’A bun gi wi fu kon krosbei na Gado’

1-2. (a) San wi musu du fu man de wan bun mati fu wan sma? (b) San wi o luku na ini na artikel disi?

YU ABI wan bun mati? San yu du fu man tron wan mati fu en? Kande yu ben meki ten fu de makandra nanga en, kande yu kon sabi sortu problema a abi, èn kande yu kon sabi tu san a lobi èn san a no lobi. Yu kon si taki a abi moi fasi di yu ben o wani abi tu. Èn yu kon lobi a mati fu yu.

² A e teki ten nanga muiti fu tron wan bun mati fu wan trawan. Na so a de tu te wi wani tron bun mati fu Yehovah Gado. Na ini na artikel disi wi o luku fa wi kan kon moro krosbei fu wi Gado èn wi o luku tu sortu wini dati o tyari kon gi wi. Ma wi o luku fosi fu san ede a bun fu kon moro krosbei na Yehovah, a moro bun mati fu wi.

3. Fu san ede a prenspari fu prakseri den wini di wi o kisi te wi e kon moro krosbei na Yehovah?

³ A prenspari fu denki dipi fu den wini di wi o kisi te wi na bun mati fu Gado (Psalm 63:6-8). Fu san ede? Wi kan ferklari en na a fasi disi: Sma sabi taki a bun te wi e nyan gosontu n’nyan, te wi e oefen wi skin, te wi e sorgu taki wi e sribi nofo, èn te wi e dringi nofo watra. Ma furu sma no e broko den ede nanga den sani disi èn dati meki den no de so gosontu. Na a tra sei, sma di gwenti prakseri fa den sani disi e yepi den fu tan gosontu, e kisi moro dek’ati fu tan du den sani disi. Na so a de tu taki wi sabi taki a bun fu de wan mati fu Yehovah, ma te wi e denki dipi fu san ede dati prenspari, dan wi o tan meki muiti fu kon moro krosbei na en.​—Ps. 119:27-30.

4. San a skrifiman fu Psalm 73:28 taki?

⁴ Leisi Psalm 73:28. A skrifiman fu Psalm 73 ben de wan Leifisma di ben e dini leki pokuman na ini a tempel fu Yehovah. A kan taki a ben e dini Yehovah getrow furu yari kba. Ma a ben sabi taki a ben musu tan hori na prakseri taki a ben bun gi en „fu kon krosibei na Gado” èn a ben wani taki trawan ben musu kon sabi tu taki a sani dati ben o bun tu gi den. Sortu wini a e tyari kon te wi e du dati?

WI O DE KOLOKU TE WI E „KON KROSIBEI NA GADO”

5. (a) Fu san ede wi o de koloku te wi e kon moro krosbei na Yehovah? (b) Fa a koni di Yehovah e gi yu e yepi yu èn fa a e kibri yu? (Odo 2:6-16)

⁵ O moro wi e kon krosbei na Yehovah, o moro wi o de koloku (Ps. 65:4). Furu reide de fu san ede wi o de koloku. Wan sani, na taki wi o kisi wini te wi e fiti den bun rai di de feni na ini a Wortu fu en, Bijbel. Den koni rai disi e kibri wi gi ogri èn den e yepi wi tu fu no meki seryusu fowtu. (Leisi Odo 2:6-16.) Dati meki a fiti te Bijbel e taki: „A sma di kon abi koni de koloku. A sma di e du muiti fu ferstan sani krin de koloku.”​—Odo 3:13.

6. San meki taki a psalm skrifiman lasi prisiri?

⁶ A no de fu taki dati srefi den mati fu Yehovah e sari son leisi. A skrifiman fu Psalm 73 ben lasi prisiri di a bigin prakseri fa sani no ben reti. A ben e mandi tapu ogri sma fu di a ben feni taki den no ben e broko den ede nanga Gado èn taki den no ben e hori densrefi na den wet fu en. A ben e dyarusu tu na den tapu fu di a ben feni taki den ben abi wan switi libi. A ben abi a fowtu denki taki sma di ben abi ogr’ati èn di ben abi heimemre ben kan kisi ala san den wani, taki den ben de gosontu, èn taki den no ben abi nowan problema (Ps. 73:3-7, 12). A ben e sari srefsrefi èn a taki: „Na fu soso mi du muiti fu abi wan krin ati. Na fu soso mi wasi mi anu fu sori taki mi no du nowan ogri.”​—Ps. 73:13.

7. San wi kan du te wi e sari? (Luku a a kafti.)

⁷ Aladi a psalm skrifiman ben e sari srefsrefi, tòg a meki muiti fu kenki a denki fu en. A „go na ini a moi santa presi fu Gado” pe Yehovah yepi en fu si sani na a yoisti fasi (Ps. 73:17-19). Te wi e sari, dan wi kan begi Yehovah fu yepi wi fu kon sabi san wi musu du. Den rai na ini a Wortu fu en èn a dek’ati di wi e kisi fu den brada nanga sisa fu wi o gi wi a krakti di wi abi fanowdu fu man tan dini en aladi wi e sari. Srefi te wi e broko wi ede so te taki wi no sabi san fu du, Yehovah o de drape fu trowstu wi.​—Ps. 94:19.a

„TE WI E KON KROSIBEI NA GADO”, WI KAN ABI WAN BUN LIBI NOW ÈN WAN HOWPU GI A TEN DI E KON

8. San na tra prenspari reide fu san ede wi wani kon krosbei na Gado?

⁸ Ete tu prenspari reide de fu san ede wi wani kon krosbei na Gado. A foswan, na taki wi kan abi wan bun libi te wi de bun mati fu Gado. A di fu tu reide, na taki wi kan abi wan trutru howpu gi a ten di e kon (Yer. 29:11). Meki wi go luku den sani disi moro fini.

9. Fu san ede wi o abi wan bun libi te wi e kon moro krosbei na Yehovah?

⁹ Te wi de bun mati fu Yehovah, dan wi kan abi wan bun libi. Na ini a ten disi, furu sma no wani bribi taki Gado de. Dati meki den no sabi fu san ede libisma de na grontapu èn den e bribi taki wan kba o kon na a libisma famiri. Ma fu di wi studeri Gado Wortu, meki wi de seiker taki Gado „de trutru èn taki a e pai den wan di e suku en fayafaya” (Hebr. 11:6). Boiti dati, Yehovah meki wi na so wan fasi taki wi e angri fu dini en. Sobun, te wi e dini en wi e firi koloku trutru.​—Deut. 10:12, 13.

10. San Yehovah e pramisi den wan di e fertrow na en tapu? (Psalm 37:29)

¹⁰ Furu sma no abi wan trutru howpu gi a ten di e kon. Den e wroko nomo, den e trow, den e meki pkin, èn baka dati, den e poti wan sani na wan sei gi te den kon owru. Den no sabi san Gado o du na ini a ten di e kon. Ma wi sabi taki Yehovah e sorgu gi den futuboi fu en (Ps. 25:3-5; 1 Tim. 6:17). Wi e fertrow wi Gado di de sosrefi wi Mati. Èn wi sabi taki a o du san a pramisi wi. Someni bun sani de di wi e ferwakti, spesrutu a grani di wi o abi fu anbegi en fu têgo na ini a Paradijs.​—Leisi Psalm 37:29.

11. San e psa te wi na mati fu Gado, èn fa dati e meki a firi?

¹¹ Ma furu tra reide de ete fu san ede wi wani kon krosbei na Gado. Fu eksempre, Yehovah pramisi taki a o gi wi pardon fu den sondu fu wi te wi e sori berow (Yes. 1:18). Na so wi no o abi fu tan broko wi ede nanga den sondu di wi ben du na ini a ten di psa (Ps. 32:1-5). Èn wi de koloku te wi e meki Yehovah ati prisiri (Odo 23:15). A no de fu taki dati moro bun sani de di wi o kisi fu di wi na mati fu Yehovah. Meki wi go luku now fa wi kan kon moro krosbei na Gado.

FA YU KAN „KON KROSIBEI NA GADO”

12. San yu du fu kon moro krosbei na Gado?

¹² Efu yu na wan dopu Kresten, dan a no de fu taki dati yu kon moro krosbei kba na Yehovah. Yu leri furu tru tori fu Yehovah nanga Yesus Krestes, yu sori berow fu den sondu di yu ben du na ini a ten di psa, yu sori taki yu e bribi tranga na ini Gado, èn yu du muiti fu libi na wan fasi di a feni bun. Ma efu wi wani kon moro krosbei na Gado, dan wi musu tan du den sani disi.​—Kol. 2:6.

13. San na dri sani di kan yepi wi fu kon moro krosbei na Yehovah?

¹³ San o yepi wi fu kon moro krosbei na Yehovah? (1) Wi musu tan leisi èn studeri Bijbel. Te wi e leisi Bijbel, dan wi no musu leri sani nomo fu Gado. Na presi fu dati, wi musu pruberi fu ferstan fa Gado e denki èn san a wani taki wi du. Boiti dati, wi musu libi na a fasi di a feni bun (Ef. 5:15-17). (2) Wi musu denki dipi fu den furu beweisi di e sori taki Gado lobi wi. Disi o tranga a bribi fu wi. (3) Wi musu teige den sani di Yehovah no lobi èn wi no musu tron mati nanga sma di e du den sortu sani dati.​—Ps. 1:1; 101:3.

14. San wi kan du ibri dei fu plisi Yehovah? (1 Korentesma 10:31) (Luku den prenki.)

¹⁴ Leisi 1 Korentesma 10:31. A prenspari srefsrefi taki wi e tan du den sani di e meki taki Yehovah breiti nanga wi. Ma wi musu du moro leki fu preiki nomo èn fu go na den konmakandra. Yehovah musu breiti tu nanga den sani di wi e du ibri dei. Fu eksempre, te wi de eerlijk na ini ala sani èn te wi lobi fu prati san wi abi nanga trawan, dan Yehovah o breiti nanga wi (2 Kor. 8:21; 9:7). Yehovah wani tu taki wi de nanga tangi gi a libi di a gi wi. Dati meki wi e luku bun o furu wi e nyan èn e dringi èn wi e du tra sani tu di e yepi wi fu tan gosontu. Te Yehovah e si taki wi e du muiti fu prisiri na ati fu en nanga ala san wi e du, dan a o kon abi moro lobi gi wi.​—Luk. 16:10.

15. Fa Yehovah wani taki wi e libi nanga trawan?

¹⁵ Yehovah e sori swit’fasi gi ala sma, srefi gi sma di no e dini en (Mat. 5:45). A wani taki wi musu sori swit’fasi tu gi trawan. Fu eksempre, wi „no musu taki ogri fu nowan sma, . . . èn [wi] musu abi trutru safri-ati gi ala sma” (Tit. 3:2). Sobun, awinsi sma no e bribi na ini Yehovah, tòg wi no e denki taki wi bun moro den (2 Tim. 2:23-25). Te wi e sori swit’fasi gi ala sma, dan dati e yepi wi fu kon moro krosbei na Yehovah.

KON MORO „KROSBEI NA GADO” SREFI TE YU E MEKI FOWTU

16. Fa a skrifiman fu Psalm 73 bigin firi baka wan pisi ten?

¹⁶ Ma son leisi, den fowtu di yu meki kan meki yu denki taki Yehovah no de krosbei fu yu. Ma memre na eksempre fu a skrifiman fu Psalm 73. A ben e kragi: „Bijna mi kmoto na a reti pasi. Bijna mi grati fadon” (Ps. 73:2). A taki dati a ben kon de „leki wan meti di no abi ferstan”, fu di a ben kon abi „bita-ati” èn fu di a „no ben man denki krin moro” (Ps. 73:21, 22). Yu denki taki na fu di a ben meki fowtu, meki a ben e denki taki Yehovah no ben lobi en moro èn taki a no ben o gi en pardon?

17. (a) San a psalm skrifiman du, srefi di a ben brokosaka srefsrefi? (b) San wi kan leri fu na ondrofenitori fu a psalm skrifiman? (Luku den prenki.)

¹⁷ Efu a psalm skrifiman ben e denki taki Yehovah ben drai baka gi en, dan a musu de so taki a ben firi so gi wan syatu pisi ten nomo. Srefi di a ben e firi brokosaka trutru, a ben sabi taki a ben musu du muiti fu kon moro krosbei na Yehovah. A ben skrifi: „Ma now mi e fertrow yu ala ten. Yu grabu mi hori na mi ret’anu. Yu e gi mi rai fu sori mi fa mi musu waka. Bakaten yu o meki mi kisi glori” (Ps. 73:23, 24). Wi musu aksi Yehovah tu fu tranga wi te wi e firi taki wi bribi swaki noso te den fowtu fu wi e meki wi firi brokosaka (Ps. 73:26; 94:18). Awinsi wi meki seryusu fowtu, tòg wi kan drai kon baka na Yehovah èn wi kan de seiker taki a ’de klarklari fu gi wi pardon’ (Ps. 86:5). Spesrutu te wi las’ati srefsrefi, wi musu du muiti fu kon moro krosbei na wi Gado.​—Ps. 103:13, 14.

„KON KROSIBEI NA GADO” FU ALA TEN

18. Fu san ede wi kan tan du muiti fu ala ten fu kon moro krosbei na Yehovah?

¹⁸ Wi kan tan du muiti fu ala ten fu kon moro krosbei na Yehovah. Noiti wi o kba leri sabi en. Bijbel e taki dati a koni èn a sabi fu Yehovah, èn sosrefi den pasi fu en no abi wan kba. Fu ala ten wi o leri sabi sani fu en.​—Rom. 11:33.

19. San Psalm 73 e taigi wi fu a ten di kon?

¹⁹ Psalm 79:13 e taki: „Wi di de a pipel fu yu èn den skapu di de na den weigron fu yu o taki yu tangi fu têgo. Wi o prèise yu fu ala ten.” Te yu e tan du muiti fu kon moro krosbei na Gado, dan yu srefi kan de seiker taki a o blesi yu fu ala ten. Boiti dati, yu o man taki: „[Gado] na mi stonbergi èn fu ala ten en na a gudu fu mi.”​—Ps. 73:26.