Wi o kisi wini te wi e tron bun mati fu wi brada nanga sisa

1-2. San prenspari gi Yehovah èn san a wani taki wi du?

YEHOVAH e si en leki wan tumsi prenspari sani taki wi e libi bun nanga trawan. Yesus ben leri wi taki wi musu lobi tra sma leki fa wi lobi wisrefi (Mat. 22:37-39). Dati wani taki dati wi musu sori swit’fasi srefi gi den wan di no e dini Yehovah. Te wi e sori swit’fasi gi trawan, dan wi e teki na eksempre fu Yehovah Gado di e „meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti”.​—Mat. 5:45.

² Aladi Yehovah lobi ala libisma, tòg a lobi spesrutu den wan di e du san reti (Yoh. 14:21). A wani taki wi teki na eksempre fu en. A e gi wi a rai fu ’lobi wi brada nanga sisa nanga wi heri ati’ (1 Petr. 4:8; Rom. 12:10). A lobi disi na a srefi leki a lobi di wi e firi gi wan famiriman di wi lobi noso gi wan bun mati fu wi.

3. San wi musu hori na prakseri te a abi fu du nanga lobi?

³ Wi kan agersi lobi nanga wan plantje di wi abi na ini oso èn di wi musu sorgu bun so taki a kan gro. Na apostel Paulus ben gi Kresten a rai disi: „Tan lobi makandra leki brada” (Hebr. 13:1). Yehovah wani taki wi e tan sori lobi gi wi brada nanga sisa. Na ini na artikel disi wi o luku fu san ede wi musu tron moro bun mati fu wi brada nanga sisa èn fa wi kan tan du dati.

FU SAN EDE WI MUSU TRON BUN MATI FU MAKANDRA

4. Fa wi kan tan sori warderi gi a wánfasi di de na wi mindri, soleki fa Psalm 133:1 e sori? (Luku den prenki.)

⁴ Leisi Psalm 133:1. Wi e agri nanga a psalm skrifiman di ben taki dati a „bun” èn a „switi” te den wan di lobi Yehovah na mati fu makandra. Ma neleki fa wan sma ben kan kon weri fu wan sani di a lobi èn di a e si ibri dei, na so wi ben kan si a wánfasi di de na wi mindri leki wan gewoon sani te fu kba. Wi gwenti si wi brada nanga sisa, kande wi e si den wan tu leisi wan wiki srefi. Fa wi kan tan sori taki wi e warderi den? A lobi di wi abi gi wi brada nanga sisa o kon moro tranga te wi e teki ten fu prakseri o prenspari ibriwan fu den de gi wi èn gi a gemeente.

5. Fa a lobi di wi abi gi makandra kan abi krakti tapu trawan?

⁵ Te son sma e kon na wan konmakandra fu a fosi leisi, dan a e naki den ati fu si a lobi di wi abi gi makandra. Kande den e kon ferstan taki den feni a tru bribi. Yesus ben taki: „Na a fasi disi ala sma o sabi taki unu na mi disipel, te unu lobi makandra” (Yoh. 13:35). Luku na ondrofenitori fu Chaithra. A ben de wan studenti na wan universiteit di a ben e studeri Bijbel nanga Yehovah Kotoigi. A teki a kari di a ben kisi fu kon na wan kongres. Baka di a go a fosi dei, dan a taigi a sma di ben e studeri Bijbel nanga en: „Noiti mi p’pa nanga m’ma brasa mi. Ma na a kongres fu unu, mi kisi 52 brasa na ini wán dei nomo. Mi ben e firi taki Yehovah ben e gebroiki a pipel fu en fu meki mi firi a lobi fu en. Mi wani de tu na ini a famiri dati.” Chaithra tan go na fesi èn a dopu na ini 2024. Iya, te nyun sma e si den bun sani di wi e du, nanga a lobi di wi abi gi makandra, dan nofo tron dati e gi den dek’ati fu bigin dini Yehovah.​—Mat. 5:16.

6. Fa wi kan feni kibri te wi e tron mati fu wi Kresten brada nanga sisa?

⁶ Te wi e tron mati fu wi brada nanga sisa, dan a sani dati kan kibri wi. Paulus ben gi den Kresten brada nanga sisa a dek’ati disi: „Tan gi makandra deki-ati ibri dei . . . so taki nowan fu unu meki un ati kon tranga, fu di unu meki sondu bedrigi unu” (Hebr. 3:13). Efu wi e las’ati so te taki wi feni en muilek fu du san reti, dan Yehovah kan gebroiki wan brada noso wan sisa fu yepi wi (Ps. 73:2, 17, 23). Te wi e kisi yepi na a fasi disi, dan dati e gi wi dek’ati trutru.

7. San lobi abi fu du nanga wánfasi? (Kolosesma 3:13, 14)

⁷ Wi na fu wan grupu sma di e du tranga muiti fu sori lobi gi makandra, èn dati meki wi e kisi furu blesi (1 Yoh. 4:11). Fu eksempre, lobi e meki taki wi e „tan frudrage makandra”, èn a sani dati e yepi wi fu de na ini wánfasi nanga wi brada nanga sisa (Leisi Kolosesma 3:13, 14; Ef. 4:2-6). Sobun, nowan enkri kerki grupu e prisiri so fu anbegi Gado leki wi.

LESPEKI MAKANDRA

8. Fa Yehovah e yepi wi fu de na ini wánfasi nanga wi brada nanga sisa?

⁸ A wánfasi di de na mindri wi brada nanga sisa na heri grontapu, na wan wondru. Na Yehovah e meki taki a sani disi de so, aladi wi na sondu libisma (1 Kor. 12:25). Bijbel e taki dati ’Gado srefi leri wi taki wi musu lobi makandra’ (1 Tes. 4:9). Disi wani taki dati Yehovah e gebroiki Bijbel fu taigi wi krin san wi musu du fu man de mati fu makandra. Wán fasi fa wi e kisi leri fu Gado, na te wi e studeri den sani di a e leri wi èn te wi e fiti den sani dati (Hebr. 4:12; Yak. 1:25). Èn dati na soifri san Yehovah Kotoigi e pruberi fu du.

9. Fa Romesma 12:9-13 e leri wi fu lespeki makandra?

⁹ Fa Gado Wortu e leri wi fu tron mati fu makandra? Luku san Paulus ben abi fu taki fu a tori disi, soleki fa a skrifi na Romesma 12:9-13. (Leisi en.) Drape Paulus e taki: „De a fosiwan fu sori trawan lespeki.” San disi wani taki? Wi musu de a foswan fu sori lobi gi trawan na difrenti fasi. Fu eksempre, wi musu de klarklari fu gi trawan pardon, fu kari sma kon na wi oso, èn fu gi trawan sani (Ef. 4:32). Yu no musu wakti teleki yu brada noso sisa e du muiti fu tron wan mati fu yu. Yu kan „de a fosiwan” fu du dati. Èn yu o ondrofeni a sani disi di Yesus ben pramisi: „Wan sma o de moro koloku te a e gi sani, leki te a e kisi sani.”​—Tori 20:35.

10. Fa wi kan du tranga muiti fu „sori trawan lespeki”? (Luku a prenki.)

¹⁰ A moi fu si taki baka di Paulus gi wi a rai fu sori lespeki gi trawan, dan wantewante a taigi wi fu „wroko tranga” èn fu no „lesi”. Te wan sma di no lesi e kisi wan wroko fu du, dan a e du en fayafaya. Odo 3:27, 28 e gi wi a rai disi: „Te sma de na nowtu, no tapu yu ai, ma yepi den efu yu abi na okasi fu du dati.” Sobun, te wi e si taki wan sma abi yepi fanowdu, dan wi e hasti wisrefi fu yepi a sma dati. Wi no e draidrai, èn wi no de nanga a denki taki wan tra sma o du en.​—1 Yoh. 3:17, 18.

11. San kan yepi wi fu tron mati fu makandra?

¹¹ Wan tra fasi fa wi kan sori lespeki gi trawan, na te wi de gaw fu gi den pardon te den du wan hati sani nanga wi. Efeisesma 4:26 e taki: „No meki son dongo, aladi unu e mandi ete.” Fu san ede wi no musu du dati? Efu wi ben o du dati, dan wi ben o „gi Didibri okasi fu abi krakti na un tapu”, soleki fa vers 27 e taki. Na ini Bijbel, Yehovah e taigi wi ibri leisi baka fu gi makandra pardon. Kolosesma 3:13 e gi wi a rai fu ’tan gi makandra pardon nanga wi heri ati’. Te wi e gi trawan pardon fu den fowtu di den meki, dan dati na wan fu den moro bun fasi fa wi kan tron mati fu den. Te wi e gi trawan pardon, dan wi e sorgu taki wi e ’tan abi a wánfasi di wi kisi nanga yepi fu a santa yeye’ (Ef. 4:3). A de krin taki te wi e gi trawan pardon, dan wi e yepi fu sorgu taki wánfasi nanga freide e tan na ini na organisâsi.

12. Fa Yehovah e yepi wi fu gi trawan pardon nanga wi heri ati?

¹² A no de fu taki dati a kan muilek gi wi son leisi fu gi sma pardon te den ben du wan hati sani nanga wi. Ma a santa yeye fu Gado kan yepi wi. Baka te Bijbel e gi wi a rai fu „lobi makandra trutru”, èn fu „wroko tranga”, a e gi wi dek’ati fu „de fayafaya fu di [wi] abi a santa yeye”. Wan sma di „de fayafaya”, e prisiri fu di a yeye abi krakti na en tapu. Sobun, a yeye fu Gado kan yepi wi fu lobi makandra trutru èn fu gi makandra pardon nanga wi heri ati. Dati meki wi e begi Yehovah fayafaya fu yepi wi. ​—Luk. 11:13.

„NO MEKI PRATIFASI DE NA UN MINDRI”

13. San kan tyari pratifasi kon na wi mindri?

¹³ Na ini a gemeente yu abi „ala sortu sma” fu difrenti kulturu (1 Tim. 2:3, 4). Efu wi no e luku bun, dan den difrenti disi kan tyari pratifasi kon te a abi fu du nanga den krosi di wi e weri, nanga a fasi fa wi e sorgu wisrefi, a datrayepi di wi e teki, noso nanga den sani di wi e du fu man abi prisiri (Rom. 14:4; 1 Kor. 1:10). Fu di ’Gado srefi leri wi taki wi musu lobi makandra’, meki wi musu luku bun taki wi no de nomonomo fu sori sma taki wi sabi moro bun leki den san fiti èn san no fiti.​—Fil. 2:3.

14. San wi musu pruberi fu du èn fu san ede?

¹⁴ Wan tra fasi fa wi kan sorgu taki pratifasi no e kon na ini a gemeente, na te wi e du muiti fu gi makandra dek’ati ala ten (1 Tes. 5:11). No so langa psa, furu sma di no ben e teki prati moro na a preikiwroko noso di ben puru fu a gemeente, drai kon baka na Yehovah. A no de fu taki dati wi breiti taki den de baka na wi mindri (2 Kor. 2:8). Luku san psa nanga wan sisa di ben drai kon baka na a Kownukondre zaal baka di a no ben e teki prati moro na preikiwroko tin yari langa. A taki: „Ala sma ben breiti fu si mi èn den alamala kon seki mi anu” (Tori 3:19). Sortu krakti den sani disi ben abi na en tapu? A e taki: „Mi ben e firi taki Yehovah ben e yepi mi fu firi koloku baka.” Te wi e pruberi fu de wan dek’ati gi trawan, dan Krestes kan gebroiki wi fu tranga den wan „di musu wroko hebi èn di musu tyari hebi lai”.​—Mat. 11:28, 29.

15. San na ete wan fasi fa wi kan yepi fu sorgu taki a gemeente e tan na ini wánfasi? (Luku a prenki.)

¹⁵ Ete wan fasi fa wi kan sorgu taki a gemeente e tan na ini wánfasi, na te wi e luku bun san wi e taki. Yob 12:11 e taki: „A yesi e yere san sma e taki èn a tongo e tesi n’nyan.” Wan sma di sabi bori bun, ala ten o tesi a n’nyan fu sabi efu a e tesi bun, fosi a e meki trawan nyan en. Na a srefi fasi wi musu denki bun fosi wi taki (Ps. 141:3). We wani de seiker ala ten taki san wi o taki o gi trawan dek’ati, èn taki „den sma di e arki, kan yere sani di bun gi den”.​—Ef. 4:29.

16. Suma spesrutu musu pruberi fu taki sani di e gi trawan dek’ati?

¹⁶ Spesrutu masra, p’pa, nanga m’ma musu luku bun taki den e taki sani di e gi trawan dek’ati (Kol. 3:19, 21; Tit. 2:4). Sosrefi owruman musu gi den skapu fu Yehovah dek’ati èn den musu trowstu den (Yes. 32:1, 2; Gal. 6:1). Wan odo na ini Bijbel e taki: „Wan wortu di taki na a yoisti ten, bun srefsrefi!”​—Odo 15:23.

LOBI TRAWAN NANGA YU HERI ATI

17. Fa wi kan sori trutru lobi gi wi brada nanga sisa?

¹⁷ Na apostel Yohanes e gi wi dek’ati fu no taki nomo dati wi lobi trawan, ma fu du sani di e sori taki wi lobi den trutru (1 Yoh. 3:18). Wi wani lobi wi brada nanga sisa nanga wi heri ati. Fa wi kan du dati? O moro wi de makandra nanga wi brada nanga sisa, o moro wi o tron bun mati fu den èn o moro wi o kon lobi den. Sobun, abi a gwenti fu go na den gemeente konmakandra èn fu teki prati na a preikiwroko. Disi na moi okasi fu de makandra nanga yu brada nanga sisa. Meki ten sosrefi fu go luku trawan na den oso. Te wi e du dati, dan wi e sori taki na ’Gado srefi e leri wi taki wi musu lobi makandra’ (1 Tes. 4:9). Boiti dati, wi srefi o ondrofeni „o bun èn o switi a de te brada e libi makandra leki wán famiri!”​—(Ps. 133:1).