati en taki a ben besroiti fu dini Yehovah, èn efu wi e besroiti fu dini Yehovah, dan noiti dati o hati wi tu.​—Leisi Filipisma 3:7, 8.

16. San wi e leri fu na ondrofenitori fu Julia? (Luku den prenki.)

¹⁶ Efu wi e meki a diniwroko fu Yehovah tron a moro prenspari sani na ini wi libi, dan wi o kisi blesi now èn na ini a ten di e kon. Luku na ondrofenitori fu wan sisa di nen Julia. Fosi Julia kon sabi a waarheid, a ben e singi na ini wan kerki koor. A ben e du dati sensi di a ben de wan yongu meisje. A ben e singi so bun, taki a kisi training fu tron wan professioneel opera singiman. Heri esi, Julia kon pôpi èn a ben e singi na difrenti presi pe bigi show ben e hori. Di a ben e go na wan pôpi poku skoro, dan wan studenti na ini en klas bigin ferteri en fu Gado. A studenti taigi en taki Gado abi wan nen, èn dati na Yehovah. A no langa baka dati, Yulia bigin studeri Bijbel tu leisi wan wiki. Te fu kba a besroiti fu gebroiki en ten nanga en krakti fu dini Yehovah, na presi fu de wan opera singiman. Ma a no ala sma ben lobi a besroiti di a ben teki. Julia e taki: „Furu sma taigi mi taki mi no ben musu tapu nanga singi fu di dati ben o de wan don sani. Ma mi ben wani gebroiki mi libi fu dini Yehovah.” Fa a e firi tide taki a ben teki a besroiti dati moro leki 30 yari psa? A e taki: „Mi breiti taki mi besroiti fu dini Yehovah èn mi sabi taki na ini a ten di e kon a o gi mi ala san mi ati wani.”​—Ps. 145:16.

TAN DINI YEHOVAH!

17. Now di a kba fu a grontapu disi de krosbei, dan san dati wani taki gi den sma di e dini Gado èn gi den sma di no e dini en ete?

¹⁷ Wi e libi na a kba pisi fu a grontapu disi. Na apostel Paulus ben skrifi: „Ete ’wan syatu pisi ten’, dan ’a sma di e kon, o doro. A no o draidrai’” (Hebr. 10:37). San disi wani taki gi wi? Wan sani, na taki a ten kon syatu gi den sma di no e dini Yehovah ete (1 Kor. 7:29). Èn efu wi e dini Yehovah kba, dan wi sabi taki awinsi tesi e miti wi, a o de fu „wan syatu pisi ten” nomo.

18. San Yesus nanga Yehovah wani taki wi du?

¹⁸ Yesus ben gi den disipel fu en dek’ati fu tron en disipel èn fu tan waka na en baka (Mat. 16:24). Sobun, efu wi e dini Yehovah omeni yari kba, dan wi musu du ala san wi man fu tan dini en. Wi musu du tranga muiti fu hori wisrefi na a besroiti disi. Kande a no o makelek, ma te wi e dini Yehovah, dan wi kan de koloku nownow kba èn a o blesi wi bogobogo.​—Ps. 35:27.

19. San wi e leri fu na ondrofenitori fu Gene?

¹⁹ Son sma feni taki a libi no o switi gi den te den e dini Yehovah. Efu yu na wan yonguwan, dan yu feni taki a muilek tumsi fu dini Yehovah? Wan brada di nen Gene e taki: „Mi ben feni taki mi libi ben strak tumsi fu di mi ben de wan Yehovah Kotoigi. A ben gersi leki furu fu den speri fu mi ben e go na fesa, taki den ben abi verkering, noso taki den ben e prei ogr’ati videogame. Ma mi, na soso konmakandra nanga preikiwroko mi ben e go.” San psa nanga Gene fu di a ben e denki so? A e taki: „Mi bigin libi wan dobru libi èn wan pisi ten a sani dati ben e gi mi prisiri. Ma mi no ben e firi koloku trutru. Mi konsensi bigin fon mi di mi bigin prakseri ala den leisi di mi ben trangayesi den rai fu Bijbel. Dati meki mi besroiti fu dini Yehovah nanga mi heri ati. Sensi mi du dati, mi si taki Yehovah piki ala den begi fu mi.”

20. San wi musu meki muiti fu du?

²⁰ Wan psalm skrifiman ben singi gi Yehovah: „A sma di yu kari fu kon krosbei na yu de koloku. A sma dati o tan na ini den fesdyari fu yu oso” (Ps. 65:4). Dati meki wi musu du ala san wi man fu tan dini Yehovah. Neleki Yosua wi e taki: „Ma mi nanga mi osofamiri, wi o dini Yehovah.”​—Yos. 24:15.